Тталаткьини Поэзиялул театрдануву «Встречи в Театре поэзии» проектрал лагрулий хьунни Аьрасатнал магьирлугърал лайкь хьусса зузала, театровед, журналист, публицист, таржумачи Качар ХIусайнаеващалсса хьунабакьаву. Мунил сиптачиталну бувккунни Лакрал театр ва «Илчи» кказитрал редакция. Ххаллилсса даражалий мажлис хIадур бувну бия Лакрал театрданул ва му усттарну бачин бувну ия Аьрасатнал лайкь хьусса артист Аслан МахIаммадов.

Хьунабакьаврийн бувкIун бия «Илчи» кказитрал редакциялул ва Лакрал театрданул коллективрду, магьирлугърал ишккаккулт, Качар ХIусайнаеващал архIал дуклай бивкIми, даврил уртакьтал, гъан-маччами.
Мажлис тIитIлай, Поэзиялул театрданул директор Елена Гьаруновал бувсунни проектрая. КIицI лавгунни мунил лагрулий театрданул ччя-ччяни сакин дуллай бушиву республикалул хьхьичIунсса инсантуращалсса хьунабакьавуртту. Ца мукун хьхьичIунсса, республикалул магьирлугърал оьрмулуву ва журналистикалуву агьамсса кIану бувгьусса, жяматрал дянив бусравшиву хъуннасса инсан Качар ХIусайнаевагу ккаллиссар, увкунни ванил.

Хъирив Лакрал театрданул каялувчи Бадрижат МахIаммадхIажиевал кIицI лавгунни Качар ХIусайнаева бушиву дакIнил кьуват ххисса, республикалул оьрмулуву хъанахъимунил ялув цила пикри бусса ва му пикри сивсуну бусан бюхъайсса инсан.
Оьрмулул ва захIматрал ххуллу яргну бивтсса, чIявучил дакIурдиву дахIалай чинсса кIану бугьан бювхъусса миллатрал язисса душнил кьисса буслай байкъалитIунсса бур.

Ихтилат ссая бухьурчагу, баллай буссар му вичIан нахIуну, дакIнин бюхханну, чIумул лахъишиврий асардая къагьанну.
БутIра-бутIрай бавчIуну бувсунни кулпатрая – шаэр, таржумачи, аьлимчу, аьраличу Абачара ХIусайнавлуя. ДакIнин бивчунни ванал гьалмахтал, даврил уртакьтал, вайннавух дия ца республикалул дакъасса щала билаятрал тарихраву лирчIсса шаэртурал, аьлимтурал, магьирлугърал ишккаккултрал цIарду. Муния махъ дуккаву, захIматрал ххуллу – Дагъусттаннал паччахIлугърал университетрал филологиялул факультет къуртал байхту, Лакрал театрданувун зун бувкIсса чIун, мичча ГИТИС-раву пишакаршиву ларай дан тIайла бувксса куц. Оьрмулул яла талихI бумур чIумун ккалли дай ванил Лакрал театрдануву зий ларгсса шинну – ацIния арулла шинай завлитну, яла театрданул директорну. ДакIнин бивчунни жуятува батIул хьусса артистътал, гастроллай дакIний ливчIсса ишру, республикалул театрал магьирлугърал мусил фондраву ливчIсса спектакллу. Хаснува бавцIунни Дагъусттаннал цалчинсса драма чивчусса Гьарун Саэдовлуй ва ванал «Къалайчитал» тIисса пьесалий.

Муния махъ «Илчи» кказит цIунил буклай байбивхьуния шинмай кьуния ххюра шинал манзилданий хъунмур редакторну зий бивкIсса чIун – Качар ХIусайнаевал захIматрал яла бюхттулмур шачIану, захIмат-жапашивурттащал миллатран ххишала бакъа бусрав хьунну бивтсса. Гьарун Саэдовлул гьану бивзсса кказит уттава буккангу бувну, арулцIалла шинай бякъаливчIун буклай бивкIсса вайми кказитирттал хъирив лаянгу бувну, хьхьичIунсса ххуттайн буккан бан чIарав бавцIусса даврил уртакьтал, ва чIумул манзилданий миллатралгу, щала республикалулгу оьрмулуву хьусса дахханашиннарду, миннуцIун дархIусса ххари-хъиншивуртту захIматсса кьинирду, коллективрал хьхьичIуннайшивуртту, хIакьину цIакьну ччаннай бавцIусса.
Качар ХIусайнаевал щала оьрму ва захIматрал ххуллу миллатрал тарихрацIун бавхIусса бушиврийн бувну, мякь къалиххавай, хханхха къабуччавай вичIи дирхьуну бия мажлисрайн бувкIми.

