Сентябрьданул 1-нний, цIусса дуккаврил шинал цалчинсса кьини, лахъа-хъунсса даражалий, чIявусса бусравсса хъамалгу гьуртту хьуну, цIусса школа тIивтIунни Шамхал поселокрай. КIулшивурттал кьини школалул коллективгу, дуклаки оьрчIругу барча бан бувкIун бия ДР-лул ХIукуматрал председатель Аьбдулмуслим Аьбдулмуслимов, ДР-лул Халкьуннал Мажлисрал председательнал хъиривчу Камил Давдиев, МахIачкъала шагьрулул мэр Жамбулат Салавов, ДР-лул спортрал министр Сажид Сажидов, ДР-лул кIулшиву дулаврил министрнал хъиривчу ХIажимурад МахIаммадов, Роспотребнадзорданул управлениялул каялувчинал хъиривчу Ирина Алжанбагова ва цаймигу.

ДакIнин бутан, августрал 12-нний хьусса, Строительтурал кьинилун хас дурсса видеоконференциялий Дагъусттаннал бакIчи Сергей Меликовлул Шамхал поселокрай­сса 49-мур школалия, шикку сакин дурсса шартIирдая бувсъссия Аьрасатнал президент Владимир Путиннухь.Ттизаманнул технологиярттайну бувсса ва цIусса оборудованиялул дузалсса ххаллилсса школа буван кабакьу баврихлу школалул директор Аьбдулкарим Айгуновлул барчаллагь баян бувссия Владимир Путиннуйн.

Шагьрулия архсса, ттизаманнул шартIирдал дузалсса школарду бакъасса поселокрай яхъанахъисса оьрчIру ва нину-ппу дазу дакъа ххарину бия цIусса школа тIитIаврия.
Школалул хIаятраву Аьбдулмуслим Аьбдулмуслимов бакIчисса хъамаллурал делегация кьамул бувна Аьбдулкарим Айгуновлул ва дуклаки оьрчIал.
Школа тIитIлатIисса шадлугърал мажлис байбивхьуна Аьрасатнал ва Дагъусттаннал гимнру учаврийну. Ихтилатру байбишин хьхьичI хъамаллуран цалва гьунарду ккаккан бувна оьрчIал ансамбльданул къавтIалтрал. Цалчин школалийн нанисса оьрчIал дурккуна назмурду.

Шадлугърайсса батIаврий дуклаки оьрчIан тIайлабацIу чIа тIутIисса ихтилат бувна премьер-министрнал.
– ХIакьину республикалий тIивтIунни цIуну бувсса 14 школа ва 2 детсад. Вайннува ца яла хъунмур хъанай бур Шамхал поселокрай тIивтIусса школа.
Ххирасса оьрчIрув, учительтал! КIулшивурттал кьини тIивтIусса школа зун барачатсса хьуннав.

Умуд бур, ва школалий ххуйсса кIулшивуртту ларсун, школалулгу, республикалулгу цIа-кьини бюхттул дансса оьрчIру хьунссар зуяту тIисса. Учительтурангу чIа тIий ура жаваблувсса ва бигьа дакъасса тарбиялул давриву тIайлабацIу ва ссавур, – увкунни Аьбдулмуслим Аьбдулмуслимовлул.
Премьер-министрнал кIицI лавгунни, шинал ахирданийннин республикалий 600 оьрчIансса кIантту бусса 2 школа ва 250 оьрчIансса 1 детсад тIитIинтIий бушиву.
ДакIнин бувтунни 2025 шин Аьрасатнаву Ватан дуруччул шинну баян бувшиву ва Ватан дуручлачими ПаччахIлугъран хьхьичIунну бушиву.
Хъирив ихтилат бувна школалул директор Аьбдулкарим Айгуновлул. Ванал барча бувна дуклаки оьрчIру, нину-ппу ва учительтал КIулшивурттал кьинилущал. Дуккаврил ххуллий цалчинсса шаттирду ласласисса мюрщултрахь бувсуна цуксса гуж ва чани буссарив дуккавриву. ЧIа увкуна оьрмулуву тIайлабацIу, дуккавриву ва спортраву хьхьичIуннайшивуртту.

