Ва ххуллухьсса ттул ихтилат «Молодежь Дагестана» кказитрал редакторнал хъиривмур, Аьрасатнал Журналистътурал союзрал член, ЦIуссачIурттащиял шяравасса Аьбдуразакьлул ва ДучIиннал шяравасса Зубайдатлул душ Оксана Къушиеваяр. Жула учай: «Ца гьунар буманаву чIявусса цаймигу буссар», – куну. Вай махъругу ванин хъинну гъансса бур.
Тамашасса ва бигьа бакъасса хьуну бур Оксанал журналистикалувунсса ххуллугу. ЦIуссалакрал райондалийсса ЦIуссачIурттащиял шяраву хьхьичIунсса хIасиллай школагу къуртал бувну, ва дуклан бувххун бур ДГПУ-лул байбихьулул классирттал факультетрайн.
– На 9-мур классраву дуклакисса чIумал, ттул хъунмур ссил, Къиргъул, мусил медальданий школа къуртал бувна. Буттал му ттун эбратну бивхьуна. Яла увкуна: «Инагу ванил кунма школа къуртал бан аьркинссар», – куну. Буттал махъру ттун хъинну бювххуна. Нагу арцул медальданий школа къуртал бувссия. Му ппурттуву бувчIуна ттун, ччан бикIарчан, дан къашайсса цичIар дакъашиву, – буслай бур Оксана.
Ванил чирчусса сочинениярттал дуклаки оьрчIал дянив баян бувсса конкурсирттай мудан хьхьичIунсса кIанттурду бугьайсса бивкIун бур.
Вузравугу ва преподавательтуран ххирасса бивкIун бур. Цинярда экзаменну ва зачетру сессия байбишиннинна дулайсса диркIун дур.
Мукьилчинмур курс къуртал байхту, Оксана цила ласнащал бивзун бур Москавуллал областьрайсса Солнечногорск шагьрулийн. Хъунмур душгу ванил шикку бувну бур. Душнин кIира шин хьуну, лябувккун махъ, вагу садикрайн булун, циннагу даврих луглай бивкIун бур.
– Ччя-ччяни дакIнин багьайва школалий дуклакисса чIумал пикри бакъулий жува бувчIучIан лагайсса бивкIсса: «Ина бахтти бусса билет буххин най бура, хъун шагьрулий ялапар хъанан тIий бура», – тIисса махъру. Мукун хьугу-хьуна, – тIий, хъягу-хъяй, буслай бур Оксана. Гьай-гьай, байбихьулий бигьану къабивкIун бур хъун шагьрулий ялапар хьун.
Ца ппурттуву, Солнечногорск шагьрулийсса оьрчIал багъравун душ кьамул бува тIий лавгун бунува, Оксанахь цIувххуну бур: «Бурив вил педагогикалул ларайсса кIулшиву ларсъсса диплом?» – куну. Вуз къуртал бувсса диплом бушиву бусайхту: «Жу вил душ садикрайн кьамул банну, агарда инава жучIа тарбиячинал кумагчину зун бучIарчан», – куну бур. Укун Оксанал цинна давугу ляркъуну дур, душгу садикрайн буллуну бур.
Шин ххишалагу дурну дур Оксанал садикрай зий. Зун гъира-шавкь дусса, бюхъу-гьунар бусса душ ччяни ххира хьуну бур тарбиялувтуран ва архIал зузиминнан. Шикку зий бунува Оксана бувххун бур делопроизводствалул ва компьютердал оператортурал курсирдайн. Вайгу ванил марцIсса ххювардай къуртал бувну бур. Даврий оьннасса чIун дирияйхту, компьютерданух щябивкIун, макьалартту, шеърирду чичлан бикIайсса бивкIун бур. Та ппурттуву Оксанал чивчусса шеърирду бивщуну бур Солнечногорскаллал дахьва чичлай байбивхьусса шаэртурал сборникрай.
Ца чIумал ванил цалчин цила чирчусса макьала ккаккан дурну дур даврил уртакьтуран. МаслихIат бувну бур райондалул кказитрай рищун дулунсса. Шикку зузисса хIаллай ванил журналистикалул чулухунмайсса гьунаргу, гъирагу хъиннува ялун личлан бивкIун бур. Солнечногорск шагьрулул «Сенеж» тIисса кказитрал редакторнащал, тикку зузисса профессионалтуращал кIул хьуну махъ ванихьхьун заданияртту дуллан бивкIун бур. ДачIи шинава Оксана штатрай бакъасса корреспондентну бивтун бур. Яла, хъунма хIал къавхьуну, корреспондентну кьамул бувну бур.
«Сенеж» кказитрал профессионалтуращалсса даврил опыт ванин журналистикалул даража гьаз бувансса школану хьуну бур.
Шикку зузиссаксса хIаллай Оксанал дурну дур «Белое солнце пустыни» тIисса киноравусса хъунама геройнал роль дургьусса актер Анатолий Кузнецовлущалсса, артистка Марина Хлебниковащалсса ва цаймигу машгьурсса инсантуращалсса интервьюрду. «Илчи» кказитрайгу рирщуну дуссия Оксана Къушиевал Дагъусттаннал эстрадалул цалчинсса балайчи, хIакин Эльза Рамазанова дакIнин бутлай чирчусса «Лакрал эстрадалул тIавуслелуххи» тIисса, хъинну асар хьунсса макьала.
