Райондалул бакIчинал барча бунни жямат
ЦIуссалакрал райондалул бакIчи МаматIи ХIамзатовлул барча дунни жяматрахь райондалийн ххявхсса боевиктал ххит бувну 26 шин шаву.
– Цуксса хIайпнугу, жула халкьуннан 1999-ку шинал сентябрь зуруйсса оьсса кьинирдугу лахълан багьунни.Тай иширттаву жула халкьуннал ккаккан дурссар цала чувшиву.
Райотделданул милицалтралгу, ФСБ-лул зузалтралгу, Аьрасатнал аьралийтурал ва виваллил аьралуннал зузалтралгу, ца хьуну, жула аьрщарайн ххявхсса террористътал ххит бувну, район душманнацIа марцI дуккан дурссар.
ЦIуссалакрал район боевиктурацIа мурахас дуллай, Аьрасатнал Виричунал цIа ларсъссар 13 инсаннал. Кьуния ряхра шин ларгунни тания шихуннай. Цими шин гьарчагу, лагь къашайссар жула дакIурдивусса къюву.
На барчаллагьрай ура ЦIуссалакрал жяматрайн райондалул даража гьаз бан бихьлахьисса захIматрахлу. Жува цачIу буссару, цачIу буссаксса, жула биялагу хъунмассар.
Барчаллагьрай ва хIурматрай дакIнин бичару жува Буттал кIанттул цIанийсса Хъунмасса дяъвилий талай бивкIсса жула буттахъул, буттал буттахъул. 1999-ку шинал райондалулгу, республикалулгу, билаятралгу цашиву дурурччуми. ХIакьинугу жула райондалиясса 400-нния ливчусса жагьилтал хасъсса аьралий операциялий Ватандалул мурадру буручлай буссар. Миннава 100-нния ливчусса къучагътал лайкь хьуссар паччахIлугърал, ведомстварттал чулухасса ва жяматийсса наградарттан, – увкунни райондалул каялувчинал.
Субботникру дунни
ЦIуссалакрал райондалий, гьарица шинах кунна, гьашинугу бюхттулсса даражалий кIицI ларгунни жула аьрщарайн ххявхсса террористътурал кьюкьри ххит дурсса кьини.
Мероприятияртту дайдишиннин райондалул школардал учительтурал ва дуклаки оьрчIал, субботникру дурну, марцI бунни тай иширттацIун бавхIусса кIанттурду.
ЦIуссачIурттащиял шяраву марцIшиву дунни Аьрасатнал Виричу А.Козиннул гьайкалданул лагма-ялттусса кIанттурдай. ТIюхчарав – дяъвилул иширттаву жанну дуллусса Калач-на-Дону шагьрулиясса виваллил аьралуннал 22-мур бригадалул аьралийтурансса гьайкал дусса кIанттурдай. Мукунна субботник дунни ЦIуссалакрал шяравусса Аьпалул багъраву. Шикку бувгьуну бур 200-ннийн бивсса мурхьру, мармарчарил улттуй чирчуну дур хасъсса аьралий операциялий жанну дуллусса къучагътурал цIарду.
ЗахIматсса кьинирду дакIнин дирчунни
ЦIуссалакрал школардай хьунни 1999-ку шинал сентябрьданий райондалий най бивкIсса дяъвилул иширттан хас дурсса мероприятияртту. Чувшиврул дарсирдай ва классрал ссятирдай учительтурал бувсунни оьрчIахь террористътурайн данди бавцIуну, Ватан дуручлай бивкIсса вирттаврая. Райондалул чиваркIунналгу, федерал гужирдалгу цачIу ххит дурссар та чIумал къачагътурал кьюкьри. Тай иширттаву Дагъусттаннал халкьуннал ккаккан дурссар цала чувшиву, цашиву ва ватан ххирашиву.
