Муркъилинахъал ХIажи
Ниттил маз
Нагъмурдал назсса чIуну
Ниттил зумату баллай,
Ниттил накIлищал архIал
Оьтту-ттурчIавун бухлай,
Лявхъунни, хIасул хьунни
Ттул дакIниву ниттил маз,
Ляхъайсса кунна кIулши,
Ляхъайсса кунна адав.
Лахьхьин бунни ттун ниттил
Ттиркьюкьал пар бу махъру,
Лаххайсса кунна ххалуйх,
Ца-цаних тIий, кюрщантру.
Ляхъан бунни дакIниву
ПасихIшиврул чирахъру,
Лахъайсса кунма хьхьувай
Ссавруннай чаннацIуртти.
Агь, ниттил маз, вил цIанил
МарцIшиву, гъелишиву,
Ужагърай лархъсса цIуну
Вил лишанну яданна.
Инархха ттун дуллусса
Ххира буттал чувшиву,
Зума нахIусса ниттил
Хъиншиву, чумартшиву.
Ина ттулла, ниттил маз,
Ттул кашира, ттул гужра,
Шадний чайсса балайра,
Къуманий чайсса угьра.
Ина ларгсса кьинира,
Буттал буттахъал чIура,
Ттул оьрчIал жавгьардаву
Пар тIисса цIусса чIунна.
Вил балай баллалиний
Ттун багъру тIутIайх бичай,
Вил хъярчирал хъяхъаврий
Гьарзат хъяй чIалан дикIай.
Агь, ниттил маз, вил цIанил
МарцIшиву, гъелишиву,
Ужагърай лархъсса цIуну
Вил лишанну яданна.
Шаэр
Шаэр увкусса цIа
Хъинну бюхттулссар:
Му тархъансса махъри,
ЯхI бунал кусса,
Му цIусса макьанни,
ЦIусса хиялли,
Халкьуннан чаннасса
ЦIукуну хьусса.
КIирисса шавкьирал
ЩатIив гьаз бувну,
Шаэрналли мухлукь
Аьраттал байсса,
Иш багьний, ххаллилсса
Даву дувангу,
Иш багьний, кьянкьасса
Рищаву дангу.
Шаэр усса миллат –
ХIакьсса миллатри,
Чурххаву къюкI дусса,
Зумув маз бусса,
Му хьхьирир чавхь тIисса,
КунцIа къавхьусса,
Му багъри – щюллисса,
Мархри къакьавкьсса.
Ачу, шаэр, ина
Чичлай шеърирду,
ЦIу-цIусса, цIу бусса,
Циняннан хIазсса,
Сунттул ххалуйх лархсса
Ттиркьюкьив ххансса,
Чарий куртIну дурсса
Накьичру ххансса.
Цири бювчIу махъру,
ПасихIсса махъру,
Миннуву дакIнил ссихI
Щарай бакъани?
Чунни бакьин бувсса
Бявкъусса байтру,
Миннуву халкьуннал
Пикри бакъани?
Ччарчан «шаэр» уча,
Ччарчагу – «аьшукь»,
Цукун учирчагу,
Мяъна дакъассар,
Ччучлай акъахьурча
Оьрмулух ччаврил,
ОьвтIий акъахьурча
ЦIусса оьрмулийн.
Интнил савлугъ
Баяйрив кьутIа тIий
Мурчал каних инт,
Ххал шайрив ялун най
Ххарисса кьини.
Буккияра хьунийн,
УрцIи дурцIуну,
Хъурдуккаврил байран
Майданнив дурну.
Бургъил таж бакIрайсса,
НякI янна лархсса,
Интнил шад бантIиссар
Къужрал яругу.
Буллугъсса мажлисрай
Тямадашиврий
ДурчIуну дитанну
Тамашасса инт.
Хъуннасса шадлугърай
Гьаз бувну кьуртти,
ДакI дуну дугьанну
Оьрмулул хъарас.
Ссурулккуртта
Цимил янин ккавкнугу
Пар-партIи ссурулккуртта,
Ккавктари, ххари шара,
Цанниввагу къакIулну.
КIанил цIу дай тIабиаьт,
Диртун цила нур зунттайх:
Ххари бувну, мачча бай
Хъунмагу, чIивимагу.
