Дяркъусса, пачру лахълахъисса чIумал, цIу ларчIсса ишру чIявуну хъанай бур, гъили байсса системарду саргъунну зий дакъашиву, лахъайсса оборудование тIайла дакъа дишаву ягу пачру аьркинсса куццуй къалахъаву сававну.
ЦIана, токрай лахъайсса оборудование ва пачру хъиннува чIявуну ишла буллалисса чIумал, цIу ларчIсса ишругу ххишаласса хьунсса нигьачIаву дур. Пачру лахъаннин цал ххал бан аьркинссар ми цивппа ва вярчIурду саргъунну бурив, марцI бан аьркинссар кIарацIа, хъякрурду духьурча, ми дащан аьркинссар аьрщарал ва къундалул чяплий, кIяла бан аьркинссар чардагърайсса, магъуйсса ва ялун ливчусса турба. Шанма зуруй цал къатравусса пачурдил вярчIурду марцI бан аьркинссар кIа дуккан дурну. Пачурдил ялув ягу чIарав цIу лачIайсса цичIар дишин къабучIиссар. КъабучIиссар миннуйн дирчуну ягу чIарав янна кьакьан дуллан.
КъатрацIух цIу ларчIсса ишру мукунма хъанай бур токрай пачру цIарая мюхчан шаврил тIалавшиннарду къадурурччуну ишла буллалисса чIумал.
Токрай пачру ишла булланнин ххуйну дуккияра инструкциялийсса тIалавшиннарду. Ччя-ччяни ххал дувара токрал ххаллу, розеткартту, щитокру ва розеткалувун дучIайсса вилкарду саргъунну дурив. Мабитару электрообогреватель хьхьувай лавхъун, маишла бару му янна кьакьан дан. Мабишару токрай пачру лакру, сир, растворительлу ва цаймигу цIу лачIун бюхъайсса хьюмушия дусса кIанттурдай, мукунма чIявусса буза бусса къатлуву.
Дяркъу шайхту, токрайсса приборду ххишалану ишла дуллай бур, мунийну токрал ххаллайнгу гуж багьлай бур. Ми дух хьуну ягу хъунмасса хIаллай гуж багьну зий душиврийн бувну, изоляция ссурссуну, кутIасса замыкание хъанай дур. Му сававну, хъанай дур пожар. Мунияту, цIу лачIаврия мюхчан шаву мурадрай, инсантал ялапар хъанахъисса къатраву дишин аьркинссар цIу ларчIсса кIул шайсса ва леххаву рутайсса приборду (автономные пожарные извещатели). Дакьин дан аьркинссар токрал ххаллу, выключательлу, розеткарду.
Саргъунну бикIан аьркинссар пачру ва электроприборду. Ми цивппагу бивхьуну бикIан аьркинссар цIу къалачIайсса затирттай, мебельдания ва занавескардая архну. Токрай лархъсса приборду ургъил дакъа дитан къабучIиссар. КъабучIиссар ца сетьравун хъунмасса гуж бусса кIира-шанна прибор дучIан. Миннул токрал сетьрайн гуж бутайссар. КъабучIиссар саргъунну къазузисса ягу жува бувсса токрайсса пачру лахъан. Шаппату кьатIув букканнин ххал дувара газрайсса ягу электричествалийсса приборду лерщун дурив.
ЦIу ларчIсса кIул шайхту, баян бувара вай телефоннайн: 01, 101 ягу экстренный оператив къуллугърал номерданийн: 112.
Андриана Аьбдуллаева