2007-ку шиная 2014-ку шинайн бияннин Оксана зий бивкIун бур «Сенеж» кказитрай.
Шикку хьусса даврил опытгу, хьхьичIунсса инсантуращал кIул шавурттугу дучIи лярхъуну дур ванин Москавлив бизнесрал даву тIитIлатIисса чIумал.
2011 шинал Оксанал хIасул дурну дур интернетрай маша байсса платформа. Му диркIун дур интернетрайн личIисса вихшала дакъасса чIун. Оксанал, ва платформалийхчIин маша буллансса хъунисса предприятиярттал ишбажаранчиталгу цачIун бувну, маша буллалисса бизнесгу куцливун руртун дур. Ссаха зурчагу, ванил цила дайдирхьусса даву дузрайн дуккан дайсса диркIун дур.
ЦIушиннарду ва ххуй чулиннайсса дахханашивуртту ванил гьарица бивзсса шаттираву дур.
2017 шинал цила ласнащал ванил Москавлив тIиртIуну дур «Баркер» тIисса, усру, сумкарду бакьин байсса мастерскойрдал сетьру. Вайннащал хIала-гьурттуну зий бивкIун бур Москавуллал ца яла хъунмур химчистка. Ва даву нирхиравун рутлай, клиентътал рязи буллай, биялсса захIмат бивхьуну бур.
Билаятрай пандемия дайдирхьусса ппурттуву вайннал бизнесрайнгу щавщи бивну бур.
– Пандемиялул чIумал чIявуми инсантал цала-цала минардайн лавгун, Москав бачIва хьусса чIун дия. Доход къананисса чIумал, арендалухсса бикIу, зузалтрансса бикIу багьа булун бигьану бакъая. Та ппурттуву чIявусса инсантурал бизнесран зараллу хьуна. Му чIумал Аллагьнал жугу ххассал бувнав. «Ца заралгу, ца хайрди» тIисса бур халкьуннал учала. Бухьунссия жунгу Ватандалийн бучIансса кьадар, – тIий бур Оксана.
Буттал аьрщарайн зана шавугу ванин барачатну дарцIуну дур. Ших бувну бур чIанма-чIивимур душ Сарижат.
Оксанал кIулшивурттал даража чIалай, Дагпечатьрал хъуниминнал ва бивтун бур менеджернал даврий. Шикку Оксанал сипталийн бувну цалчин тIивтIуну бур кказит, журналлу, луттирду бусса, шиккура электрон журалий подписка дан бюхъайсса ва цаймигу къулайшиннарду дусса цIусса форматрал киоскру. Дагпечатьрай чIирисса чIумул мутталий Оксанал дурсса цIушиннарду ва хьхьичIуннайшивуртту хIисав хьуну, «Молодежь Дагестана» кказитрал редакторнал хъиривчуну зун тIалав бувну бур.
Ванил хIарачатрайну «Молодежь Дагестана» кказит байбивхьуссар «Wildberries» тIисса Аьрасатнал маркетплейсрайхчIин буккултрачIан биян буллай. Кказитрал даву хьхьичIуннай давриву бивхьусса захIматрахлу Оксана лайкь хьуну бур ДР-лул ХIукуматрал чулухасса ХIурматрал грамоталун.
Ванил бюхъу-бажардания чичлачийни, букъавсун къабучIир ванил мархрая. Оксанал ппу Аьбдуразакь чIярусса шиннардий зий ивкIун ур ЦIуссалакрал райондалийсса ЦIуссачIурттащиял совхозрал гаражрал хъунаману ва махъсса шиннардий ишбажаранчину. Вайннал кулпатраву, буттал кьянкьасса низам дирхьуну, лакку мазрай бакъа гъалгъа тIунсса ихтияр къадиркIун дур. Оксанал нину Зубайдат ЦIуссачIурттащиял школалий учительну зий бур. Аьбдуразакьлулгу, Зубайдатлулгу мукьвагу оьрчI ххуйсса тарбия ларсъсса, итххявхсса хьуну бур.
ЦIана Оксана цила ласнащал тарбия буллай бур шанма оьрчI.
Оксанал хъунмур душ гьашину кIира сменалий бивкIун бур Къиримнавусса «Артек» тIисса оьрчIал центрданий вожатыйшиву дуллай. Школалий дуклай бунува, цал кулинариялул блогершиву дуллай, яла личIи-личIисса программарттал курсру лахьлай, хIарачат буллалисса душ бивкIун бур. ЦIана ва дуклай бур ДГПУ-лул художественно-графический факультетрай. ОьрчI дуклай ур ЦIуссачIурттащиял школалий.
Гьай-гьай, бувчIлай бур хьхьичI бивхьусса мурадирттайн бияншиврул хъунмасса захIмат бишин аьркиншиву. Оксанал исват бунни, ччан бикIарчан, захIматрайнугу, хIарачатрайнугу ччимур лахъазан лахъан бюхъантIишиву.
Имара Саидова
