Январьданул 24-нний МахIачкъала шагьрулул Центральный библиотекалуву хьунни «Вехи великой Победы» тIисса цIанилусса проектрал презентация.
«Вехи великой Победы» хъанахъиссар билаятрал тарихийсса аьпа, виричувсса лавгмур жагьилсса никираву машгьур баву мурадрай МахIачкъала шагьрулул администрациялул сакин дурсса проект. Ва щаллу дуллалиссар МахIачкъалаллал Культуралул управлениялул Централизованный библиотечный системалул. Проектрал лагрулий дуллантIиссар Буттал кIанттул цIанийсса Хъунмасса дяъвилул иширттан хас дурсса чIярусса мероприятияртту.
Проектрал презентация дайдирхьуна «Помним, гордимся» тIисса луттирдал выставкалия. Шикку бия дяъвилиясса луттирду – чIявучин кIулссагу, цIуну буккан бувссагу.
БатIаврий гьуртту хьунни МахIачкъала шагьрулул бакIчинал заместитель Эмилия Раджабова, шагьрулул Культуралул управлениялул начальник Фарид Абалаев ва цаймигу.
– Ва проектрал презентация хъанахъиссар билаятрал президентнал Ватан дуруччайманалмурну баян бувсса шинал лахъишиврий жун дуван дакIнийсса хъинну чIярусса давурттал дайдихьуну. Ххувшаврил 80 шинал таварих жунма гьарцаннангу хъуннасса агьамшиву дусса ишри. «Вехи великой Победы» тIимур проектращал ца цамургу щаллу дуллантIиссару – МахIачкъалаллал мэр Юсуп Умавовлул сипталийнусса «100 дней до Победы» тIимур, – увкуна Эмилия Раджабовал.
Фарид Абалаевлул цалва ихтилатраву кIицI лавгуна дяъвилул агьамми муттардан хас дурсса проект щаллу дуван ЦБС хар-хавар бакъа язи къабувгьушиву, ванил зузалтрал, гьарца кьини тIиссакссагу, дуллай бушиву тарихийсса аьпа буруччаврийн, билаятрал лавгмуниясса кIулшивуртту жагьилтуравухгу ппив даврийн дагьайсса давуртту, цува ххарину ушиву библиотекалуву буккулт чанну бакъашиврия.
ЦБС-рал хъунмур Зулпат Ушановалгу хъамаллурахь гьарта-гьарзану бувсуна ва проектрая, ванил лагрулий шайссаксса ххуйну чIалачIи дурну дикIаншиву Сталинградуллал цIанийсса талатаву, Польша тархъан баву, ЭльбрусрацIунсса талатаву, Берлиннал штурм ва цаймигу Хъун дяъвилул хъунисса кампанияртту.
Бадрижамал Аьлиева
