Жул суаллахьхьун жавабру дуллай бур Аьвдулкариннул душ Зулайхат Тахакьаева, Дагъусттаннал культуралул лайкь хьусса зузала.

Бувну бур 1975 шинал Хъусрахь. ДГУ-рал дагъусттаннал филологиялул факультет къуртал бувну махъ, кIира шин МахIачкъала шагьрулул школардай дарс дихьлайгу дурну, 2000 шинал зун бувкIун бур «Илчи» кказитрайн корреспондентну. 2004 шиная шинмай зий бур отделданул редакторну. Кказитрай зий гьашину ванил хъанай дур 25 шин. Ва чIумул мутталий шамийлва лайкь хьуну бур «Золотое перо» тIисса Дагъусттаннал ва Аьрасатнал Журналистътурал союзрал лараймур премиялун (2003, 2012, 2023 шиннардий).

Мукунма ва хъанай бур ДР-лул Миллатирттал политикалул ва диндалул иширттал министерствалул ва цаймигу ведомстварттал баян бувну бивкIсса республикалул журналистътурал дянивсса конкурсирттал лауреат ва дипломант. Лайкь хьуну бур Аьрасатнал Журналистътурал союзрал ва республикалул министерстварттал чулухасса ХIурматрал грамотарттан ва Барчаллагьрал чагъардан. Кказитрайсса ванил агьаммур даву дархIуну дур Лакрал райондалуцIун ва Дагъусттаннал магьирлугърал оьрмулуву хъанахъисса иширттацIун, хасну Лакрал театрданул даврицIун.

– Цукунсса хьуна оьрчIний вийнма яла гужсса асар биян бувсса зат, иш?
– На школалийн гьанмагу бувасса чIун дия. Ххулув буцлацисса кIанай, жула гъан-маччанан чIиникIру байл буван, байлаххи буклай ия ниттиуссу Аьлил, аьпа биву. На, лавгун таначIангу: «Ниттиуссуй, ттул мазрайхгу буккияр байлаххи»,– учав. Ганалгу, циванни къабуккайсса куну, бувккунни. Лакку мазрал учителъя цувагу. Муниятур ца-ца чIумал ттул маз байлсса. Вай гьантрай ссурахъал хъяй дакIнийн бутлай бия: «Яла ина, журналист къавхьуну, цуя хьунтIисса»,– тIий.

– Цими никирайн дияннинсса кIулли вин вила ппухълуннал нясав? Буси яла архманал цIа.
– Буттал чулуха мукьра никирайн дияннин: ппу Аьвдулкарин, буттал ппу Исмяил, ванал ппу Тахакьа, ванал ппу Аьвдуллагь.

– Инсаннал хасиятраву винна яла ккарккун къаччимур лишан?
– КIира лажин душиву, яхI бакъашиву.

– Вила оьрмулуву яла алши бакъамур шин?
– 2022 шин. Жул, мукьва ссил, дянив увагу усса ца арс, Алик, хасъсса аьралий операциялий ивкIусса, душнил арснал бивкIулул дард духIан къархьуну, жула дадагу ваналла хъирив ларгсса шин.

– Яла алши бумур шин?
– КIа шинайн дияннинсса цинярдагу шинну алши бусса дия.

– ВичIара циксса арцу хьувкун дигьаларгун дикIанссия вил дакI?
– ПаччахIлугърал даврий зий бухьувкун, чIярусса арцуйн тамахI бивхьуну тачIав къабивкIссара. Вардиш хьура ччан виргъандалун лавхьхьуну тIитIин буллай.

– Арцу чун харж дуркун къашара ина пашман?
– Кьини дурксса инсаннан дуллувкун.

– Чун харж дуркун шара пашман?
– ХIарачат бувара аьркин дакъанийн харж къадуван.

– Инсаннал тахсирдавасса цумур тахсир хьунссия вища багъишла битан?

– Бувагу къабитан?
– Ца базилухь на бикIайссияв ттуйва гъибат бивхьусса инсан бусса оьрмулий багъишла итан къахьунсса ххай. ЧIумул дакI кIукIлу лаган дурунни.

– Ссан диял къашай вил чIун?
– Буттал шяравун ччя-ччяни гьан-бучIан.

– Бартлавгун ччисса вила шанма мурад?
– Байбивхьусса гьантлия шинмай хасъсса аьралий операциялий талатисса ттула уссил оьрчIру сагъ-саламатну зана хьусса кьини дучIаннав!
СВО-гу къуртал хьуну, жула чиваркI цала кулпатирттал ялун цIуллуну-сагъну бувкIун ккакканнав! СВО-лий Ватандалул ххуллий жанну кьурван дурсса жула оьрчIал цала оь нахIакьдан экьибувтIусса къахьуннав.

