Августрал 3-нний МахIач­къалаллал дязаннив, Дагъусттаннал паччахIлугърал университетрал майданнив, гьунар бусса дизайнер Майя Мамаевал модардай тамаша бан биялсса агьлу бавтIун бия. БавтIцириннаву бия халкьуннал артистътурая тIайла хьуну, машгьурсса блогертал, творчествалул, магьирлугърал инсантал, элмулул ва СМИ-лул вакилтал. Мариян Илиясовал цIанийсса «Дараччи» фондрал биялсса душругу бия хъунмур Гульшан Хасаевая тIайла хьуну.

Майя фондрал ца яла чялишмур член Саидат Кьурбановал душгу бухьувкун, жула оьрчIал хьхьичIуннайшивурттая ва ккаккиярттая ххари хъанай бакъарув циняв. Ва ялагу, Майял цилва гьунарданул хIурмат буван, ванил дарзитурал канила дурксса бузмардай тамаша буван ччисса зувугу цачIу дихьлай бакъарув. Майя Дагъусттаннал агьалинан кIулссар «Бузма» («BOUZMA») тIисса бренд хIасул дурсса, миллатрал хьхьичIазаманнул лаххиялуву ххуймур, къулаймур, цIанасса чIумуцIун даркьумур уттизаманнул лаххиялавун ласласисса, сивсусса ва магьирсса художник-дизайнер хIисаврай. Майял дур инсантал махIаттал буллан ххирасса хасият. Най бунува кIицI лаганна, ва ххуллухьгу махIаттал бувансса даражалийсса даву дуршиву. Мероприятие усттарну дачин дурсса Тимур Хъунбуттаевлул дайдихьу дуллалисса махъ лавхъуну, микрофон ялавай бувансса чара бакъа, бавунни балчаннул рахъ-рахълил чIу. ЩябивкIния бакIру гьаз дурну буруглай буру чал ччаннал ттап-шаплил чIу бавнинмай: бурхха, балчан най бур, чал кIиллуву тIурча, Майял лаххиялувусса аьнтIикIа. Ххуйрикьай дайдихьу: тарихращалсса дахIаву аьч дуллалисса. Балчаннуйн жува гихунмайгу занабикIантIиссару, циваннивгу кIул хьунтIиссар. Куннил хъирив кув исвагьисса лаххиялувусса душру тихунмай ва шихунмай занай бия. Лях-карах баллай бия хIайран хьушиву бусласисса лахъсса чIурду. Лях-карахрив ягин шайва рирщусса хъатурдил гургу. Мероприятие къуртал хъанайсса ппурттуву цIунилгу балчаннул рахъ-рахълил чIу бавна. Чал кIиллуву кIяласса лаххиялувусса жалингу щябивтуну, чал хьхьури дургьуну най ия наврузбаг. Ва лавгзаманнул лахIза хьхьичI бацIан чал кIиллувусса жалин ва гьалмагъай личIинува ябацIанну итталун багьуна. Ссурссурдугу лахъи дурну, вай бахьлаганнин хъирив ялугьлай ливчIуна чIявуми. Майял коллекциярдан лахъсса кьимат бишлай, бавтIцири Тимур Хъунбуттаевлухь, барчаллагь учин Майя буккан бува тIий бия. Амма ламус буллалисса Майя лявкIуну тамашачитурал хьхьичIун къабувккуна, ванихь барчаллагь учин ччиминнангу ваних луглан багьуна. Чув лабикIанссия?! Гъан хъанай, цивппа рязийну ливчIушиву буслай, барчаллагь тIий бия. ТIутIавун бахьлаган бувна. Мяйжаннугу, «Бузмалий» кьини дарцIуну дия. Унгу-унгунусса байран дия. Лакку душваврал гьунардал барашинна дуллалисса мутта бия.
«Бузмалун» буниялттунгу дуниял тIитIиншиврийнсса вихшала дакIурдиву цIакь дуллай дия.

 БавтIцириннал цаппара пикрирдугу.
Асият Буттаева, философиялул элмурдал доктор, профессор:
– Дагъусттаннал культуралул тарихраву цалчинни укун лахъа-хъунсса даражалий, ссавнилу, гьавалий, мяъна-мурадрал куртIсса, яргсса мероприятие дуллалисса. Даву дувансса кIанугу къулайну язи бувгьуну бия. Хъамаллуравух бия бусравсса инсантал, лакрал интеллигенция. Ва даву сийлий дувансса хIарачат бувну бия ваниха зий бивкIминнал, гьарзатгу хIисавравун ларсун. ЛичIинува цIа дуванна Майял гьунардания. Ванил федерал даражалийгу лайкьну ккаккан дуванссар цила творчество, дакIний личIанну ккаккан дуванссар миллатралгу, Дагъусттанналгу лажин. ТIайлабацIу баннав!

