Вай гьантрай Ккуллал райондалул администрациялул бакIчи Шамил Рамазанов хьунаавкьунни Ростов-на-Дону шагьрулий ялапар хъанахъисса, Хъусращиял шяравасса Нариман Ванатиевлущал. Хасъсса аьралий операция байбивхьуния шинай Нариман уссар нитти-буттан ва мачча-гъанминнан ятIа-тIар бакъа бакъа хьусса аьралийтал лякъин ва ми цала Ватандалийн тIайла буккан кумаг буллай.

ХьхьичIава Ростоврай Нариман уссия Дагъусттаннал диаспоралул председательну. Ванал цала кIулцириннайхчIин, чIявуну цала харжлугъгу буккан бувну, лявкъуну бур хасъсса аьралий операциялий жанну дуллусса цикссагу аьралийтал. ЦIанасса ппурттуву иш мукун багьну бурхха, щукру тIун багьлай бур аьрщараву дишинсса кьаркьала дириярчангума.

ХIакьинусса кьини Нариманнуйн барчаллагьрай бур, Ккуллал райондалия бакъассагу, щалагу Дагъусттаннаясса аьралийтурал мачча-гъанми. Ва ххишала дакъа бусравсса даву даврихлу Нариман лайкь хьуну ур СВО-лул Ветерантурал союзрал чулухасса медальданун, «Сила матерей» МОО-лул, ДНР-лул, ЛНР-лул каялувчитурал чулухасса Барчаллагьрал чагъардан.

Ккуллал райондалул жяматрал ва хасъсса аьралий операциялул гьурттучитурал кулпатирттал чулуха Нариман Ванатиевлухь барчаллагь увкунни Шамил Рамазановлул.
«ДакIнийхтуну асар хьунни ина дуллалисса чумартсса даву.
ХIакьинусса кьини ина кунмасса инсантурал дуллалисса давурттан багьа бакъассар. Зу кунмасса патриотътал махъ буссаксса, ххувшаву ласунсса вихшалагу цIакь хъанай дур. ЧIа тIий буру вин гьарица ишираву тIайлабацIу», – увкунни Шамил Рамазановлул.

Имара Саидова