Сергей Меликовлул барча кунни Дагъусттаннал боксертурахь Дунияллул чемпионатрай Дубайлив мусил медальлу ласаву.

– Дагъусттаннан ва тарихраву личIансса хьхьичIуннайшивур: жула шама ватанлув хьунни боксрал дунияллул чемпионтал! Муслим ХIажимахIаммадовлул дакI дарцIуну дурххунни мусил медаль 92 килорал кIушиврий. Утти ва хьуссар Аьрасатнал тарихраву дунияллул шамлийнусса чемпион! Ва хьхьичIуннайшивруцIун дуссар хъинну захIматсса, спортсмен хIалдания гьан увайсса тренировкартту, хасият, лахIан буван къашайсса бияла ва азарахъул тамашачитурал вихшала. Муслимлул уттигу цал тасттикь бунни цува ушиву цIанасса заманнул ца яла хьичIунминнавасса боксер.

Ца мунийну Дубайлиясса ххарисса хаварду къуртал хъанай бакъар. Шарапуттин Атаев хьунни дунияллул чемпион 86 килорал кIушиврий, ва кIилчинмур мусил медальли ванал ларсъсса дунияллул первенстварттай.
Дунияллул чемпионнал цалчинмур цIа ларсунни Жамбулат Бижамовлул 80 килорал кIушиврий, – чивчунни цала Телеграм каналданий региондалул бакIчинал.
Ванал барча унни уттигу ца Дагъусттаннал боксер – Вадим Мусаев, ванал Дубайлив ларсъссар дунияллул чемпионнал мухIлу цамур турнирданий.
«ЛичIину кIицI дуван ччай бур дагъусттанлув Вадим Мусаевлул хьхьичIуннайшиву. Вадим Мусаев дунияллул чемпион хьуссар Дунияллул боксертурал сакиншиндарал профессионалтурал версиялий ххув хьуну. Ми спортсментуравасса гьарцаннал къабигьасса ххуллу бивтссар финалданийн букканнин. Финалданийгу миннал ккаккан дурссар цалла кьянкьасса хасият, усттаршиву ва хIакьсса биюлтрал хIал. Ми ххувшавуртту миннал ларсъссар арулла гьухъ дуккан дурну, захIматрайну ва цала дакI дацIаврийну.
ЛачIун буккавриву хьун дурсса хьхьичIуннайшивурттал хъирив Дагъусттан хьуну бур Дунияллул боксрал центрдавасса ца», – увкунни Сергей Меликовлул