– Вила оьрмулуву хъинну ххирасса кIантту бувгьусса шама инсаннал цIа (нину-ппу къахIисавну).
– На даингу нава талихI бусса инсаннан хIисав бара, цанчирча нитти-буттаягу, уссур-ссуннаягу ливчуну мукьах, мукунсса кIантту бугьансса инсантал ттул оьрмулуву чансса бакъассар: МахIаммад-Загьид Аминов, Рая Загълиева (цал аьпа баннав), Роза Эльдарова, Миясат Муслимова, Ширвани Чаллаев, Абакар ва Къисттаман Къюннуевхъул, ПатIимат МахIаммадова (Хачилаева), Бэлла Багъдуева. Ва кIицI къалавгун къахьунссар ттула кулпатрал ялун оьзру бивсса чIумал, чIарав бавцIусса ттула каялувчитал Руслан Башаев, Руслан Къардашов ва Бадрижат МахIаммадхIажиева (цал оьрмурду лахъи баннав!)

– Винма ххуй бизайсса хъамитайпалул сурат?
– Иминсса, хIалимсса, зунттал яхI-къирият дусса.

– Вина кьамулсса чув-адаминал сурат?
– Чумартсса ва чувшиву ххисса.

– Агарда бюхъайсса бивкIссания, инава ци кIанттай, ци чIумал бувну ва ци билаятрай яхъанай ччива вин?
– Дагъусттаннай, Лакку билаятрай, нава чIивиний кунма, лакрал щархъай аргъ дуссагу, агьалинал оьрму паракьатссагу заманнай.

– Ссаяту бикIай вил яла хъунмур пахру?
– Пахру ттуява къабикIайча, ттула миллатрал бюхттулсса тарихрая ва цIанихсса ватанлувтурая бикIай.

– Цукунсса дур вил виятурасса къарязишиву?
– Рязишивугу, къарязишиву цара-ца хасиятраясса дур – нава хъиннува аьчухсса бушиврия.

– Яла къаххирамур дукра?
– Цуксса ккашилну, шаппай гьансса мажал бакъа бухьурчагу, къалагара KFC-рдаву дукра дукан.

– Яла ххирамур дукра?
– ИчIура кIюххуй шархьсса дукра цумур-цагу ххирар, хIатта дачIрасса щинаву шавхьсса макарон бухьурчагума.

– Ссаятусса бикIай яла хъунмамур хIучI?
– МакIурдия. КIараллил тачIав щялмахъ къабусай. ТIааьн дакъасса макI къаккакканшиврул мукьра шин шавай дур СВО байбивхьуния шинмай янийн я къалакьлай, анжагъ, хъинну бухха-базу хьуний бакъасса.

– Хьуссарив вил оьрмулуву винна инара ттинин багъишла ритан къахъанахъисса къел?
– ДакIний дакъар.

– Лавгсса заманардавасса цIанихса инсантуравасса цуманащал хьунабакьин ччива вин?
– Гьарун Саэдовлущал, Саэд ХIабиевлущал, Сталиннущал, Екатерина Великаящал.

– Цукунсса бур, вил пикрилий, лакрал миллатрал яла хъунмур буруккин?
– Маз бухлаглагаву, Лакку кIану бачIва хъанахъаву. Ца чулуха дакI ххари хьунсса хIучча бур, куннацIух кув бувккун, буттал шяраваллаву къатри дуллалими шиная шинайн ялун буклай бушиврия, вамур чулуха тIурча – къатри дуллай бушиву къагьархха, шяраваллаву школардай дуклакисса оьрчIал аьдад шиная шинайн дагьну най дур.

– Ци дахчилай дур хIакьину Дагъусттаннахун, цил аьнтIикIасса кIанттун ва надирсса миллатирттан лавхьхьуну, ххуйнугу, ххаллилнугу ялапар хъананшиврул?
– Чан дакъар дахчилачимур. Шиннардил лахъишиврий дух дан къахъанахъисса коррупция – къуллугъчитурал чулуха. (Так ца коммунал хозяйство ласурчагума, му цин лархьхьусса кIанттайн дуцин шавай бакъар. Гъарал къаларчIния тIий, лабизланссагума буккай, кIулну тIий гъарал лачIурча шагьрулуву ци ахирзамана бикIантIиссарив).
Жува, ппухълуннал багьа бакъасса ххазина хIисаврай жунна кьариртсса аьдатирттаягу, магьирлугъраягу ябуцлай, чилмур нахIу лачIлай бушиву.

– Ца-кIива махъ «Илчи» кказитраятугу.
– «Илчи» кказит агарда ттул оьрмулуву агьамсса ххуттай къабивкIссания, бацIанссияв на кьуния ххюра шинай шикку?