Ларгсса арвахIкьини Лакрал райондалул администрациялий хьунни цIусса бакIчи увчIлачIисса батIаву. Ванияр хьхьичI бувксса номерданий бувсъсса куццуй, депутатътурал чIурду буллуну, увчIунни Куччаев Зураб ХIусайннул арс.
2007 шиная уттинин райондалий каялувшиву дуллай ивкIсса Юсуп МахIаммадовлул, агьалинахь барчаллагь тIий, увкунни:
«ХIакьину на кьабитлай ура ацIния мяйра шинал мутталий бувгьуну най ивкIсса райондалул каялувчинал къуллугъ. Ттула оьрмулуву ца хъуннасса агьамшиву дусса манзил.
ДакI асардал дурцIуну дур. ХьхьичIва-хьхьичI ттун ччай бур зухь учин дакIнихтунусса барчаллагь.
Барчаллагь шяраваллал бакIчитурайн – ттул дакI тIайласса пикрилул уртакьтурайн. Жува архIал бивтссар захIматсса ххуллурдугу, архIал кIидачIлай бивкIссару хьхьичIуннайшивурттаясса ххаришивурттугу. Ми хьхьичIуннайшивурттайн жува бивссару зул дакI тIайласса захIматрайну, ватандалухсса ччаврийну. Зу хIала бакъа цавагу иш чулийн къабуккантIиссия.
Хаснува барчаллагь учин ччай ура Халкьуннал Мажлисрал депутат Марат Илиясовлухь ва хIукуматрал къуллугърай зузисса ттула цинявппагу гьалмахтурахь. Зул муданнасса чIарахбацIаврийн, аькьилсса маслихIатирттайн чул бишлай ивкIссара на вай шиннардий. Хъунмасса барчаллагь райондалул депутатътурайн цачIу чулийн буккан бан бювхъусса хIукмурдахлу. Ца-ца чIумал жула дянив багьсса бястругу райондалул агьалинал оьрму ххуй шаврил ххуллийссая.
Хаснува барчаллагь учин ччай ура ттула командалухь, райондалул администрациялул коллективрахь
Ттул ххирасса зузалт! Зу ттул яла агьаммур командая, багьавай ттул вихшала хIалал дурсса. Барчаллагь зул дакI тIайлашиврухлу, ца-цал хьхьурдугума уттара дан багьсса захIматрахлу, зу ттущал хъачIрай хъачI дирхьуну най бивкIссару. Пахрулий ура зущал зун нясивну лякъаврия.
ДакIнихтуну барчаллагь тIий ура райондалул цинявппагу идарарттал зузалтрахь, зул пишакаршиврухлу, ссавурданухлу ва райондалул агьалинал цIаний цачIу бивхьусса захIматрахлу.
Барчаллагь зун, райондалул агьалий, ттул ватанлувтал, вихшалдарахлу, кабакьулухлу, буттал аьрщарахсса зул ччаврихлу, Зуру ва аьрщарал кьуватгу, пахругу, яла хъунмур аваданшивугу. Зул симаннай пиш ккаккаву – муя ттул захIматрансса яла хъунмур бахшиш, жула цачIусса захIмат чулийн буклай бушиву зул симаннал бусайва.
Вай шинну ттул дакIнива тачIав къалиххантIиссар, ттула оьрмулувусса яла агьаммур ва багьа бакъасса даву хIисаврай. Ттула дакIнил бутIагу на кьабитлатиссара зущал.
ХIакьину на дакIнихтуну тIайлабацIу чIа тIий ура цIуну увчIусса бакIчи Зураб Куччаевлун. Зураб, дакI дарцIуну ура вил гьавасрал, бюхъулул ва буттал аьрщарахсса ччаврил кумаг банссар тIий ва агьамсса даву гихуннай дачин дан. ЧIа тIий ура вин цIуллушиву, аькьилшиву ва агьалинал чулухасса ка-кумаг. Лакрал райондалул чаннасса ялун бучIантIимунийн умудрай, тапшур дуллай ура вийн эстафета.
ДР-лул Халкьуннал Мажлисрал депутат Марат Илиясовлул, ацIния мяйра шинал манзилданий район цIу дуккаврил ва хьхьичIуннай шаврил ххуллий бувсса захIматрахлу Юсуп МахIаммадовлухь барчаллагьгу куну, барча унни Зураб Куччаев.
«Юсуп МахIаммадов райондалул бакIчину увчIлачIисса чIун дия райондалунгу, щала билаятрангу захIматсса. Юсуп ХIамидовичлул хъуннасса даву дурссар район хьхьичIуннай дан. Бувунни цIусса школа, детсад, ххуллурду, щинаххуллурду. Амма вингу дуванмур чан дакъар.
Жагьилсса оьрмулий му хъуннасса жаваблувшиннар ина вила хъачIунттайн ларсъсса. Умуд бур республикалул бакIчинал ва депутатътурал вийнна дурсса вихшала кьукьин къаританссар тIисса.
Ттун дакIний бакъар тачIав царагу райондалий ца бакIчи лавгун, цама укIлакIисса чIумал президиумраву кIиягу цачIу щябивкIун. ХIакьину зу цачIу щябивкIун бушиврул тIутIиссар Юсуп ХIамидович маслихIатрайнугу, иширайнугу вил чIарав ацIан хIадурну ушиву».
Хъирив Зураб Куччаевлул барчаллагь увкунни Юсуп МахIаммадовлухьгу, Марат Илиясовлухьгу, депутатътурахьгу.
«Нава чув, цуксса жаваблувсса давурттай зий ивкIун ухьурчагу, ттул дакI укун гьалакну тачIав дакъассия. Ттун асар хъанай бур ттула халкьуннал ссихI, асар хъанай дур ттуйнна дурсса вихшалагу, ттуйрасса жаваблувшиннагу.
ЧIалай бур данмургу чансса дакъашиву. Шяраваллил хозяйствалул министерствалий зий уссаксса чIумул дянив на тамансса районнайн ивра, дакI дарцIуну учин бюхъанссар жула райондалий инфраструктура хьхьичIуннай хьуну душиву. Юсуп ХIамидовичлул хIарачатрайну. Тти багьлай бур зузи кIантту дузал бан. ЖучIара мукунсса каширду дур. Зул кумаграцIух ми ниятру чулийн дуккан дансса хIарачатрай нагу зунна», – увкунни цIуну увчIусса бакIчинал.
Зулайхат Тахакьаева