Бакъаривла тамаша
Зунттаву ссурулккуртта,
КIаланг бавхIусса кунма,
Зунттурду цачIун байсса?
Яла ххирамур
Ххирар ттун тяхъасса
Интнил ххяххабаргъ,
ХъачI-мачIайх ппив хьуну,
Экьилагайсса.
Ххирар хьхьунил ссавний
ЦIузурул симан,
ЦIурттал дянив къавтIий,
МахIаттал айсса.
Ххирар кIюрххицIунмай
Буккайсса цIуку,
Зузалан кьинилул
Илчину шайсса.
Гьарзадраяр ххирар
Тархъансса Ватан,
Гьарцаннан баргъ-барзну,
ЦIукуну хьусса.
Ччавугу чаннассар
Ва ттул дакIниву,
Зунттал хъазамраву
Щаращи кунна.
Бюхъугу чаннассар
Ттул карунниву,
Зузаврил марцI хьусса
ЧIатIул мах кунма.
Виричу
Баргъ ссавний буссаксса,
Чани гьан буллай,
Къашайссар лухIи-цIан
Чанна дуниял.
Барз ссавний буссаксса
ЦIурттаву пар тIий,
Къашайссар хьхьугу цIан,
Ттурлу дунугу.
Дуссаксса аьрщарай
Инсаннал инсап,
Лагъгу къахьунтIиссар
Цаягу инсан.
Буссар дунияллий
Ккуллагу, цIугу,
Амма ми дух дайсса
Буссар виртталгу.
Ялун най бунугу
Фашистнал пуркIу,
ЦIупар тIий дур яргну
Вирттаврал цIарду.
Вирттаврахь
Угь учай ттул дакIнил,
Бурса бакьинсса,
Ххирасса зу вирттал,
ДакIнин багьувкун.
Къявхъ учай яруннал,
Бярду бацIансса,
Аьзизсса зу дустал,
Бакъа ххал хьувкун.
Парх учай тIутIулгу,
КIутIу увкуну,
Циятура бургъил
Хьхьем гьаз дурукун.
РахIат шай дикIул дакI,
Макьгу кьадагьай,
Зу дурсса чувшиву
ДакIнин дагьувкун.
Бакъассар зун бивкIу,
ЧIун архIал вирттал:
Зул махъ буссар оьрму,
Тархъансса Ватан!
Чинарданул чурхру
Гьаттахь бунугу,
Буссар зул яругу
Махъминнал иттав.
Личлай дур миннува
Кьисасрал цIурду,
Хьхьурду чанна дуллай,
Душмантал ччучлай.
***
Ниттил айсса цалли,
ИвчIайсса цалли,
Цалли дунияллий
Оьрму бутайсса.
ИвчIангу аьркинссар
ИвчIан аьркинний,
Абад уттавану
ХIисав аншиврул.
Ссаха лащан бава!
Бавияв, ххирамур, на ина лащан
Шадсса кьинилуха, бургъи-зуруха,
Дардру кунна, ххютру
лихълахъи дайсса.
Бавияв ялагу на ина лащан
ЦIурттал дянивусса чанна цIукуха,
Ссавруннайн урувгни
цалчин ххал шайсса.
Бавияв мукунма на ина лащан
ТIутIал чIюлу дурсса щюлли интниха,
Дахьра хъяхъа тIисса хъункIултIутIуха.
Бюхълай бивкIссания
ца кIанттайн датIин
Циняв бургъил рангру,
кьанкьру, макьанну,
Бавияв ца чIюйгу – ина щябитан,
Бавияв ца тажгу – вил бакIрай бишин.
Дуснахь
На ура ялугьлай –
Яру вий личIлай,
Архнийгу, гъаннийгу
Янин ххал хьукун.
На ура пикрирдай –
ДакI вищал дачIлай,
Хьхьувайгу, дяхттагу
ДакIнин багьукун.
Ина бура, ттул дус,
Ттул янил чани,
Лагмара дуниял
Ххал дан буллусса.
Ина бура, ххирай,
Ттул дакIнил кIулши,
ТалихIрал лахIзарду
БувчIин буллусса.
Духьурча ттул цичIав
Ва оьрмулуву –
Му вил аьзизшивур,
Му вихсса ччавур.
Бухьурча ттул кьюлтIсса
Хиял ва мурад –
Му вил дакI ва хиял
ЧIюлу хьун бавур.