 
Гульшан Хасаева, Мариян Илиясовал цIанийсса «Дараччи» фондрал хъунмур:
– Наслулул хьхьи­чIу­ннай­шивурттая оьрчIаяр цаярва нину-ппу ххари хъанан бикIай. Нагу жула ккурандалул уртакь Саидат Кьурбанова барча буллай бура. Ххари бувунна нагу, жува цинявгу ххари бувунну Майял усттаршиврул, бюхъу-бажар бушиврул ва лаххиялул ххуйшиврул. Майял цал уттигу исват дунни лакку душваврал каруннил усттаршивугу, ниттихъал лаххиялул хIурмат бушивугу.

 
Басират Билалова, «Дагъусттан» МЦК-лул Президиумрал член:
- ДукIу, Москавуллал ХIу­куматрал сипталийну Москавлив «Модалул нюжмар» дуссия, Майялгу ккаккан бувссия цилва коллекция. Нагу гьуртту хьуссияв му мероприятиялий, хъинну ххуйну кьамул бувна ванилми коллекциярду. ХIакьинугу Майял цуппа гьунар лахъсса дизайнер бушиву илданун ккаккан бунни: хIайран буллалисса колористика, исвагьисса аксессуарду, миллатрал колорит ва уттизаманнул стиль цачIун дурну, бавтIцириннан хIакьсса бахшиш дунни.

 
ХIабибат МахIаммадова, предприниматель:
– Ва мероприятиялул дия цамургу ххуйшиву: жуя арх бакъа щябивкIун бия кьатIаллил билаятирттаясса инсантал. Миллатирттал костюмирдайхчIин, музыкалийхчIин ва дизайнернал идеярдайхчIин хъамаллуран Дагъусттаннал культура ккаккан дуваву. Укунсса журалул мероприятияртту ялун нанисса никирангур аьркинсса. Майял коллекциярдава чIалачIиссар цукун авурсса, лазилавкьусса лаххия лахлай бивкIссарив жула хъуннабавахъал чIумал.

 
Фарида Базанова, Новостройсса «Непоседа» садикрал хъунмур:
– Модардал шоу куну кьаритансса даву дакъаяча, дакIнин малхIансса ва лахъину дакIний личIансса даву дия. «Бузма» этно-бутикраща хьунни миллатрал куртIсса традицияртту, лакрал костюмрал ДНК ва уттизаманнул лаххиялул ларайсса стиль цанницIун ца усттарну дакьин дуван, ххуттавун дагьан дуван. Модельертурал коллекциярду бикIай так ккаккиялун бишинссагу, Маяйлминнул ххуйшиву муниву дия, хъатIуйн, хъиншиврийн лахханссагу дия лаххия, гьар кьини лахханссагу. Гьаннайсса, тамашагу бувну тиннай дишай лаххия дакъаяча, чурххайн лавххуну занай мюнпат ласайсса дия. Вагур «Бузмалул» лаххия тIалавну душиврул савав.

 
Муслимат Расулова, хIакин:
–ТтучIанма Санкт- Петербурглия хъамал бучIайхту, цIухлай бия миллатирттал лаххия чув машан ласунтIиссар тIий, на вай «Бузма» ттучандалийн бувцуссия, тиккува арх бакъа бурхха ттучан. Хъамаллуращал бувххусса навагу, цичIар машан ласунсса пикри бакъанува, ххуй дирзумур ларсъссия. ХIакьину укунсса меропритие дусса кIулну, архния тамаша буван бунугу бувкIра. ЧIявусса агьали бавтIун бур, ябатIин къашайсса лаххия дур, хаснува лялух дахIай мухIулттая яру къабатIлай бивкIра. Укунсса даражалул дизайнертал Дагъусттаннайгу бушиву тIааьнну бур. Коллекциярдава чIалай бур дизайнер лакку аьдатру, багьу-бизу ххуйну кIулсса ва ххирасса бушиву. Майян чIа тIий бура модалул дунияллий тIайлабацIу, ва хIакьинусса давугу барачатсса хьуннав. Укунсса давуртту кьатIаллил билаятирттайгу лахъсса даражалий хьуннав! Дуллалимуний аргъ дизаннав!

ПатIимат Рамазанова