Апрельданул 22-нний Дагъусттаннал Художниктурал союзрал Выставкартту дувай залдануву шадлугърал тагьарданий тIиртIунни «Бюхттулсса ХхувшавричIансса ххуллу» («Путь к Великой Победе») тIисса цIанилусса выставка.
Ва хъанахъиссар «Дагестанский аул» музейрал-заповедникрал проект, Ххувшаврил Музейращал, Дагъусттаннал П. ХIамзатовал цIанийсса изобразительный искусствардал музейращал ва Дагъусттаннал Художниктурал союзращал цачIуну сакин дурсса.
Выставка тIитIлатIисса батIаврий махъру лавхъуна «Дагестанский аул» музейрал-заповедникрал директор Зумруд Сулаймановал, ванил хъиривмур Ирина Хайбуллаевал, П. ХIамзатовал цIанийсса музейрал директор СалихIат ХIамзатовал, Аьрасатнал Виричув Загьид Загьидовлул ва чIявусса цайминнал.
Выставка сакин хьуну дур мукьва бутIуя: «Парадрая – фронтрайн», «Ххувшаврил полководцы», «Ххувшавриву Совет Союзрал республикарттал бивхьусса бутIа», «Дяъвилул ва вания махъсса шиннардил художниктурал творчество».
Цалчинмур разделдануву ккаккиялун дирхьумунил жува буцлай буру Октябрь революциялун 24 шинан хасну Москавлив ЯтIул майданнив, Куйбышеврай (цIанасса Самара) ва Воронежрай 1941-ку шинал ноябрьданул 7-нний хьусса парадирттайн.
КIилчинмур разделдануву дур цIа дурксса военачальниктураясса – «Победа» ордендалул кавалертураясса (11 инсан – вайннавух ца генералиссимус, 9 маршал ва ца генерал) материал. ДакIнин бутан, «Победа» орден СССР-данул яла лараймур орденни. И.В. Сталиннун, Г.К. Жуковлун ва А.М. Василевскийн ва кIийл-кIийлла дуллуну диркIссар.
Совет Союзрал цайми республикарттавух ДАССР-данулгу Ххувшавриву хъунмасса бутIа бивхьуссар. Дяъви байбивхьусса ппурттуву жулла республикалул инсантурал ккал диркIссар 930 азаруннийн дирсса.
Цавагу кулпат къавхьуссар гай шиннардий дяъвилул щавщи къабивсса, фронтрайн чиваркI къалавгсса. Дяъвилийн республикалия лавгссар 180 азара инсан, вайннава 90 азарунная ливчусса ливтIуссар ватан дуручлай, 70-нная ливчусса лайкь хьуссар Совет Союзрал Виричувнал цIанин, кIия – Аьрасатнал Виричувнал цIанин. Совет Союзрал Виричувнал цIа дагъусттанлувтураву цалчин ларсъссар МахIаммад ХIажиевлул. Щалла дунияллийх машгьур хьуссар Совет Союзрал Виричувнал цIа кIийлла ларсъсса АхIмад-Хан Султан.
Мукьулчинмур разделдануву жула художниктурал цалла суратирттайгу, цалва увкумунивугу ккаккан бувну бур дяъвилул цайнма биян бувсса асарду. Дяъвилул гьурттучитурал суратирттаву най дуна итталун дагьлай дур чичу, аьралий корреспондент Апанни Къапиевлул сурат (художник А.И.Августович).
Бадрижамал Аьлиева
