ЦIуссалакрал райондалул ЦIусса миналий «АхIмадхан» тIисса 1-мур ДЮСШ-рал спортрал залдануву хьунни «Кубок Турчидага» тIисса мюрщи жагьилтурал дянивсса (13 шин хьуннинсса оьрмулул) дзюдорал турнир.
Ва хас дурну дия 1741-ку шинал ТтурчIайнна-Зунттуй Дагъусттаннал къучагътурал цачIун дур кьюкьлул Ираннал Надир-шагь ххит увсса иширан. Шикку гьуртту хьунни Дагъусттаннал личIи-личIисса районнаясса ва шагьрурдаясса 20 команда. Турнирданул бусравсса хъамал бия тарихчи Илияс Къаяев, яла захIматми 1944-1952-ку шиннардий ЦIуссалакрал райондалий каялувшиву дуллай ивкIсса ОьмархIажинал арс Султан ЦIаххаев, чIярусса шиннардий райисполкомрал председательну ивкIсса Багьауттиннул арс Симардин Сулайманов. КIива гьантлул дянив ччалли увккунни 333 спортсмен.
Турнир дайдихьлай, спортсментал ва хъамал барча буллалисса ихтилатру бунни ЦIуссалакрал райондалул бакIчинал хъиривчу Арсен Гъазиевлул, Илияс Къаяевлул, ТтурчIиял ихIсандалул фондрал председатель Растиван Бековлул ва м.ц. Аьрасатнал гимн увкуну махъ байбивхьунни бяст-ччал. Цинявппагу спортсментурал ккаккан бунни цала бюхъу-хъит.
Турнирданул хIасиллайн бувну цалчинсса кIану бувгьунни ЦIуссалакрал 1-мур ДЮСШ-рал командалул. Командалувасса ххюя дзюдоистнал бувгьунни цалчинсса кIану, шамуннал – кIилчинсса кIану ва арула спортсменнал бувгьунни шамилчинсса кIану.
Ххув хьусса ва хьхьичIунсса кIанттурду бувгьусса спортсментуран буллунни дипломру, кубокру ва медальлу, мукунма вайннан бахшиш бунни турнирданул лишандалущалсса футболкарду ва кимонорансса хасъсса мухIулттив.
Ва турнир сакин дан ва лайкьсса даражалий тIайла дуккан арцуйнусса ва укунмасса кумаг бувссар «ТтурчIидагъ» тIисса ихIсандалул фондрал, ЦIуссалакрал администрациялул.
Барчаллагь цинявппагу гьурттучитуран ва чIарав бавцIуминнан.
Андриана Аьбдуллаева
