«2023 шинал «Профессионалитет» проектрал лагрулий колледжирттал итаавкьуну ур 77 аграрий пишакар: 43 шяраваллил хозяйствалия дучIаймуниха зунсса, 23 ризкьилуха зунсса, 11 гъаттарал хIакин».
Ттигъанну Дагъусттаннал паччахIлугърал аграрный университетраву хьунни республикалул агропромышленный комплексрай зунсса пишакартал хIадур баврийн багьайсса стратегическая сессия.
Ваний гьуртту хьуна ДР-лул ХIукуматрал хъунама Аьбдулмуслим Аьбдулмуслимов, ДР-лул ХIукуматрал хъунаманал хъиривчу Нариман Аьбдулмуталибов, шяраваллил хозяйствалул ва дукиялул министр Мухтарбий Аджеков, ДагГАУ-лул ректор Зайдин Жамбулатов, республикалул властьрал органнал, кIулшиву дулаврил ва жяматийсса идарарттал вакилтал, шяраваллал администрациярттал хъуними, шяраваллил хозяйствалия дучIаймур итадакьайсса предприятиярттал вакилтал.
Аьбдулмуслим Аьбдулмуслимовлул барчаллагь увкуна хъуруннай ва яттикъушай зузисса аграрийтурахь.Ттизаманнул кIулшиву дулаврил буруккинну ванал кIицI лавгуна кIулшиву дулаврил программарттал хьхьичI бивхьуну бакъашиву элму хьхьичIуннай даврил ххуллий чялишсса гьурттушинна дан бюхъайсса пишакартал хIадур бансса мурадру.
«Республикалул АПК-лун хIакьину аьркинну ур: 508 ризкьичи, 338 тракторист, механизатор ва техника дакьин дан бюхъайсса усттартал; 211 доярка, 208 пишакар щинал система зузи дан бюхъайсса; 204 ахъчи, 173 бухгалтер, 161 гъаттарал хIакин, 157 багъманчи, 153 агроном, 121 найрдучи, 109 зоотехник».
Мухтарбий Аджековлул баян бувна, республикалул муниципалитетирттал хъуниминнал министерствалийн буллусса информациялийн бувну, Дагъусттаннал агропромышленный комплекс мюхтажну бушиву шаназаруннийн бивсса пишакартурах.
– Республикалул АПК-лун хIакьину аьркинну ур 508 ризкьичи, 338 тракторист, механизатор ва техника дакьин дан бюхъайсса усттар, 211 доярка, 208 пишакар щинал система зузи дан бюхъайсса, 204 ахъчи, 173 бухгалтер, 161 гъаттарал хIакин, 157 багъманчи, 153 агроном, 121 найрдучи, 109 зоотехник, – укунсса сияхI дуруна министрнал. Ванал кIицI лавгуна дагъусттаннал кIулшиву дулаврил идарарттал шинал бакIрах итабакьлай бушиву азарунниха бувксса дянивсса ва ларайсса кIулшиву дусса аграрийтал. Республикалий хIакьину зий бур ца вуз ва шанма дянивсса пишакаршиву дулайсса идара: Дагъусттаннал паччахIлугърал аграрный университет, ванил биялалий зузисса Аграрно-экономический техникум, ДагОгниливсса Аграрный колледж ва Буйнакскалийсса шяраваллил хозяйствалул колледж.
Мухтарбий Аджековлул бувсуна Дагъусттаннай цIакь дурну душиву республикалул школардай аграрий классру хIасул бансса «ххуллул карта». ДакIнин бувтуна билаятрал президент Владимир Путиннул амру, аьмсса кIулшиву дулаврил идарарттай пишакартал хIадур буллансса агроклассру хIасул баврийн ва 6-11 классирттал дянив аграриялул масъаларттайн дагьайсса мероприятияртту дуллансса программа итадакьаврил ялувсса.
«Ва ххуллий Дагъусттаннал КIулшиву дулаврил ва элмулул министерствалущал цачIуну ххал диргьуну, республикалул ХIукуматрал итадаркьуссар аьмсса кIулшиву дулаврил идарарттай «Аграрный класс» тIисса, кIулшиву дулаврил проект щурущи бансса «ххуллул карта»», – увкуна Минсельхозпродрал каялувчинал. Министрнал кIицI лавгуна 2022 шиная шийнмай Буйнакскалийсса Шяраваллил хозяйствалул колледжраву щурущи бувну бушиву анаварсса программалий пишакартал хIадур буллансса федерал проект «Профессионалитет».
