Ттигъанну жула республикалий хъуннасса лагрулий кIицI ларгунни кIива агьамсса иширан хас дурсса байран – Дагъусттаннал Халкьуннал цашиврул кьинилун ва билаятрал президентнал баян бувсса Аьрасатнал Халкьуннал цашиврул шинан.

 
Мунил лагрулий сентябрьданул 13-нния 15-нийн МахIачкъалалив хьунни «Хранители традиций» тIисса дунияллул халкьуннал дянивсса хъуннасса фестиваль. Вай шанма гьантлул дянив республикалул хъуншагьру кIура бавну бия гьунардал ва аьдатирттал Маккалийн.

Хъамал ххирасса Дагъус­ттаннал аьрщарайн бувкIун бия билаятрал личIи-личIисса регионнаясса дизайнертал, заргалтал, творчествалул коллективрду. Павильоннаву, стендирттай ва хIаятирттаву усттартал хъамаллурахь буслай бия цала канил сянатирттая. Хъамаллуран хIадур дурну дия авадансса программа: выставкартту, мастер-классру, интеллектуал тIуркIурду, конференцияртту, ярмаркарду, миллатирттал дукрарду ва халкьуннал балайрду.
Зюннав-дачIулул, личIи-личIисса мазурдийсса балайрдал чIурдал ва къавтIавурттал гьавасрал лавсун най бия шагьрулул кIичIиртту.

Ца сахIналий хьунабавкьунни оьруснал частушки, татарнал баит ва дагъусттаннал шаммарду.
ЧIявушиву, ляличIишиву ца кIанттайн бавтIцири гьунардал! БатIлай я батIин къашайсса эмаратру – ураллал чарил усттартурал бувсса къищусса буттукьрая байбивхьуну, табасараннал бартбисурттайн бияннин! Ивановолиясса фарфорданул тахIни-кIичIулучIа – бархъаллал тIахIунтту ва унцIукуллал тIанттул усттартурал давуртту; елецкаллал къирттарал жинжилттал чIарав – къайтагъуллал гулавати, оренбургуллал кIукIлу лачакирттачIа – ккурттайннал чалагъайртту; якутиянал арцу-мусил давурттачIа – гьуцIалтIиялсса ва оьргъралсса. Гьаваллаву ришлай дия тIаннул, бурчул, ппалул кьанкь. Гьарца стендрай дирхьусса хъусливу бур щаллусса халкьуннал тарих, мунил ляличIисса код.

Так тIабиаьтрал сурсатирттаву дакъар жула паччахIлугърал хIакьсса аваданшивугу дуссача, халкьуннавур, мах мусийн кIура даен дан бюхъайсса каруннивур! Гьамин, ва культурардал монолитри, кьатIаллиясса ялун бигьаврил хьхьичI цIакьну дацIлацIисса, цукунчIавсса санкциярттал я ццах чин, я лахIан бан къахьунтIисса. Жула билаят дунияллия ябуцан бансса Западрал кьаст ссайнчIав къадуккантIиссар. Цуксса тай жува сакциярттайну бас бан хIарачат булларчагу, нахIакьссар ччимур экономикалул ва политикалул ялунбигьавуртту. Ца усттар цаманан арцуйх кьалан битан лахьхьин буллай уссаксса, ягу кубаннал хорданул ансамбль Дагъусттаннал зунттал ансамбльданул тIутIисса балайлуцIун бахIлай дуссаксса жула билаят я лекьан бан, я бух бан къахьунтIиссар.
Мукун бушиву «Хранители традиций» фестивальданул цал уттигу тасттикь бунни. Вари жула цашиврийн щак тIинан аьлттусса жаваб.
Зулайхат Тахакьаева