Республикалий байбивхьунни полиомиелит цIуцIаврийн къаршисса жалгъа буллай.
Ва кампаниялул мурад бур республикалий эпидемиологиялул тагьар саргъун даву, вирус ппив хъанахъаву дайщун даву ва коллективныйсса иммунитет хIасул даву.
Муния бувсунни тталаткьини «Дагестан» РИА-лий хьусса пресс-конференциялий ДР-лул Минздраврал ва Роспотребнадзорданул зузалтрал.
ДР-лул цIуллу-сагъшиву дуруччаврил министрнал хъиривчу Патхула Патхулаевлул оьвчаву дурунни нитти-буттайн оьрчIру ва оьсса цIуцIаврища буруччин, буруччинсса чаран тIурча бусса бур жалгъа баву. Ванал бувсунни жалгъа бан махъаллил шаврийну оьрчIал ялун цукунсса бала биян бюхъайссарив. ДакIнин бувтунни полиомиелит – му, анжагъ цIуцIаву дакъашивуча, бунияласса бала бушиву.
Ва цIуцIаврия буруччин багьлай бушиву чIавасса оьрмулул оьрчIру.
Полиомиелит дирсса оьрчIру бусса оьрмулий мушакъатну личIайсса бушиву.
Республикалул лахъай азардал центрданул эпидемиологиялул отделданул каялувчи Мурад ХIажиевлул кIицI лавгунни полиомиелит цIуцIаврищал талан Аьрасатнал Минздраврал итадаркьуну душиву 400 млн. къуруширттал ва хIакьинунин Дагъусттаннайн бувкIун бушиву миллиондалийн бивсса доза жалгъалул.
Цалчинсса тур дайдирхьуну дур ноябрьданул 10-нний ва къуртал хьунтIий дур ноябрьданул 15-нний. КIилчинмур тур декабрьданул 15-нний дайдирхьуну 19-нний къуртал хьунтIий дур.
Жалгъа уквассар ва му бан бюхъантIиссар гъансса поликлиникарттай, детсадирттай ва школардай.
Жалгъа бан багьлай бур шанма зуруя 15 шин хьуннинсса оьрчIай.
Республикалул агьалинан ва цIуцIаврия кIул баву мурадрай, кIулшиву дулаврил идарарттай сакин дантIий дур хасъсса мероприятияртту. Дагъусттаннал Минздраврал ва Роспотребнадзорданул зузалт хIадурну бур жалгъалуя зарал бакъашу бувчIин бан.
КIицI бан багьлай бур, полиомиелит оьрчIал няран заралну дацIайсса вирусрал цIуцIаву душиву.
КIулну бикIияра, ва оьсса цIуцIаврища зула оьрчIру буруччинсса чаран так жалгъа (вакцина) баву бушиву.
Зулайхат Тахакьаева
