Цалчинмур ЦIувкIуллал шяраваллил зума-къирагърай, Совет Союзрал кIийла Виричу АхIмад-Хан Султаннул суратгу дусса, цIагу чирчусса монумент (стела) дуссар.

Махъ ппурттуву чичругу сайки лирххун, сурат дусса плакатгу мадара дух дурккун дия.

Уттигъанну, шяравун биян лавгсса кIанттай, хIисав хьунни стела цIу дуккан дурну душиву. Виричунал суратгу пар-пар тIий, шяраваллил цIагу цIай буну, яргну чIалай. Ва давугу дурну дур ХIасан ва Жаннат Абакаровхъал кулпатрал. Вай ЦIувкIрав бувсса, хъуни хьусса бакъанугу, (Жаннат Варайннал шяравассар), Лакку кIанугу, шяраваллурдугу ххирасса, ­цалва наслугу вава ххуллий тарбия буллалисса бур.

«ЖучIа мудан ичIува шай патриот асардал хIакъиравусса гъалгъарду. Жулвами нитти-буттахъал жувура буттал кIанттух ччаву дирхьусса кунма, жугу хIарачатрай бикIару жулвами оьрчIавугу вара ччаву дишин. ДукIу ЦIувкIрав лавгсса ппурттуву, ва стела укунсса даражалий душиву къаххуй бивзуна жул кулпатран. ХIукму бувссия, лявкъуну ххуйсса типографиягу, цIу дуккан дуван, ххуйну цIакь дуван», – тIий бур Жаннат – ЦIувкIуллал лайкьсса жалин.
Гьарманал укун ца-ца ххуйсса даву дулларча, чIаланну хьхьичIунмай хъит учинссия жулва оьрмулул багьу-бизугу. Мяйжаннугу, бакIххуллийсса стела хъанахъиссар цумур-цагу шагьрулул, шяраваллил дагьани, визитная карточка.

Ва так шяраваллил цIанил хIакъиравусса информациялул лишан дакъар, ва тарихрая ва цIанасса заманалия, шяраваллил агьулданул хIакьинусса кьинилия бусласисса лишанни. Муниятур мюрщисса шяраваллал агьалигу, гьайбат дуну чIалачIисса стелагу дацIан дурну, архитектура авурсса, хIатта чани буллалисса подстветкардугума дуллалисса.

Барчаллагьри Абакаровхъал кулпатран, шяравун буххай кIанайсса кIа стела лащинсса даражалий душиву кьамул къабувну, хъирив бувккун, аьркинмургу цала харж дурну, цIу дуккан дурсса. Шяравун нанинахьхьун бусалардавун агьсса лётчик ххуйсса суратрая ссалам буллали увсса. Ва ялагу, октябрь зурул 25-нний АхIмад-Хан Султаннун 105 шин хъанахъисса юбилейгу духьувкун, дикIувча юбилейрайнсса чIири-хъунсса бахшиш хIисаврайгу.

ПатIимат Рамазанова