«Телевышка» лахъазан
Тай гьантрал таварихраву ца яла оьхIалмур лажин чирчуссар 715,3 («Телевышка») лахъазанттухлусса талатаврил. Лахъазан террористътурая дуруччин амру бивкIссар «Вятич» тIисса виваллил аьралуннал 15-мур спецназрал кьюкьлуйн. Сентябрьданул 10-нний, кIюрххил ссят ряхра хьусса чIумал, хъунама лейтенант Сергей Богданченкол каялувшиннаралу вай данди бавцIуссар ярагъуннил балгусса боевиктурайн. Лахъазанттуйсса талатавриву 80 инсаннал жан дуллуссар. Миннава «Вятич» кьюкьлувасса 36 аьраличунал. Вара кьюкьлувасса 78 аьраличунайн щавурду дирссар.Тания шихунмай сентябрьданул 10-нний кIицI дувайссар лахъазанттухлу жанну дуллуми дакIнин бичлачисса кьини.
ДакIнин бутан, сентябрьданул дайдихьулий боевиктал буккан бувну бивкIссар Бущихъиял райондалия.
Къачагътурал чул бувгьусса Къарамащи ва Чабанмащи шяраваллурду федерал аьралуннал вив ларсун диркIссар. Укунсса тагьарданий боевиктурай каялувшиву дуллалиминнан пикри хьуссар хар-хавар бакъа ЦIуссалакрал райондалийн ххяххан. Хаттаблун ва Басаевлун пикри бивкIссар, Аьрасатнал агьамми гужру Къадардал даралувун кIункIу бувну бухьувкун, хар-хавар бакъа ххявххун, ЦIуссалакрал аьрщи бигьану канийн ласун хьунссар тIисса.
ЦIубутIуй миннан тIайлабацIу хьуссар. Боевиктал бувхссар дазуйхсса ТIюхчардал, Гьамиящиял, Аьхъардал, Чапаево шяраваллавун ва райондалул центрданийн.
Ванийну Аьрасатнал аьрал Къадардал даралува буккан бансса ва республикалийсса тагьар оьлукъин дансса кьаст диркIссар къачагътурал, амма миннан ччимур къавхьуссар.
Райондалийн буххайхту, вайннал агьаммур мурад бивкIссар чIяруми шяраваллугу, машиналул ххуллурдугу витIянхъирай бивхьусса кунма чIалачIисса, хъуннасса агьамшиву дусса «Телевышка» лахъазан ласунсса. Мунияту кIиккун чIявусса боевикталгу тIайла бувкссар. Амма, вайннан дакIний бивкIсса куццуй, анаварну ва бигьану лахъазан ласун къабювхъуссар, хIатта кIа дуручлай 6 инсан акъа къаивкIнугу. Лахъазанттуй боевиктурайн данди бавцIуссар лейтенант Халид Мурачуевлул каялувшиндаралусса ЦIуссалакрал райотделданул 5 милицагу, ца виваллил аьралуннал солдатгу. КIюрх дучIаннин чIирисса кьюкьа 100-нния ливчусса боевиктуращал къучагъну талай диркIссар.
Боевиктурал цалчинсса гьужум бувсса чIумал, ивкIуссар милицанал зузала, яла щаву дирссар пулеметчикнайн. Му талатавуртту дусса кIанттая уккан увну нанисса 2 милица, боевиктурахьхьун иривну, ясир увссар. Жан дукканнин, ца ша махъунмай къалавсун, лахъазан дуручлай бивкIссар лейтенант Халид Мурачуев ва сержант Мутай Исяев.
Вайннал къучагъшиврия ва цала бувсса зулмулиягу бувсун, ми бувччусса кIанттурдугу ккаккан бувссар 2000-ку шинал ясир багьсса боевиктурал. Лахъазанттухлусса талатавриву 50-ннийн бивсса къачагътал оьрмурдацIа хьуссар. Къуллугърал бурж бартбигьлай ккаккан дурсса чувшиврухлу Халид Мурачуевлун ва Мутай Исяевлун аьпалул хьуну махъ «Аьрасатнал Виричу» тIисса цIа дуллуссар.
ДакIний бикIантIиссар
Сентябрь зурул 14-нний ЦIуссалакрал райондалул каялувчи МаматIи ХIамзатов бакIчисса делегация бувкIунни ТIюхчардал шяравун, 1999-ку шиналсса дяъвилул иширттаву Аьрасатнал аьралийтурал жанну дуллусса кIанттурдайн биян. Вайннал дирхьунни тIутIив аьралийтурансса гьайкалдануцI, мукунна цала аьрщарай жанну дуллуминнал аьпалун ЦIуссалакрал жяматрал дурсса стелалучIа.
