Вай гьантрай Къизилюртлив хьунни жяматийсса ишккакку ХIусман ХIажиевлул аьпалунсса республикалул панкратиондалул тIиртIусса турнир. Шикку цалчинсса кIану бувгьунни жула лаккуоьрчIал, 17 шинавусса Жамал Камиловлул.

Жамаллуя жу хьхьичIвагу чивчуссия, ванал ирглийсса ххувшаву ларсъсса чIумал. Ванал ппу Ися Ккуллал шяравасса ур, нину Мадина Арчиятусса.
Гьашину МахIачкъалаллал 29-мур школалий 11-мур классгу къуртал бувну, ва увххун ур Дагъусттаннал университетрачIасса профессионал колледжравун.
Панкратиондалул турнир хьуннин хьхьичIгу Жамаллул цалчинсса кIанттурду бувгьуна Москавливсса ММА-лул, Сочилий хьусса грепплинграл бяст-ччаллаву. Мукунма уттигъанну ванал кIилчинсса кIану бувгьунни Смоленскалий хьусса ММА-лул дунияллул халкьуннал дянивсса соревнованиярттай. Къиргъизнал, УзбакIнал, Къазахъисттаннал, Белоруссиянал, Азирбижаннал ва цаймигу СНГ-лул билаятирттал спортсментал гьуртту хъанахъисса соревнованиярттай кIилчинсса кIану бугьавугу хъуннасса ххувшавур. Уттигъанну Жамал кьамул унни грепплинграл Аьрасатнал цачIундур командалувун.
Барча тIий буру Жамаллухь ххувшаву, мунияргу бюхттулми шачIанттайнгу лавхъун ккакканнав оьрмулул ва спортрал ххуллий.

Андриана Аьбдуллаева