Сентябрьданул 15-нний, Дагъусттаннал халкьуннал Цашиврул кьини, «Россия – моя история» тарихрал паркраву Дагъус­ттан Республикалул бакIчи Сергей Меликовлул дагъусттанлувтуран дуллунни паччахIлугърал наградартту.

ПаччахIлугърал наградартту ларсминнавух бия ЦIуссалакрал райондалул бакIчи МаматIи ХIамзатов, Дагъусттаннал Халкьуннал Мажлисрал кIанттул цала каялувшиндарал комитетрал председатель Артур Исрапилов, ЦIуссалакрал райондалул Счетная Палаталул председатель Гайирбек Мусаев, Чукотскаллал автономный округрал УФАС-рал хъунама Тамерлан Оьмаев. Вайннан дуллунни «За проявленное мужество» медаллу. 25 шинал хьхьичI райондалийн ххявхсса террористътурал кьюкьри ххит давриву вайннал гьурттушиву дуссар.

Шадлугъ хас дурну дия Да­гъусттаннал халкьуннал Цашиврул кьинилун ва Дагъусттаннайн ххярхсса ярагъуннищалсса чапхунчитурал кьюкьри ххит дуккан дурну 25 шин шаврин.
Шикку гьуртту хьунни Аьра­сатнал Президентнал Ухссавнил Ккавкказнал федерал округрайсса вакил Юрий Чайка ва Аьрасатнал Президентнал Администрациялул каялувчинал хъиривчу МахIаммадссалам МахIаммадов.
Аьрххилул бакIрай полпреднал Сергей Меликовлущалсса хьунабакьаврий ххал бивгьунни социал-экономика хьхьичIуннай шаврийн багьайсса агьамсса суаллу, ххал диргьунни миллатрал проектру кIантту-кIанттурдай щурущи даврил хIасиллу, хасъсса аьралий операциялий ватандалул мурадру буруччаврил ххуллий талатиминнан ва вайннал кулпатирттан кабакьу бавринсса чаранну.
«За проявленное мужество» медаллу ва Дагъусттан Республикалул ХIурматрал грамотартту дуллунни 60 инсаннан. Вай цинявппагу бур аьралитал, низам дуруччай органнал зузалт, летчиктал, цIуллу-сагъшиву дуруччаврил зузалт, хIакинтал, паччахIлугърал ишккаккулт ва 1999 шинал хьусса иширттаву ярагъ канил бувгьуну данди бавцIуну бивкIсса инсантал.
«Тарихраву чансса къавхьуссар Дагъусттаннал кьадар нигьачIавриву бивкIсса ишру. Зунттал билаятрал агьалинал цашиву, куннал кув бугьаву ва миллатирттал дянивсса дусшиву савав хьуссар Дагъусттаннал агьали захIматшивурттава буккангу, ттуршукурдай салкьи хьусса аьдатру дуруччингу», – увкунни Республикалул бакIчинал.
Цашиврул байран хIасул дансса гьануну хьушиву бувсунни оьнкьарахун бияннин янна-ярагъуннил балгусса 150 азаруннийн бивсса Надир-шагьнал ­аьрал ххит баву. Тай иширттая буслай бур халкьуннал эпос.
Тарихраву ливчIссар ватан дуруччаврил ххуллий дагъусттанлувтурал ккаккан дурсса чумартшиврул, чувшиврул, къучагъшиврул ва кьянкьашиврул яргсса мисаллу.
«Дагъусттаннал агьалинал Цашиврул кьинилул байран хIасул дансса пикри хьуссар 2010 шинал Дагъусттаннал халкьуннал шамилчинмур съездрай. Тай аьратталсса шиннардий ва байран чарабакъа аьркинну диркIссар, жула халкьуннан ятсса идеология ппив дуллалисса кюртти ххит бансса цашиврул лишан хIисаврай», – увкунни Сергей Меликовлул.
ДакIнин бивчунни 25 шинал хьхьичI хьусса ишру, чIурчIав дурунни Дагъусттангу, аьмну щала Ухссавнил Ккавкказгу бурусин къабитансса чаранну хьушиврий тай иширттаву да­гъусттанлувтурал ккаккан дур­сса чувшиву.
Муния махъ Сергей Мели­к­овлул, Юрий Чайкал ва МахIам­мад­ссалам МахIамма­довлул ххал дурунни «Август 99. У последней черты» тIисса мультимедий выставка.

Зулайхат Тахакьаева