Дагъусттаннай 2024-ку шиная шиннай дуллан бивкIунни цIусса бусравсса цIа – «Заслуженный журналист Республики ­Дагестан» тIисса. Ва цIанин лайкь хьусса цалчинминнал кьюкьлувух ур жула лаккучу, «Дагестанская правда» кказитрал редакторнал хъиривчу, Аьлил арс Ширвани Айгунов.

Ванал цила чIумал къуртал бувну бур Гъумучиял школа. 2004-ку шинал увххун ур ­Дагъусттаннал паччахIлугърал университетрал филологиялул факультетрал журналистикалул отделениялийн. 2009-ку шиная шинай зий ур «Дагправда» кказитрай.
Ширвани ур дакI хъун дакъасса, аьчухсса, кумаг бан аьркиннан мудан ка тIитIайсса, чIарав ацIайсса инсан. Ванал чIявуну дакIнин бичай Гъумучиял школалий цахьра дарсру дихьлай бивкIсса учительтал: Будайчи МахIаммадаьлиевич, Аьйшат Аьлиевна, Барижат Оьмариевна, Ума Шяъбановна, Зугьра Рамазановна, Ххадижат Ситтикьовна, Асият Юсуповна (цалла нину).

Нину дакIнин дутлай, Ширвани тIий ур:
«Ттун нину оьрмулуву эбратну хьуссар. Ниттил дишайссия тарихрал ва обществознаниялул дарсру. ТIалавшиннагу хъуннасса дикIайва – циятурассагу, учениктураяссагу. Ттунгу жавабраха лавхьхьусса бакъа кьимат къабишайва. Ниттин ччай бия ттуяту ххуйну дурккусса специалист хьуну. Нагу, туну, хIарачат бав ниттил тIийкунсса дуккаву дан. Ххарину духьуви тIийгу ура ниттил рухI ттул даврия ва ттуя ххуймур баллай».
Цанна дуллусса хIурмат бусса цIа Ширвани хIисав дуллай ур цува зузисса щалагу редакциялун дуллушиврун. Барчаллагьрай ур хьхьичIавасса ва цIанасса цала редактортурайн – Раджаб Идрисовлуйн ва Бурлият Токболатовайн.
Ширвани, цал ттигу тикрал бан, инсаншиврул хъунмасса бутIа ­буллусса гьалмахчу ур.
Барча, Ширваний, вил гьунарданун бивщусса лайкьсса кьимат! ЧIа тIий буру вин ялунмайгу цIу-цIусса тIайлабацIуртту!

ХIусайн Давыдов,
ш. ЧIурттащи