– Сентябрьданул 1-сса кьини жучIара мудангу бусравсса, бюхттулсса байранни. Жунма цинявннан дакIнийссар цалчин школалийн бувкIсса кьини жухьра дарс дирхьу­сса учительтал. Школалийри кIулшивурттал гьану бизайсса, школар кIулшивуртталгу, тарбиялулгу бакIщаращи. Шикку лавхьхьумур гихунмай зул оьрмулуву чIявуну бучIи лякъинтIиссар. Цуксса аькьлу-кIулши дусса, итххярхсса дурив ялун нанисса ник, муксса чаннасса бикIантIиссар жула бучIантIимур, – увкунни Жамбулат Салавовлул.
Дуклаки оьрчIал хъарай щябивтсса чIивитIул Цалчинсса гюнгутIи бивщуну махъ, хъамаллурал ххал бувна цIусса школа. Аьбдулмуслим Аьбдулмуслимовлул, цалчин школалийн нанисса чIивитIул кагу дургьуну, дуклаки оьрчIахь насихIатругу буслай, цIусса школалийх экскурсия бувна.

«Образование» тIисса миллатрал проектрал лагрулий бувсса школа бур 3 зивулий­сса, 604 оьрчIансса кIантту бусса. Школалуву бур 2 спортзал, 2 лифт, актовый зал, библиотека, пищеблок, столовая, медициналул кабинет ва гьарта-гьарзасса чаннасса классру. Кабинетирттаву дур ттизаманнул мебель, интерактивный доскарду, компьютерду, музыкалул инструментру, спортрал кьай-кьуй ва цаймигу инвентарь. Сант дуну бакьин бувну бур школалул лагма-ялттусса кIанттугу. Шикку бур волейболданул, баскетболданул ва футболданул майданну, мюрщими ва хъуними оьрчIансса воркаут-площадкартту. ХIакьину шикку зий ур 54 пишакар.
Школа зий байбишиннинма тIивтIуну бур шиву «Музей боевой славы» ва Дагъусттаннал аслийсса культуралул мурцIу.

Ва кьини школалий тIиртIунни хасъсса аьралий операциялий Ватандалул ­мурадру буручлай чувшиврий жанну дуллусса Аьрасатнал Вирттаврал НурмахIаммад ХIажимахIаммадовлул, Михаил Абраменкол ва ­Руслан ­Кьурбановлул «Вирттаврал ­партарду».
Хъуними классирттаву дирхьуна оьрчIру патриот зумуну, кулпатравусса багьу-бизулул кьадру-кьимат буну тарбия баврин хас дурсса къучагъшиврул дарсру.
Паризат НурмахIаммадовал бувсуна, Хъун дяъвилул шиннардий ва цIанасса ппурттуву душманнайн данди бавцIуну, чувшиврий жанну дуллусса жула Вирттаврая ва миннал дурсса къучагъшивурттая.

Вай дарсирдай гьуртту хьуна Аьбдулмуслим Аьбдулмуслимовгу.
Ва кьини премьер-министр­нал лавайсса кьимат бивщуна школалул коллективран.
Букъавсун битан къабучIи­хьунссар, школа тIивтIуну махъ, Аьбдулкарим Айгуновлул сипталийн бувну, хасъсса аьралий операциялий гьуртту хъанахъиминнал ниттихъан, кулпатирттан тIутIал кацIру буллушиву. Директорнал кабинетраву тIутIал кацIру буллуна 50-нния ливчусса ниттихъан.

Аьбдулкарим Айгунов цува каялувшиву дуллалисса школалул цIа-кьини бюхттул дан хIарачат буллалисса, унгу-унгусса педагог ур. ХIакьину ванал каялувшиндаралусса школа республикалул хьхьичIунсса школардал сияхIрай бур.
ЧIявусса къайгъурду бусса школалул даву хьхьичIунну дачин даву бакъассагу, Аьбдулкаримлул хъуннасса гьурттушинна дуллай ур хасъсса аьралий операциялий Ватандалул мурадру буручлачисса аьралийтуран гуманитар кумаг бавриву.

Имара Саидова