Вирттал дакIнин бичин бувкIун бия Дагъусттаннал ХIукуматрал председательнал хъиривчу Муслим Телякавов, Халкьуннал Мажлисрал законодательствалул комитетрал председатель Артур Исрапилов, Дагъусттаннал ХIукуматрал ЦIуссалакрал райондалийсса лак цIусса миналийн бизан баврил ва Аухуллал район цIу дуккан даврил масъаларттаха зузисса управлениялул хъунама МахIаммад-ХIажи Айдиев, «Доблесть гор» тIисса республикалул программалул гьурттучитал, жанну дуллуминнал мачча-гъанми ва архIал къуллугъ буллай бивкIми, региондалул властьрал вакилтал, ихтиярду дуруччай структурардал каялувчитал ва зузалт, дуклаки оьрчIру.
ТIюхчардал шяравалу дирхьуну дур Чачаннал дазуй. Дазуя ТIюхчаравсса ххуллу буруччин бацIан бувсса блокпострай къуллугъ буллай бивкIссар Дагъусттаннал милицанал зузалт. Шяраваллил чIаравсса 444,3 лахъазанттуй къаралданий диркIссар Аьрасатнал МВД-лул виваллил аьралуннал ОМОН-далул 22-мур отряд: ца БМП-лущалсса 12 солдат ва ца хIаписар.
Та шинал сентябрь зурул 5-нний шикку цала жанну харж дурссар Василий Ташкиннул, Константин Анисимовлул, Алексей Липатовлул, Владимир Кауфманнул, Борис Эрднеевлул, Алексей Полагаевлул.
Хъирив делегация бивунни ЦIуссачIурттащиял шяравун. Дирхьунни тIутIив ЦIуссачIурттащиял 2-мур школалул хIаятраву дацIан дурсса Аьрасатнал Виричу А.В.Козиннул гьайкалдануцI. Виричунал аьпалун баян бунни минутрайсса пахъ багьаву.
ДакIнин бутан, 1999-ку шинал Алексей Козин гьан увну ивкIссар Дагъусттаннайн танковый взводрал командирну. Ва гьуртту хьуссар Чачаннал дазуйсса операциялуву. Сентябрьданул 5-нний ЦIуссалакрал шяраваллия арх бакъа, боевиктурайн данди авцIуну, щавурду дирсса саллатI мюхчан буллай жан дуллуссар. Район боевиктурацIа марцI дуккан дурну махъ ванал жаназа ляркъуссар душманнал ппив дурсса танкалучIа. Талатавриву ккаккан дурсса чувшиврухлу ванан Аьрасатнал Виричунал цIа дуллуссар. ЦIуссачIурттащиял школалун дуллуну дуссар Алексей Козиннул цIа.
Шичча къуллугъчитал бувкIунни ЦIуссалакрал шяравусса Аьпалул багъравун, хасъсса аьралий операциялий жанну дуллуми дакIнин бичин.
КIицI лаган, Аьпалул багъ цалчин бувну бур Буйнакскаллал райондалийсса Нижнее Казанище шяраву, хасъсса аьралий операциялий жан дуллусса МахIач Сайкумовлул нитти-буттал сипталий. Дагъусттаннал бакIчи Сергей Меликовлул вайннал сипта хъин чулий ккарккун, укунмасса багъру республикалий цаймигу кIанттурдай буллан бивкIссар.
Делегациялул хъиривмур аьрххи «Телевышка» лахъазанттуйн бия. ДакIнин бивчунни лахъазан дуручлай бивкIсса райотделданул зузалт ва Армавирдал спецназрал аьралийтал.
Хъиривсса аьпалул мажлис хьунни ЦIуссалакрал шяраву. Майданнивсса гьайкалдануцI тIутIивгу дирхьуну, минутрайсса пахъ багьаву дунни.
Ва кьини мероприятиярттал лагрулий райцентрданий хьунни суратирттал выставка, тIивтIуну бия къертту щашлашисса ва хъамул чирахъру буллалисса площадкартту.
Мероприятияртту къуртал хьунни райондалул Культуралул къатрал хIадур дурсса концертрал программалийну.
Андриана Аьбдуллаева
