Дагъусттаннал ПаччахIлугърал Думалул депутат Султан ХIамзаев сентябрьданул 1-нний гьуртту хьунни МахIачкъалаллал 54-мур школалийсса шадлугърал линейкалий.
«Школа – так кIулшивуртту дулай кIану бакъар, тарбия дулай кIанугур. Аьрасатнал СВО-лул цалчинма Виричу НурмахIаммад ХIажимахIаммадовлул нину Сапижат Мазаева каялувшиву дуллалисса ва школа кIулшивуртту дулаврил ва тарбиялул чулуха эбратран бишинсса бур. Уттизаманнул инфраструктура, ххуйсса педагогтал, мяйжаннугусса хъунмасса ца кулпат кунмасса школа бур. Аьмну Аьрасатнаву, мукунма Дагъусттаннайгу дуккаврил процесс ххуй баврих, школардал тагьар ххуй даврих хъуннасса къулагъас душиву чIалай бур», – увкунни ванал.
Линейка къуртал хьуну махъ ХIамзаев увккунни классирттавух, кабинетру, школалул матахI, цимурца ци тагьарданий дуссарив ххал дунни, цалчинмур классрал дуклаки оьрчIахь цIухху-бусу бунни. Ванал бувсунни, цува ххари увшиву так ца ва школалий арулва цалчинмур класс бушиврул, ва гьарцаннуву мукьцIа-мукьцIала дуклаки оьрчI ушиврул.
«ОьрчIру чIявусса бушиву Аьрасатнал ва хасну Дагъусттаннал бучIантIимур вихшала дишин буллалисса хIуччар», – увкунни ванал. Шиккува кIицI лаганна, Сапижат Мазаевал бувсшиву гьашину школалий НурмахIаммад ХIажимахIаммадовлул цIанийсса музей тIитIиншиву СВО-лул Волонтертурал ассоциациялущал уртакьну. «Уттигъанну жучIан школалийн ивуна Волонтертурал ассоциация хIасул дурсса Мухтар Амиров ва ассоциациялул член Руслан Шавлукьов. Вайннал учреждениялул фондран дуллунни дяъвилул къизгъинниясса дрон-камикадзе. Аьралий ва артефактрал музейрал дайдихьу дурссар, ххуйсса музей дузал хьуншиврул властирдал органнал, жяматийсса ишккаккултрал, активистътурал, кIанттул агьулданул кумаг аьркинни. Музей баврил гьанумур мурад – СВО-лийсса дагъусттанлувтурал гьурттушинна гьарза-гьартану, мяълумну ккаккан давур. Ва ялагу, ва оьрчIру патриот асарду хьхьичIунну тарбия баврил ххуллийсса давугур», – увкунни Сапижат Мазаевал.
ПатIимат Рамазанова
