Цашиврул тIинтту

Сентябрьданул 18-нний Москавлив «Русская песня» тIисса паччахIлугърал академический театрдануву лавайсса даражалий хьунни Дагъусттаннал Халкьуннал цашиврул кьинилун хас дурсса «Огни единства» цIанилусса концерт.

Ванийн бувкIун бия азаруннийн бивсса инсантал. Миннавух бия Москавливсса Дагъусттаннал Постпредствалул, жяматийсса организациярттал вакилтал, хасъсса аьралий операциялул гьурттучитал, Чачаннавасса, Ингушетиянавасса, Къабардин-Балкьарнавасса, Къарачай-Чаргаснавасса, Ставропольлал крайраясса ва Белгородуллал областьраясса хъамал.
Дагъусттаннал бакIчи Сергей Меликовлул цIанияту хъамал барча бунни Аьрасатнал президентначIасса Дагъусттаннал муданасса вакил Владислав Толстюклул. Ихтилат бунни ПаччахIлугърал Думалул депутат Султан ХIамзаевлулгу.
Бусравсса хъамаллуравух бия «Дагестан» Москавуллал культуралул центрданул президент Арсен ХIусайнов, летчик-космонавт, Совет Союзрал Виричу Муса Маннаров, ПаччахIлугърал Думалул депутатътал НурбахIанд НурбахIандов ва Жамаладин ХIасанов. Арсен Буйдалаевичлул барча бунни хъамал байрандалущал. КIицI лавгунни чIяву миллатру бусса Дагъусттаннан ва хъуннасса агьамшиву дусса байран хъанахъишиву, чIа увкунни гьарица дуллалимуниву тIайлабацIу. Муса Маннаровлул бувсунни укунсса мероприятиярттайн учIайшиву цала дустуращал хьунаакьин.
Концертрал лагрулий ккаккан дунни «Модерн» оркестрданул композицияртту, балайрду увкунни ва ххаллилсса къавтIавуртту ккаккан дунни Дагъусттаннал ва СКФО-лул регионнаясса эстрадалул артистътурал, оьрчIал ансамбльлал. Ахирданий Рукьият ХIамзатовал увкунни «Россия и Кавказ вместе навсегда» тIисса балай. ВаницIун бавзунни тамашачитурал. Мероприятиялул сакиншинначи хьунни Аьрасатнал президентначIасса Дагъусттаннал муданмасса вакилхана.
Андриана Аьбдуллаева