Январьданул 24-нний МахIачкъала шагьрулул 49-мур школалий лахъа-хъунсса даражалий, бусравсса хъамалгу бавтIун, тIивтIунни Аьралий савлугърал музей.
Шикку гьуртту хьунни СВО-лул Аьрасатнал цалчинсса Виричу НурмахIаммад ХIажимахIаммадовлул ппу Энгельс ХIажимахIаммадов, Аьрасатнал Виричу МахIаммад Исбакиевлул нину Марина Исбакиева, МахIачкъала шагьрулул Мажлисрал депутат Марис Илиясов, генерал-майор Муслим Даххаев, 4-мур гвардиялул мотострелковый бригадалул 3-мур аьралий армиялул командирнал хъиривчу, подполковник МахIаммад АшалмахIаммадов, СВО-лул ветеран Исмяил ГъазимахIаммадов, СССР-данул спортрал лайкь хьусса мастер, олимпий чемпион МахIаммадхан Арацилов, Къизилюртуллал райондалул бакIчи Рустам Татарханов, Дагъусттаннал халкьуннал артистка Зульфия Илиясова ва ванил каялувшиву дуллалисса МахIачкъала шагьрулул 8-мур искусствардал школалул ансамбль, Валентин Макаровлул цIанийсса Аьралий савлугърал музейрал каялувчи Жанна Сагидова, Ленинский райондалул администрациялул отделданул хъунмур Умсакинат Малачидибирова, Дагъусттаннал спортрал элита ва цаймигу.
Музей тIитIлатIисса шадлугърай ихтилат бувна школалул директор Аьбдулкарим Айгуновлул:
– ХIакьину жул школалий хъуннасса агьамшиву дусса кьини дур. Ларгсса шинал августрал 6-нний видеосвязьрайхчIин школа тIитIлатIисса презентациялий Дагъусттаннал бакIчи Сергей Меликовлул Аьрасатнал президент Владимир Путиннухь бувсъссия школалий Аьралий савлугърал музей тIитIин хIадур хъанай бушиву. Муния шинмай зий бивкIру ва проектраха. Шиккусса сайки цинярда экспонатру нава гуманитар кумагращал лавгсса чIумал аьралий операция нанисса кIанттурдая ларсун увкIсса дур. Школалий музей тIитIаврийну, аьралий тарих ябаву бакъассагу, Чувшиврул ва дакIнин бичаврил дарсру дихьлансса, вирттаврал гьунарду абад буллансса хъуннасса агьамшиву дусса даврил дайдихьу хъанахъиссар. Жула цинявннал мурадгу ххувшаву ласаву ва жула оьрчIан паракьатсса оьрму хIасул баву хъанахъиссар. ДакIнийхтунусса барчаллагь тIий ура хIакьину жула чIарав бацIан бувкIсса хъамаллурахь, ва ва даву дузрайн дуккан дан ка-кумаг бувминнахь, – увкуна Аьбдулкарим Айгуновлул.
Хъирив ятIул лента кьукьинсса ихтияр дуллуна Энгельс ХIажимахIаммадовлухьхьун ва МахIаммад АшалмахIаммадовлухьхьун.
Шиккува кIицI лаган, МахIачкъала шагьрулул школардай укунсса даражалул музей цалчин ва школалий тIивтIуну бур. Школалул коллективрахьгу, дуклаки оьрчIахьгу музей тIитIаву барча дуллай, Муслим Даххаевлул кIицI лавгуна, билаятрал цашиву ва тархъаншиву дуручлай бивкIсса Вирттал цIанасса никиран кIулну бикIан ва эбратну хьун аьркиншиву.
Музейравусса экспонатру ххал дурну махъ, виримукьалгу бувцIуну, ихтилат бувна Марина Исбакиевал:
– Жула учай, чIун ларгувкун, къюву лагь шайссар, куну. На кунмасса ниттихъан кIулссар ва чIумул хъин къадайсса щаву душиву. ХIакьину, шикку, вай экспонатру ххал хьувкун, цIунилгу жула цинявппагу Вирттал дакIницIух бавцIунни. На барчаллагьрай бура Ватандалул ххуллий жанну дуллусса Вирттаврал цIарду абад дуллалисса инсантурайн, хаснува ва школалул директорнайн ва ванал коллективрайн. Хъунмасса умуд бур шикку дуклакисса оьрчIан вай цинявппагу вирттал эбратну хьунссар тIисса, – увкуна ванил.
Хъирив ихтилат бувна Энгельс ХIажимахIаммадовлул:
– Ватан ххирану тарбия бувсса жагьилтураяр вирттал буккайсса. Хъуннасса вихшала дур ва школалул выпускниктурая республикалулгу, школалулгу цIа-кьини бюхттул дансса вирттал букканссар тIисса. ХIакьину на ва мажлисрай кIул хьура Аьрасатнал Виричу МахIаммад Исбакиевлул ниттищал. Ца ппурттуву МахIаммад уссия ттул арснащал аьралий гужирдал чемпионатрай гьуртту хъанай. НурмахIаммад аьпалул хьусса ппурттуву МахIаммад ттучIан увкIун: «Буттауссу Энгельс, на вин арс акъашиву кIул хьун къаикIанна», – увкуссия. ХIайп, ца шинава къирият лавайсса къучагъ цувагу оьрмулуцIа хьуна. Ватандалул ххуллий жан дулаву аьралийчунал яхI-намусрал лавайшивур, – увкуна ванал.
МахIаммад АшалмахIаммадовлул цала ихтилатраву кIицI лавгуна ялун нанисса ник Ватан ххирану, тарихрал кьимат буну тарбия дуллан аьркиншиву, буслан аьркиншиву жува щищал ва ци мурадрай талай буссарив.
– Аьрасатнал президентналгу гьурттушинна дурну, цIуну тIивтIусса школалий чара бакъа бикIан аьркинссар тIий ура Ватандалул цIаний жанну харж дурсса къучагътурал аьпа уттава буллалисса Аьралий савлугърал музей. Жула яла къалагайсса буржри никирая никирайн буслан Ватандалул ххуллий жанну дуллуминная, буручлан миннал аьпа. ХIакьину ва школалий тIивтIусса музей чувшиврул ва Ватандалуха къуллугъ баврил лишанну хъанахъиссар, – увкуна Марис Илиясовлул.
– Жула ппухълунная лавхьхьуссар жунма чувшивуртту дуллан. Ттул ппугу Хъун дяъвилул гьурттучия. Жу тарбия бувссару Совет Союзрал вирттаврал гьунарду эбратну бихьлай. ХIайп, жунма уттигу багьунни билаятрал мюхчаншиву дуручлан. ЦIанагу жула жагьилтал, хьхьичI ххуттай, чувшивуртту ккаккан дуллай, жула ялун бучIантIимунил цIаний талай бур. ЧIа учинну жула аьралийтуран ччясса мутталий цIуллуну-сагъну цала нитти-буттачIан, кулпаттиртачIан зана шаву, – увкуна Рустам Татархановлул.
Имара Саидова