«Илчи» кказит цIунил итабакьлай байбивхьуну, хъунама редакторну бацIан ччисса миллатрал хьхьичIунсса вакилтурава яла лайкьмур хIисаврай ванил цIа рищун маслихIат бувсса та чIумал Дагъусттаннал обкомрай зий бивкIсса ПатIимат Чурлановал бувсунни цукунсса къуркъабацIурттащал хьунабавкьуну бивкIссарив та ппурттуву Качар ХIусайнаева.
Яруссаннал «ХIакъикъат» кказитрал хъунама редакторнугу, Журналистътурал союзрал хъунаманугу зий ивкIсса Аьли Камаловлул кIицI лавгунни миллатирттал кказитирттал редактортурал дянив яла сивсуну цала пикри бусаймур бивкIшиву Качар ХIусайнаева, ванил дакIнил чумартшиврул цивппа хIайран байсса бивкIшиву. Даврил аьрххилий республикалул кьатIувгу цила кIулшивурттайну, дунияллия хавар бушиврийну, цила хIучча цIакьсса бушиврийну, пасихIсса ва мяъна куртIсса ихтилатрайну Дагъусттан лажин кIялану ккаккан байсса бивкIшиву.

Дагъусттаннал культуралул министрну зий бивкIсса Наида АьбдулхIамидовал бувсунни Качар ХIусайнаева Лакрал театрданул директорну бивтсса шинал цуппагу дахьва ведомствалул каялувчину зун бувкIун бивкIшиву. Та базилухь, цала мина-кIану дакъа бивкIсса Лакрал театрданухьхьун Оьруснал театрданул ЧIивимур зал буллуну бивкIшиву ва Качар Абачараевнал хIарачатрацIух ца­ппарасса артистътуран къатри дуллуну диркIшиву. «Лакрал театрданул артистътуран му иш хъинну бусрав хьуну бия, ттуйн даин барчаллагьрай бикIай. Инсаннан хъинбала баврияр хъуннасса хъиншиву ва оьрмулуву цамур диркIун дакъар», – увкунни ванил.

Шаэртурал къатлуву Качар ХIусайнаеващал цачIу хъуни хьусса лакку мазрайсса «Зунттал хъами» журналданул редактор Аьжа Хаппалаевал (Дагъусттаннал халкьуннал шаэр Юсуп Хаппалаевлул душ) ва Белла Рамазановал (Бадави Рамазановлул душ) бувсуна цала кулпатирттал дянивсса хIала-гьурттушиврия, оьрчIал ва душваврал дянивсса хIакьинунийнгу рукъацайсса дусшиврия.
«Бургъил сурат дишин бигьассар, цува усса кIанттай бургъил гъилишиву хIасул дан тIурча нажагьссаннащавагу къашайссар. Качар Абачараевная тIурча, даин дачай бургъил тIинттая куннасса гъилишиву», – увкунни Дагъусттаннал халкьуннал художник Ибрагьим-халил Супияновлул.

Изображение

«Илчи» кказитрал хъунама редактор Руслан Къардашовлул кIицI лавгунни цIунил итабакьлай байбивхьусса «Илчи» кказит ччаннай бацIан баврищал Качар ХIусайнаевал, хIасул бувну бушиву пишакарсса ва цIакьсса коллектив. Ванища бювхъуну бушиву гьарца журналистнаву гьунар хIисав шаврищал му аьч буван, хьхьичIунмай буван. Ва хIакьину цала каялувшиврий зузисса гьарцагу зузала ушиву Качар Абачараевнал даврийн кьамул увсса.

Качар Абачараевнал каялувшиндарай зун нясив шаву кьадарданул бахшишран хIисав дуллай, барчаллагьрай бия «Илчилул» зузалтгу.

Ихтилатру ялагу бувна «Зунттал хъами» журналданул хъунмур редактор Хамис Шамиловал, театровед Наталия Гъазиевал.
Гъанчунал цIания хьунабакьаврийн бувкIминнахь барчаллагь увкунни Качар ХIусайнаевал буттарссил ПатIиматлул арснал, Дагъусттаннал Композитортурал союзрал хъунама Рамазан Фаталиевлул ва Юстициялул полковник, хъинирву АьбдурахIман ХIусайнаевлул.

Хьунабакьаврил программа хъиннура ярг дуруна Лакрал театрданул артистътурал: ХIажиаьли ХIажиаьлиевлул, Луиза Шагьдиловал, Арслан Шагьмардановлул ва Зульфия Архилаевал.

Зулайхат Тахакьаева