Луганскаллал Халкьуннал Республикалийнсса аьрххилул лагрулий Дагъусттаннал ХIукуматрал председатель Аьбдулмуслим Аьбдулмуслимовлул Дагъусттаннал аьралитуран личIи-личIисса наградартту дуллунни.

Хасъсса аьралий операция нанисса кIанттурдай ккаккан дурсса чувшиврухлу ва цала буржру лавайсса даражалий бартбигьлай тIий «Каспий» тIисса хушрайсса батальондалул 19 аьраличу лайкь хьунни наградарттан.
Дагъусттаннал бакIчи Сергей Меликовлул хIукмулийну «За вклад в патриотическое воспитание молодежи» тIисса АхIмад-Хан Султаннул медаль дуллунни 9 аьраличунан.
Дагъусттаннал бакIчинал цIа кусса ссятру, Дагъусттаннал ХIукуматрал чулухасса ХIурматрал грамотартту ва Дагъусттаннал бакIчинал ва ХIукуматрал чулухасса барчаллагьрал чагъарду буллунни 10 аьраличунан.
АхIмад-Хан Султаннул медаль лайкь дурминнавух ия жула лаккучугу, Уриннал шяравасса МахIаммадлул арс Мурад Аьлиев.
Мурад увну ур 1982-ку шинал февраль зурул 12-нний МахIачкъалалив, Уриннал шяравасса МахIаммадлул ва Пат1имал кулпатраву. Школалия махъ колледжгу бувккуну, аьралуннаву къуллугъ бан лавгун ур. Армиялий ва карунний бияврил спортрахун агьну ур. Ва журалул спортраву Москавуллал округрал чемпион хьуну ур. Аьралий бурж лавхъун увкIун махъ Мурад зий ивкIун ур Дагъусттаннал Росгвардиялул управлениялий ОМОН-лул подразделениялуву. Ва ивкIун ур Дагъусттаннал Дянивмур ва Кьиблалул округирттай террористътуращал талатисса группалуву. 2005-ку шиная айивхьуну, хIакьинусса кьинигу ур «кIирисса точкардай» къуллугъ буллай. 2005-2014 -ку шиннардий — Чачаннаву. Мунияр махъсса чIумал хъунама лейтенант Аьлиев гьан увну ур Бущихъив взводрал командирну, мукуна ва ивкIун ур Сергокъалаллал вацIраву боевиктал бугьлай. Шин шавай дур Мурадлул контракт чирчуну хасъсса аьралий операциялий гьуртту хьун лавгун.
Ччяни ххувшавугу ларсун, дакI ххарину, сагъ-саламатну зана хьуннав цала кулпатрачIан, ниттин ц1а дирзсса душничIан, цинявппа цанма ххираминначIан.