Дагъусттаннал паччахIлугърал университетраву дайдирхьуссар элмийсса проект «Каспий – Орбита» бартдигьаврил даву. Ванил гьанумур мурадгу республикалий цалчинсса дуккаврил спутник хIасул бувавур.
«Манаров-1» цIа дирзсса ва аппаратрал кумаграцIух, Дагъусттаннал дуклаки оьрчIан космосрал технологиярттащал зунсса сант дикIантIиссар.
Вузрал пресс-службалул кIицI лавгунни ва проект сийлийсса «КАК-2026» федерал конкурсрай ххув хьушиву ва «Космосрансса пишакартал» программалул лагрулий «Геоскан» тIисса компаниялущал уртакьну бартдигьинтIишиву. Бувсунни ва проектрал республикалул дуклаки оьрчIру кIункIу бувантIишиву аьламрал караматсса дунияллийн, элмийсса хъиривлаявуртту дуллан, космосрал ва Аьрщарал хIакъиравусса кIулшивуртту куртIгу, цIакьгу дуллан.
Космический аппаратрал бияла мяйжаннугу къачIивисса бур: хьхьирил жамирдал хъирив бацIангума хьунтIий бур, мукунма географиялул, геоинформатикалул ва экологиялул хъиривлаявуртту дуллан. Проектрал агьаммур даву ва хьхьичIуншиву хьунтIий дур Совет Союзрал Виричунал ва Дагъусттаннал цалчинма космонавт Муса Маннаровлул ца дирзсса аппарат хIасул баву.
Проектрал дайдихьугу хас дурну дур кIира агьамсса даталун: ДГУ-лун 95 шин шаврин ва космонавтнан цаннагу 75 шин шаврин.
Мероприятие тIитIлатIисса шадлугърай ректор Муртузяли Рабадановлул кицI лавгунни, щала региондалул тарихраву личIансса даврил дайдихьу дуршиву.
«ХIакьину жува буниялттунгу тарихрал цIусса лажин дайдирхьуссар Дагъусттаннал цалчинмур образовательный спутникран ххуллу буллусса. Жула машгьурсса космонавтнал цIа дирзсса ва проектрал масштабгу хъунмассар, кIира шинал мутталий зунтIиссар ваниха. Университетрал юбилейрангу мяъна куртIсса бахшишри, Муса Маннаровлул хIурматгу лахъну бушиву ккаккан буллалисса давур», – увкунни ректорнал.
«Манаров-1» спутникрал образованиялул, элмулул ва ларайсса технологиярттал дянивсса дахIавугу цIакь дувантIий дур.
Экологиялул институтрал директор Зарема Солтанмурадовалгу кицI лавгунни «Каспий- Орбиталул» лахьхьин буллалисса программарду чIярусса ва личIи-личIисса душиву, миннуя биялсса мюнпатгу бикIантишиву. Программалуву дур БПЛА-дащалсса ва 3D принтердащалсса давугу. Гьаннайсса, жагьилсса инсантуран ларайсса технологиярттал дунияллий цанмасса кIану лякъинсса ва бучIантIимуниву бутIа бишинсса кабакьу бувансса даву хъанай дур.
ПатIимат Рамазанова
