Ноябрьданул 10-нний «Дагъусттан» РИА-лий хьунни халкьуннал дусшиврул «Общий дом — Дагестан» фестивальданул хIасиллу дуллалисса пресс-конференция.
Ваний гьуртту хьунни Дагъусттан Республикалул национал политикалул ва диннал иширттал министрнал буржру биттур буллалисса Тамирлан АбутIалимов ва Аьрасатнал ЯтIул Ххачлил Дагъусттаннал региондалул отделениялул каялувчи Раиса Шахсинова. ДакIнин бутан, фестиваль хьуссар ноябрьданул 8-нний. Ванил сакиншинначитурал агьаммур мураднугу бивкIссар культурардал дянивсса диалог, арарду хьхьичIуннай даву ва жулла республикалийсса чил билаятирттал инсантурал чIарав бацIаву даву, яни вайннал социал ва культуралул адаптация шаву.
Тамирлан АбутIалимовлул бусаврийн бувну, фестиваль дувансса пикри хьуну бур Аьрасатнал ЯтIул Ттугълил Дагъусттаннайсса отделениялул «Новый старт: профессиональная подготовка и интеграция вынужденных переселенцев из Палестины» цIанилусса грантрал проект щаллу дуллалисса чIумал. Дагъусттаннал ва Палестиннал халкьуннал дянивсса фестиваль цалчинна-цалчин хьуссар ларгсса шинал. Ва ххув хьуссар ДР-лул Национал политикалул ва диннал иширттал министерствалул дуллалисса грантирттал конкурсрай. Пикри хьуссар ва гьарца шинал дуллан.
Фестивальданул лагрулий Палестиннавасса лихъачалт кIул буллалиссар Дагъусттаннал культуралущал, багьу-бизулущал, лахьхьин буллалиссар вайннан цIу-цIусса пишарду, кумаг буллалиссар даврийн буххан, буллалиссар вайннан медициналул ва цамургу кумаг. Фестивальданул цачIун буллалиссар личIи-личIисса миллатирттал инсантал.
Фестивальданул лагрулий хьуссар миллатирттал багьу-бизу ккаккан буллалисса майданну, халкьуннал канил пишардал мастер-классру, Дагъусттаннал халкьуннал балайрдая ва къавтIавурттая сакин хьусса концертрал хъуннасса программа. Фестивальданул лагрулийсса давурттавух гьуртту хьуссар Палестиннавасса ттуршунния ливчусса инсантал.
Раиса Шахсиновал кIицI лавгунни фестивальданул гьурттучитал цалнияр цал чIяву хъанахъишиву, ларгсса шинал 500-ннийн бивсса гьурттучитал бивкIхьурчан, гьашину 1000-нния ливчусса хьушиву.
Бадрижамал Аьлиева
