«ЦIимилийсса хьуннав рахIмат» тIун бикIайва жула бугьарами, марххала буллалийни, ягу гъарал лачIлачIийни. Мяйжаннугу, лув-ялув гьантрай ларчIсса гъараллал, бувсса марххалттанил биялсса апатIру биян бай. «Жула талихI зунттаву ялапар хъанан нясивну бушивур. Зунттал гъараллу, марчру байгьлагьиссар», укунгу тIун бикIайва кьанивсса шагьрурду щиналу ливчIсса чIумал жула ппухълу.

Махъсса шиннардий даххана хьуну дур тIабиаьт, жува цуксса марххалттаних, гъарах мюхтажну, мякьну бухьурчагу, чан хьуну бур гъаралгу, марххалттанилгу рахIмат. КIилахъан цалагу къабувну, яла интту гьантрай кьакъабагьавайсса марххалагу ягу, гъинттул щинал кIунтI къабагьну, ссуттил гьантрай кьакъадагьавай лачIлачIисса гъараллал агьалинан хъунисса зараллу биян бай.

Шагьрурдай гъарал ларчIтари, машинартту, подстанцияртту щиналу личIан барчагу, инсантурал къатравун щинну дагьарчагу, жула Лакку билаятрай укунсса апатIру нажагь бакъа къашай. Ва базилухь тIурча, вай гьантрай ларчIсса гъараллу сававну, тIабиаьтрал апатIру хьунни агьалинангу. АпатIирттал щавщи бивунни жула лакрал авадансса ва виричусса тарихрал лишанну хьусса БурхIай-Къалалийнгу – дагьунни чIирал ца ххярагьала.

Цуппа бухзаманнулмур къалалул макет хIисаврай бувсса бунугу, БурхIай-Къалалул лишан жула Гъази-Гъумучиял ва лакрал бюхттулсса тарихрал барашиннар, Лакку билаятрал цIанихсса лавгмунил, хIакьинусса кьинилул ва ялун бучIантIимунил дянивсса дахIавур. Жу чарабакъа хIарачат банну ччясса мутталий чIира цIу буккан бан», – укун чивчуну бур Лакрал райондалул бакIчи Юсуп МахIаммадовлул цала Телеграм-каналданий.

Лахьхьу Гъумукун къала ххал бан бувкIун бия «Дагнаследиялул» вакилтал. Вайннал бувсса хIукмулия бусанну хъиривмур номерданий.

Зулайхат Тахакьаева