Вай гьантрай ЦIуссалакрал райондалийсса ЦIуссалакрал шяраваллил бакIчи Сулайман Рамазанов, контрактгу чирчуну, лавгунни «Каспий» тIисса Дагъусттаннал батальондалул кьюкьраву аьралий бурж бартбигьлан.
Шяраваллил администрациялул бакIчину итаннингу, Сулайман уссия ЦIуссалакрал райондалул бакIчинал бигарду чIумуйну биттур буллай. Ва даврий зузиссаксса хIаллай, Сулайманнул ккаккан бувссар цува вихшала дишин лайкьсса, агьалинаха, хаснува аьралий операциялул гьурттучитураха хъуннасса аякьа дусса каялувчи ушиву.
Ванал сипталийн бувну, Украиннал аьрщарай нанисса хасъсса аьралий операциялий гьуртту хъанахъисса аьралийтуран цимилгу тIайла бувкссар гуманитар кумаг. КIицI лаган, ванал личIиссара къулагъасрайн лавсун буссия хасъсса аьралий операциялул гьурттучитурал кулпатру. Цала харжирацIух кумаг бувссар аьралийтурал кулпатирттан ЖКХ-лул хIаллихшиннардах салкьи хьусса буржру лахъан ва цаймигу масъалартту дузрайн буккан буван.
– На ччя-ччяни хьунаакьайссияв Ватандалул ххуллий чувшиврий жанну дуллусса аьралийтурал ниттихъащал, кулпатирттащал ва миннал оьрчIащал. Хъинну асар шайва миннан цуксса захIматну буссарив.
ХIакьинусса кьини ЦIуссалакрал райондалия хасъсса аьралий операциялий гьуртту хъанай ур 400 жагьил, миннава 50 ур ЦIуссалакрал шяравасса.
Сулайманнул кIицI лавгунни, Хъун дяъвилий къучагъну талай, Ватан дуручлай бивкIсса жула ппухълуннал кунма, цIана жувагу буржлувну бушиву жула аьрщи неонацизмалуцIа марцI дуккан дуван, ялунмай рахIатсса оьрму хIасул бан.
Шяраваллил бакIчинал бувсса хIукмулуцIун бавкьунни райондалул жямат ва ванал коллегахъул. Сулайман Рамазановлул барчаллагь увкунни «Каспий» батальон хIасул бан сиптачину увксса ва хушрай аьрайн лавгминнал чIарав мудан ацIлацIисса Дагъусттаннал бакIчи Сергей Меликовлухь. Мукунма ванал барчаллагь увкунни аьралийтуран ка-кумаг буллалисса ЦIуссалакрал райондалул бакIчи МаматIи ХIамзатовлухь.
Аьралий бурж бартбивгьуну махъ, Заннал измулийну, Сулайман зана хьунтIиссар цала къуллугърайн.
Имара Саидова
