Вай гьантрай Дагъусттаннай хьунни щаллагу дунияллул халкьуннал дянивсса «Дакьаву вил къатлун» тIисса цIанилусса динийсса форум. Ванил лагрулий республикалул вузирдаву студентътуращал хьунабавкьунни Аьрасатнал регионнал ва кьатIаллил билаятирттал муфтитал, аьлимтал, динчитал, билаятрал исламрал ва ххачпараснал хъунисса вузирдал ректортал.
Экспертътурал темардугу личIи-личIисса дия. Масалдаран, Дагъусттаннал паччахIлугърал университетраву ихтилатру бунни Аьрасатнал Азиатнал бусурманнал рувхIаний управлениялул хъунама Нафигулла-хазрат Ашировлул ва муфтинал хъунама маслихIатчи Ринат Насыровлул. Вайннал маслихIат бунни ппухълуннал мукъул хIурмат буну къуццу тIун.
Дагъусттаннал технический университетраву Татарстаннал муфти Камил-хазрат Самигуллиннул исламрал кьиматрайсса ххазинарду хьхьичIунну, Ватан ххирану яхъанан, кIулшивурттал хъирив багьан, чIун оьнна гьан къадуллан маслихIат бунни.
Дагъусттаннал гуманитар институтраву экспертъталну бия Москавуллал ва щалва Аьрасатнал Патриархрал вакил, иеромонах Григорий (Мутрусов), Якутиянал бусурманнал рувхIаний управлениялул муфтинал хъиривчу Нурудин Нурудинов ва Сулайман Стальскийл райондалул имамтурал председатель Шамил Оьмаров.
Москавуллал автомобильно-дорожный университетрал МахIачкъалаллалмур филиалдануву экспертътурал тема дия ихIсандалул фондирттал даврицIун дархIусса. Ихтилатру бунни Дальний Востокрал муфти Рамазан-хазрат Аьлиевлул, Краснодардал Армавир райондалул имам Мурат Хуштовлул.
Дагъусттаннал аграрный университетраву (ДагГАУ) форумрайн бавтIцириннал ххал диргьунни кулпатирттал цIакьшиву билаятран агьамсса душиврул тема. Спикерталну бия Къалмукьнал муфтинал хъиривчу Ражаб Зиявуттинов, Адыгеянал муфтинал хъиривчу Азамат Хуштов, Дагъусттаннал муфтинал кумагчи МухIаммад МахIаммадов.
Укуннасса мероприятияртту хьунни Дагъусттаннал медициналул ва педагогикалул университетирттавугу. Аьмну – республикалийсса 11 вузраву.
МаркIачIан чIумал тIурча, МахIачкъалаллал хъунмайданнив хьунни 25 азара инсан гьуртту хьусса мажлис. Дагъусттаннал муфти, щайх АхIмад Апаннинал гьашину июнь зурул 23-нний хьусса терактраву ливтIусса полициянал зузалтрал кулпатирттан дуллунни чIивимур хIажлийнсса путевкарду. Национал политикалул ва диндалул иширттал министр Энрик Муслимовлул бувсунни Дагъусттаннал агьали аьдатрайсса диндалул ххуллий цIакьну бацIан аьркиншиврия, миллатру ва динну личIи къадуллай, уттиния тинмайгу бавкьуну яхъанан аьркиншиврия.
Муфтиятрал председатель Аьбдулла Салимовлул Аьрасатнал субъектирдал муфтитуран дунни дакIний личIансса бахшишру.
Камил-хазрат Самигуллиннул кIицI лавгунни мажлис бувсса кьини Дагъусттаннал муфти увсса кьинилийн тIайла дарцIушиву, дуллунни, барчагу увкуну, цала чулухасса бахшишгу.
Мажлисрал программа къуртал хьуна оьрчIи-кIурисса фейерверкрайну.
Ва мажлисрайн бавтIцири барча бунни Республикалул бакIчи Сергей Меликовлул цала Telegram-каналданий.
«Президентнал увкусса куццуй, Аьрасат цIакьсса ва бух буван къашайсса билаят буллалиссар жулла цашиврул. Жулва душманталгу нигьабувсъсса жулла цашивруятур, муниятур жува кIи-шан бищун буван хIарачат буллалиссагу. Амма миннал хIарачат ссайнчIав къабуккантIиссар. Жува ккаккангу буварду къабуккантIишиву. Кьуазара инсан, махъгу ца бувну, дакIругу ца дурну, хъунмайданнив уккаву – жулла цашиврул барашинни», – чичлай ур Меликов. Ва барчаллагь тIий ур муфтиятрахь ва хасну муфти АхIмад-хIажи Аьбдуллаевлухь, республика къачагътурая мурахас дурну 25 шин кIицI лаглагисса гьантрай дуваврихлу ва агьамсса форумгу, мудангу жагьилтуран ххуйсса тарбия дулаврил ххуллийсса даврихлугу.
Ва дунияллул халкьуннал дянивсса форумрал сиптачитал Дагъусттаннал муфтият ва Исламрал культуралул, элмулул ва кIулшивуртту дулаврил фондри.
ПатIимат Рамазанова
