Гьантлия гьантлийн, шиная шинайн жулла республикалул хъун шагьрулул кIичIирттаву автомобиллал пробкарду чIяву хъанай бур, ссятру хъанай дур инсантал даврийнгу, шаппайнгу биян. Ва кIанттух къулагъас дунни Республикалул бакIчи Сергей Меликовлул. Ванал каялувшиндаралу ва масъала ххал бигьинтIиссар шагьрулул мэргу, Минтрансрал каялувчигу гьурттусса совещаниялий.

***
Цала даврил аьрххилий Дагъусттаннайн увкIсса Аьрасатнал энергетикалул министрнал хъиривчув Петр Конюшенко республикалул подстанциярттал тагьарданул хъирив лавунни. Хъамаличу ивунни республикалул яла хъуними подстанциярттавасса кIиннийн – «Завод точной механики» ва «Приморская».

***
Аьрасатнал просвещениялул министр Сергей Кравцов жула республикалийнсса аьрххилул лагрулий ивунни ДГПУ-лувун – Р. ХIамзатовлул цIанийсса Дагъусттаннал паччахIлугърал педагогический университетравун, ххал бунни вузрал кIулшивуртту дулаврил ва инновациялул майданну, яхши-хаш бунни студентътуращал. ДР-лул ХIукуматрал председательнал хъиривчув Муслим Телякавовлущал ва кIулшиву дулаврил ва элмулул министр ЯхIия Бучаевлущал архIал дирхьунни тIутIив «Педагогнан ва наставникнан» гьайкалдануцI.

***
Махъачкъалаллал вокзалданийн бувкIунни ретропоезд «Победа» – Буттал кIанттул цIанийсса Хъунмасса дяъвилул чIумуясса тарихийсса состав. Ва бучIавривун шикку ккаккан дунни дяъвилул шиннардицIунсса концертрал программа.

***
Дагъусттангу гьуртту хьу­нни щалагу Аьрасатнал «Тотальный диктант-2025» акциялий. ЖучIара ва акция дунни Республикалул оьрус мазрал ва культуралул центрданул. Ванивух гьуртту хьунни 20-нния ливчусса муниципалитетру. Тарихраву цалчин ва акциялий гьур­тту хьунни диннал сакиншиннардал вакилтал: Республикалул Муфтият, Православ епархия ва Ягьудинал община.
***
Майрал 24-нния тиннай «Уральские авиалинии» авиакомпаниялул цIу лаган дуллалиссар Екатеринбурграя МахIачкъалаливсса рейсру. Екатеринбурграя МахIач­къа­лаливсса билетрал багьа бур 7,8 азарда къуруш, МахIач­къалалия Екатеринбурграйн – 11,8 азарда къуруш.

***
МахIачкъалаллал Ленинский прокуратуралул судрайн тIайла дурккунни къатри дуллалийни мюхчаншиврул тIалавшиннарду къадурурччусса строительнал цIаницIун дархIусса уголов дело. Ванал къатри дурну махъ дукъаркьун кьадиртсса фанера мурчал ларсун бивкIуссар хъамитайпа.

***
Каспийскаллал шагьрулул судрал хIукмулийн бувну, 3 шин дуснакьрал танмихIран ккаккан дунни 10 шинавусса цилва душ батлай бивкIсса, ванил цIуллу-сагъшиврийн дянивсса кIушиврул зарал биян бувсса хъамитайпалун.

***
МахIачкъалалив Дусшиврул къатраву тIиртIунни ляличIисса оьрчIал дирхьусса суратирттал «Защитники Отечества» тIисса цIанилусса выставка. Ва хъанахъиссар «Тепло наших рук» социал проектрал лагрулий ва Бюхттулсса Ххувшаврин 80 шинангу, Ватан дуруччул шинангу хасну.

***
Ттигъанну кIива «Динамо» клубрал (МахIачкъалаллал «Динамо» футболданул школа ва Москавлийсса «Динамо») дянив уртакьшиврийсса зузаврил кьутIи чирчуссия. Ванил лагрулий МахIачкъалаллал футболданул школалул каялувшиндарал цалва чIава футболистътуран мюнпатрансса личIи-личIисса хьунабакьавуртту дуллалиссар. Ва ххуллухь ва школалул вратарьтуращал хьунаакьин, мастер-класс ккаккан буван увкIунни «Динамо» Академиялул Ульяновскалийсса Л.И. Яшиннул цIанийсса филиалданул директор Дмитрий Яшин. Шиккува кIицI лаган, ва МахIачкъалаллалмур «Динамо» командалувугу ттуплий уклай ивкIссар.
Лажин хIадур дурссар

Бадрижамал Аьлиевал