Вай гьантрай республикалий, щалагу билаятрай кунна, лавайсса даражалий кIицI лавгунни Учительнал пишалул байран. ВаницIун бавхIуну, Аьбдукарим Айгуновлул каялувшиву дуллалисса МахIачкъала шагьрулул 49-мур школалул коллектив хIурмат-кьиматрай кьамул бунни Республикалул Жяматийсса палаталул хъунаманал хъиривчу Сапарбаг Аьбдуллаевлул.
ОьрчIан тарбия ва кIулшиву дулаврил ххуллий захIмат бихьлахьисса учительтурахь байрангу барча дурну, ххаллилсса ссупрагу тIивтIунни ванал. – Учительнал бивзсса гьану, дуллусса кIулшивуртту гьарица шаттирахун дучIи ляхълай дур, оьрчIал хьхьичI тIитIлай бур цIусса оьрмулувунсса ххуллу. Учитель дакI цIий ва аякьалий уссар цачIава дуклай бивкIсса оьрчIру школалия лавгун махъгу, мудан ххари уллай уссар миннал ххувшавурттал, тIайлабацIурттал, къума лаглай уссар миннал байча щурча, оьрмулуву тIааьндакъашиву хьурча. ХIакьсса учитель ур дакIгу, кьюкIгу оьрчIаву дирхьусса инсан.
Ххирасса учительтал! ДакIнийхтуну барча дуллай ура зул пишалул байран.ЧIа тIий ура зун цIуллушиву, гьарица давриву тIайлабацIу, талихI-тирххандарайсса оьрму. Къалещаннав зуву даврихсса гъира-гьавас! – увкуна Сапарбаг Аьбдуллаевлул.
Учительтал барча бувна Дагъусттаннал Чичултрал союзрал лакрал секциялул каялувчи Супиян Оьмаровлулгу. Ваналгу цала ихтилатраву кIицI лавгуна учительтурайн хъар хъанахъишиву оьрчIал бучIантIимур.
Барча дуллай ура зул бусравсса пишалул кьини!
ЧIа тIий ура зун пишалул ххари буллалисса, цIуллусса чIярусса шинну, кулпатирттаву талихI ва тIайлабацIу, – увкуна Супиян Оьмаровлул.
Сапарбаг Аьбдуллаевлул цачIанма хъамалу бувкIсса учительтуран буллуна авурсса тIутIал кацIругу.
Ихтилатру буллалиминнал кIицI лавгуна, школалул директор Аьбдулкарим Айгунов чялишсса гьурттушинна дуллай ушиву хасъсса аьралий операциялий гьуртту хъанахъисса аьралийтуран гуманитар кумаг буллай.
Цала коллективраха дурсса бусравсса аякьалухлу директорнал барчаллагь увкуна миллатрал иширттачIа сахаватлувну ацIайсса, хIакьсса патриот Сапарбаг Аьбдуллаевлухь.
Имара Саидова