«Дуккаврил идаралул программалувун дирчуну дуссар шинайсса кIулшиву дулаврил программа кутIа дурну, шяраваллил хозяйствалия дучIаймуниха зунсса пишакартал хIадур баврийн чул бивщусса программартту», – бувчIин бувна министрнал.
Баян бувна, республикалул аграрий колледжирттал шяраваллил хозяйствалия дучIаймур итадакьлакьисса предприятиярттащал дурну душиву шанттурша выпускник даврил щаллу ансса кьутIи.
«2023 шинал ва проектрал лагрулий колледжирттал итаавкьуну ур 77 аграрий пишакар: 43 шяраваллил хозяйствалия дучIаймуниха зунсса, 23 ризкьилуха зунсса, 11 гъаттарал хIакин», – увкуна ванал. Хъирив ихтилат бувсса Аьрасатнал КIулшиву дулаврил министерствалул пишакарсса кIулшиву дулаву хьхьичIуннай даврил институтрачIасса «Профессионалитет» тIисса федерал проектрал ялув бавцIусса ва хьхьичIунмай бавриха зузисса центрданул каялувчи Ольга Семинал хъинчулий ккавккуна АПК-лунсса пишакартал мюрщинияцIава хIадур баврил ялувсса пикри.
Ванил бусаврийн бувну, шяраваллил хозяйство хьхьичIуннай даврил лагрулий «Профессионалитет» проектравун бухлай бур 215 идара ва 27 кластер. Проектраву гьуртту хъанай бур 25 субъект, вайннувух – Дагъусттангу.
Ольга Семинал кIицI лавгуна региондалий гьарза бан багьлай бушиву шяраваллил хозяйствалул кластерду. ЦIанакул регионнал буллай бур грантру ласунсса аьрзарду.
«На Дагъусттаннайн букIлай бура махъсса 10 шинал дянив. Жула билаятрал гражданин хIисаврай, ттул дакI ххари хъанай дур республика тIутIайх дичлай чIалай. ХIакьину, махъ бакъа, ва бур Аьрасатнаву ца яла инвестицияртту кIункIу дуллалисса регион, шяраваллил хозяйствагу дур ца яла хьхьичIунсса отрасль, цувгу мюхтажну дур хьхьичIунсса пишакартурах», – увкуна ванил.
Зайдин Жамбулатовлул баян бувна ДагГАУ-лул стратегический партнертуравун бухлай бушиву вай предприятияртту: ООО «Батыр-Бройлер», АО «Кизлярагрокомплекс», СХК «Агрофирма «Согратль», КФХ «Сад» ва цаймигу.
Мукунма хIадур буллай бур «Дагмясо» ООО-лунсса, яни хIакьину Дагъусттаннай буллалисса, дикIуя дучIаймур итадакьлансса заводрансса пишакартал. Му бакъассагу, ДагГАУ-лий Россельхозбанкращал цачIуну щурущи бувну буссар проект «Школа фермера». Вузраву зузи дурну дуссар селекциялуха, генетикалуха, сурсатру ябавриха цIусса технологиярттай зунсса пишакартал хIадур бансса программа.
ДагОгниливсса Аграрный колледжрал директор Маркизат Сулаймановал бувсуна ДР-лул Шяраваллил хозяйствалул ва дукиялул министерствалущал цачIуну дуккаврил идаралул маслихIат бувну бушиву хIадур буллан цIусса пишакартал, туристътал шяраваллил кIанттурдайн бувцуну занай, шяраваллил хозяйствалия дучIаймунищал кIул буллансса. Ваних вичIидиширча, региондалий агротуризм анаварсса бущилий хьхьичIуннай хъанай душивруцIун бавхIуну, ва журалул пишакартал хъинну тIалавну бикIан тIий бур.
