ЦIуссалакрал райондалия Запорожскаллал областьрайн учительну зун гьан увсса тренер Герман Муслимов лайкь хьунни «Тренер года» тIисса бусравсса цIанин.
Ва награда лайкь дунни Германнул дакIнийхтунусса захIматрайну ва спортраву хьун дурсса хьхьичIунсса ккаккиярттайну. Гьашину шамилчинсса шинни Германнул Запорожскаллал областьрайсса Мелитополь шагьрулийсса 11-мур школалий самболул секция сакин бувну. Шиккува кIицI лаган, Германнул, «Самбо в школу» тIисса программалийн бувну, Мелитополь шагьрулий цалчин тIивтIуну бур самболул секция.
Ванал тарбиячитурал Москавуллал областьрай, Къиримнаву ва цаймигу кIанттурдай хьусса соревнованиярттай цимилагу хьхьичIунсса кIанттурду бувгьуну бур.
Барча уллай буру жула ватанлув лайкьсса наградалущал.
