Сентябрьданул 1-нний Цалчинсса занг рирщунни Дагъусттаннайсса цалчинми классирттавун нанисса оьрчIангу – 48 азара оьрчI республикалий цалчин щябивкIунни партардах. МахIачкъалалив – 17 азарунниха ливчусса.
Аьрасатнал федерал СМИ-лул цимилагу кIицI лавгунни школарду ва оьрчIансса багъру цIусса баврил ва бувми гьануцIакул бакьин баврил давриву Дагъусттан хьхьичI ххуттай бушиву. Махъсса шиннардий республикалий бувну бур 41 азара дуклаки оьрчIансса 110 цIусса школа. Мукунма бувну бур сайки 14 азаруннийн биявайсса кIантту бусса 94 оьрчIал багъ. Вай цIа дансса хIасиллур. ВайннучIава бишара капремонт дурсса 374 объект.
Хасну так ца 2025 шинал Дагъусттаннай 9 школа ва 2 садик цIу буккан бувну бур.
Сентябрьданул 1-нний тIурчарив, республикалий цIусса 14 школа ва 2 садик тIивтIунни. Вай циняв уттизаманнул кьяйдалийсса, гьартасса, къулайсса къатри дур. 2026 шиналгу школарду буллалаврил даву сантирай ва лябуккулий гихуннай дачин дувантIишиву бувсунни хIукуматрал вакилтурал.
«Молодёжь и дети» тIисса национал проектрал лагрулий Дагъусттаннай 8080 дуклаки оьрчIансса 12 школа буллалиссар ва 1070 оьрчIансса 6 садик, 604 оьрчIансса школа Ленинкантлив бувантIий бур, вайкссава оьрчIансса – МахIачкъалалив «Ветеран» микрорайондалий.
Укун ххуйсса ккаккиярттащал цIусса дуккаврил шин хьунадакьаврия ва ялунгу цIу-цIусса школарду ва садикру буллай бушиврия ххарину бур республикалул агьалигу.
ЛичIинура шадну ларгунни гьашинусса дуккаврил шинал дайдихьу дуллалисса шадлугъругу.
МахIачкъалаллал 11-мур школалий арснал душ Фатима Амироващал шадлугърал линейкалийн бувкIсса Светлана Амирован кIилийнусса байран дия. Ва цуппагу ДГПУ-лул преподаватель, психологиялул элмурдал кандидат бур. КIулшивурттал байран кьини цалчинмур классравун Фатима тIайла буклай, Светланал кIицI лавгунни, щил ци учирчагу, кIулшивурттал сий диркIшиву, душиву ва дикIантIишиву.
«Ва гимназия шагьрулуву хьхьичIунминнувух бур, ванил директоргу хIарачат бусса лаккудуш Зухра ЯхIъяева бушиву ххари хьунсса иш бур. МахIачкъалаллал 13-мур школалийн лавгссар арснал душру Амира ва Рукьижат Амировхъулгу, ца – 2-мур классравун, цагу – 4-мур классравун. Республикалул хъуниминнал, педагогтурал оьрчIан ва жагьилтуран куртIсса кIулшивуртту дулаврил ххуллий дуллалимур, дан дакIниймур дузрайн дукканнав, жула хъирив нанисса никирал дакIурдивугу кIулшивурттахсса гъира ххи хьуннав, цIакь хьуннав!» – тIий бур Светлана Амирова.
ПатIимат Рамазанова
