* * *
Дагъусттаннал бакIчи Сергей Меликовлул Строительствалул координациялул штабрал заседаниялий баян бунни Ххувшаврил 80 шинал юбилейрал ва Ватан Дуруччул шинал лагрулий МахIачкъалалив чIал къавхьуну бацIан бувантIишиву Аьрасатнал Виричув, 1945-ку шинал Берлиннай Рейхстаграй Ххувшаврил Ттугъ гьаз бувминнавух ивкIсса АьбдулхIаким Исмяиловлул бюст.

* * *
Москавуллал Киевский вокзалдания сукку хьунни Аьрасатнал Федерациялул агитациялул ва пропагандалул поезд. Апрельданул 19-нния июльданул 3-ннийн бияннин, 75 гьантлул дянив, ва поезд биянтIиссар билаятрал 61 субъектрайсса 75 шагьрулийн ва шяравун. Ва хъанахъиссар Аьрасатнал Федерациялул Обороналул министерствалул ва «Аьрасатнал муххал ххуллурду» ОАО-лул цачIу щаллу дуллалисса «Единство в памяти. Сила в подвиге!» тIисса акция. Ванил сиптачитурал мурадну бур армиялул ва халкьуннал цашиву ккаккан даву, тарихрал фальсификациялийн къарщину бацIаву, билаятрал ЦачIун був гужирдал ккаккияртту чIалачIи даву.
Агитациялул поезд сакин хьуну бур 8 тематикалул вагондалия: Сухопутный аьралуннал, Воздушно-космический гужирдал, Воздушно-десантный гужирдал, Аьралий-хьхьирил флотрал ва цаймигу. Вай бакъассагу, ваний дур СВО-лул зоналий жулва аьралуннал душманнаща зерххусса трофей техникалул куцру бусса платформардугу, мукунма бавцIусса кIанттурдай музыкалул программа ккаккан дуллантIисса творчествалул коллективрду бусса платформа-сахIнагу. Поезд бавцIусса гьарца станциялий дуллантIиссар патриот зумунусса акцияртту.

* * *
МахIачкъалалив Республикалул оьрчIал пульмонологиялул центрданий хьунни оьрчIал майдан ва хъин бай физкультуралул зал тIитIлатIисса шадлугъ. Вай тIивтIуссар Дагъусттан Республикалул Халкьуннал Мажлисрал депутат Мухтарпаша Умахановлул кабакьаврийну. Ванайн вайннул хIакъиравусса тавакъюращал бувккун бивкIссар Центрданул хъунмур хIакин Жавгьарат Исяева. Шиккун аьркинмур, депутатнал тавакъюрайн бувну, щаллу дурну дур «Черномортранснефть» идаралул ва «Транснефть» компаниялул.

* * *
Ва шинал «Россети Северный Кавказ» – «Дагэнерго» ПАО-лул пишакартурал дух дурксса токрал ххаллал 683 км да­ххана дувантIиссар. ВайннуцIун дархIусса давуртту щаллагу республикалий дуллантIиссар, хъунмурчIиннив – Ахттиял ва Хайдакьуллал (Кайтагуллал) районнай.
* * *
Ттигъанну жула республикалул районнай ва шагьрурдай, хъунма марххала ва гужсса гъараллу сававну, ттукI бакъа ливчIсса 65 кIанай, багьайсса давурттугу дурну, инсантурал къатравун чани ва гъилишиву зана дунни «Дагэнерголул» 160 пишакарнал ва техникалул 70 единицалул.
* * *
Дагъусттаннай гид-экскурсоводтурал аттестациялул кIилчинмур этап дуллай бур. Аттестациялул комиссиялул бакIчину ур республикалул туризмалул ва халкьуннал художествалул промыслирдал министр Эмин Мерданов. КIилчинмур этап дурхIуминнан булунтIиссар аттестатру ва хасъсса карточкарду. Гидтал цивппа ласунтIиссар экскурсоводтурал Цасса федерал реестрданийн. Ларгсса шинал 70 инсаннал аттестация дурссия.

* * *
Майрал 15-17-нний Каспийскалий «Анжи-Ареналий» ятт­ил ва цIурттал ХХV Аьрасатнал выставкалий гьуртту хьунтIиссар жулла республикалиясса 20-нния лирчусса хозяйствартту.

* * *
МахIачкъалалив «Турбо Фест» фестивальданий шадлугърал тагьарданий тIиртIунни туристътурал сезон. Фестиваль нанисса кIивагу гьантлий Пушкиннул цIанийсса кIичIираву мяйжаннугусса байран дия, балайрдащалсса, къавтIавурттащалсса, дуки-хIачIиялущалсса. Инсталляциярттай ккаккан буллай бия жула республикалул миллатирттал авадансса тарих, культура.

* * *
Дагъусттаннал паччахIлугърал университетраву хьунни «Студенческая весна ДГУ» цIанилусса гала-концерт. Ваний гьуртту хьунни ва шадлугърал этапир­ттай ххув хьусса язими командартту. Гьашинумур «Студентътурал инт» хас дурну дия Бюх­ттулсса Ххувшаврил 80 шинан. Тарихраву ца яла чIявусса оьтту экьибувтIумур дяъвилий ххув хьун совет халкьуннал дурсса къучагъшивурттаясса ихтилат бунни ДГУ-лул ректор Муртазааьли Рабадановлул.
Ва кьини язиминнун ккалли бувсса номерду ккаккан бувантIиссар майрал 21-нний хьунтIисса «Студенческая весна – 2025» республикалулмур фестивальданул гала-концертрайгу.

* * *
МахIачкъалалив «Труд» стадиондалий хьунни коляскарттай заназисса, цIуллу-сагъшиврул ссуссукьуминнал дянивсса «Заезд-2025» тIисса цIанилусса бяст-ччал. Вайннуй гьуртту хьунни 28 инсан. Бяст-ччаллал сиптачину хьунни Дагъусттан Республикалул Жяматийсса палата.
ХIадур бувссар
Бадрижамал Аьлиевал