Вай гьантрай МахIачкъалалив хьунни UFС-лул хIала-ккаласса бияврил Республикалул турнир. Цала кIушиврул спортсментураву цалчинсса кIану бувгьунни Ккурккуллал шяравасса АхIмадлул ва Якьутлул арс Назир Чупаловлул. МуницIун ванал ияврил техникагу яла ххуймурну ккаккан дунни.
Спортрал ххуллул байбихьулий Назир лачIун буккаврихун агьну уссия, ва журалул спортрал тIиртIу турнирдай цимилагу ххув хьуссия. Махъсса ппурттуву ванан цала хIал, бюхъу хIала-ккаласса бияврил спортраву ххал бан ччан бивкIуна. Мунивугу ва къааьвкьунни. ЦIанасса бяст-ччал республикалул даражалийсса цалчинсса турнир хьунни ва гьуртту хьусса. КIилчинмур раундрай ванал бигьана ух унни цала муттаэ. Назир барчаллагьрай ур ва ххувшаву ласун цащала архIал захIмат бивхьусса тренертурайн ХIажимурад МахIаммадовичлуйн, АхIмад МахIаммадовичлуйн ва Шамил АхIмадовичлуйн. Цала ххувшавурив ванал хас дунни шанна шинал хьхьичI, оьзру хьуну, жагьилсса оьрмулуву дунияллия лавгсса ссурахъу Рамазан ХIажиевлун.
Спортрал итххяххаву Назирдун ирсирай дирсса духьунссар. Ванал ниттил ппу Илларбаг Аьбдуллаев чIярусса шиннардий Дагъусттаннал Педагогический институтрал физкультуралул кафедралул каялувчину уссия. Илларбаглул ппу Чупамилав (МахIамма) лечаврил, диск личаврил спортраву Ухссавнил Ккавкказуллал чемпионатирттай ххув хьуну ивкIссар. Спортраву, хаснува закканттай буккавриву, цIакьсса ивкIун ур ванал буттал ппу Зайналгу.
Назирдулгу уттиния тихунмайгу бюхттулсса ххувшавурттайну жува ххари булланссару тIисса умуд бур.
Андриана Аьбдуллаева