Ванил бувсуна колледж чялишсса даву дуллай бушиву республикалул кьиблалул зоналий агроклассру тIитIавриха. Махъ зуманив колледжрал сипталийну агроклассру тIивтIуну бур
Дарбантуллал ва Сулайман-Стальскаллал районнайсса шанма школалий кьутIирду чирчуну дур Кьиблалул Дагъусттаннал цайми районнал школардайгу агрогруппарду ва агроклассру тIитIинсса. Вай классирттал выпускниктуран дуллан тIий дур АПК-рдай зунсса пишакартурал свидетельствартту. Колледжрал дур 12 сельхозпредприятиялущал чирчусса кьутIирду, микку студентътурал практикагу лархьхьуну, зун буххайсса бур.
Гьашину Сулайман-Стальскаллал райондалий «Живая библиотека» тIисса аграрийтурал профориентационныйсса фестиваль даврия бувсуна Цмурдал школалул директор Сергей Ежовлул. Ванал кIицI лавгуна «Живая библиотека» проект школалий зий бушиву гьарца шинал. Ванил лагрулий сакин дайсса дур дуклаки оьрчIал личIи-личIисса пишакартуращалсса хьунабакьавуртту, шикку цанма аьркинмунищал кIул шайсса бур. «Гьашинусса фестиваль жу хас дуллай буру аграрий пишардан. Оьвчин дакIний буру зоотехникнайн, агрономнайн ва цаймигу пишакартурайн», – увкуна Сергей Ежовлул.
Ванал кIицI лавгуна Цмурдал школалул дуклаки оьрчIру чялишну хIала бувххун бушиву шяраваллил хозяйствалул производствалувух: ахънилсса ххяххан дуллай, пуннукьрал бакIлахъия датIлай. Мунищала архIал сентябрьданий школалий тIитIин тIий бур агрокласс.
Стратегическая сессия къуртал хьуна ххюва дискуссиялул площадкалий: аграрий пишакартал хIадур бансса ттизаманнул кьяйдардал, ххяххиярттаха зунсса пишакартал хIадур баврил, ризкьичитал хIадур баврийн багьайсса буруккинттал, ризкьичитурал кьимат лавай баврил, балугъирттал хозяйствалий зунсса пишакартал хIадур баврил, шяраваллил кIанттурдай зунсса аграрийтал хIадур баврил.
Шиккува бунни цаппарасса маслихIатру: агроклассирттавун кIункIу буллан 5-6 классирттал дуклаки оьрчIая тIайла хьуну, кIулшиву дулаврил программартту ххал дигьлагьийни хIисаврайн ласун предприятиярттал пикрирду ва тIалавшиннарду, ххал бигьин хIухчалтран социал кумагрансса чаранну, предприятиялул, вузрал ва студентнал дянив кьутIи чичаврийну даврил практика гьарза-гьарта дуван.
ДагГАУ-лул стратегическая сессиялул лагрулий чирчуна «Согратль» агрофирмалул, «Сари Хум» СПоКрал ва «Садоводы Дагестана» союзрал дянивсса индустриал партнершиврул кьутIи. КьутIилул ккаккан дурну дур вай сельхозпредприятиярттал каялувчитал ва пишакартал, эксперт-практиктал хIисаврай, ДагГАУ-лул студентътуран практикалун ва даврил щаллу бан кабакьу буллан.
Стратегический сессиялул хIасиллу дуллай, Мухтарбий Аджековлул увкуна:
«Республикалун аьркинну бур ттизаманнул оборудованиялущал ва агродроннащал зун кIулсса пишакартал. Мунийн бувну, хьхьичIунмай бачинну элмулущал».
Барчаллагь увкуна стратегический сессиялий гьуртту хьуминнахь. Сессия наниссаксса мутталий Дагъусттаннал паччахIлугърал аграрный университетрал хIаятраву тIиртIуну дия аграрий элмулул хьхьичIуннайшивурттал ккаккия. Ваний дирхьуну дия аьращарал буллугъшиву ларай дансса ххал бигьавуртту, ахъулссаннул, ахънилссаннул, ххяххиярттал гьаннардал журарду, шяраваллил хозяйствалул ханхъус, шяраваллил хозяйствалул техника, дагъусттаннал фермертурал цала ххал диргьуну дартIсса хасъсса транспорт.
Зулайхат Тахакьаева
