Буйнакскалий Совет Союзрал кIийла Виричу, СССР-данул лайкь хьусса летчик-испытатель АхIмад-Хан Султаннул цIа абад дуллалисса даву дунни: ванал цIанийсса Академический лицейрал хIаятраву дацIан дунни гьайкал.
Бюхттулсса арснал бюст тIитIлатIисса ва мероприятиялийн бувкIун бия министр ЯхIия Бучаев бакIчину КIулшиву дулаврил ва элмулул министерствалул делегация, Буйнакскаллал мэр МахIач Аьбдулмуслимов, шагьрулул Депутатътурал Мажлисрал председатель Юсуп Батырханов, аминистрациялул вакилтал, дуклаки оьрчIру.
ЯхIия Бучаевлул бавтIцири барча буллай, Буттал кIанттул цIанийсса Хъун дяъвилий Ххувшаву ларсун 80 шин хъанахъисса ва Ватан дуруччултрал шин лахъа-хъунну кIицI лаглагисса ппурттуву цIусса гьайкал тIитIаву – чувшиврул тарих тачIав хъама къабитайшиву исват буллалисса давур увкунни.
«Жулва билаятрал тарихраву агьамсса иширттан хас дурсса датарду чансса дакъар. Гьар заманнай вирттал кьянкьану бавцIуну, паччахIлугърал суверенитет, цашиву дуручлай бивкIссар. АхIмад-Хан Султангу мукунсса вирттавравасса яргсса эбратри. На маслихIат буллай ура ялун нанисса никиран, жулва билаятрал тарих лахьлан, АхIмад-Хан Султан кунмасса вирттаврая ккалан, кIул буллан», -– увкунни министрнал.
МахIач Аьбдулмуслимовлулгу Виричунал бюст тIитIаву Академический лицейрал тарихраву бакъагу, щалва шагьрулул тарихраву агьамсса ишри увкунни.
«АхIмад-Хан Султан – караматсса кьадарданул заллур. Цала цалчинмур Мусил ЦIуку ванал лайкь бувссар 23 шинаву, кIилчинмур – 25 шинаву. Ванал кутIасса оьрму бувтссар, амма ва кутIасса оьрмулийну ванаща цувагу, цалва кулпатгу, цалва миллатгу, цалва кIанттугу абадлий хъама къабитанну машгьур бан хьуссар. ХIакьину СВО-лий Ватандалул мурадру буручлачисса Вирттаврангу ванал оьрмулул ххуллу чувшиврул ва патриотизмалул дарсну хъанахъиссар», – увкунни мэрнал.
Юсуп Батырхановлулгу кIицI лавгунни, АхIмад-Хан Султаннул цIа билаятрал тарихраву цIакьну душиву ва цIуну тIиртIусса гьайкалгу, Виричунал аьпалул хIурмат бушиврул лишаннугу хьунтIишиву, оьрчIру ва жагьилтал патриот зумуну тарбия баврил ххуллийсса давунугу.
Дуклаки оьрчIал бувсуна Виричунал дяъвилий дурсса къучагъшивурттая ва дяъвилул хъиривсса шиннардий дурсса давурттая. Дирхьуна гьайкалдануцI тIутIив.
Ххи банна, ва цIусса гьайкал тIитIаву, октябрь зурул 25-нний оьрмулул 105 шин хьунтIисса Виричунал юбилейрансса бахшиш хьунтIишиву ва Буйнакск шагьрулий АхIмад-Хан Султаннунсса кIилчинсса гьайкал хъанахъишивугу. Ххувшаву ларсун 75 шин кIицI лаглагисса 2020 шиналгу, «Аллея Российской славы» проектрал лагрулий Кьиблалул аьралий округрал 58-мур армиялул мотострелковое соединениялул жанахIравугу дацIан дурссия Виричунал гьайкал.
Дяъвилул хъиривсса шиннардий цIусса авиациялул ва аьламрал техникалул хIал ккаклай ивкIсса АхIмад-Хан Султан, ххюцIалунниха ливчусса леххай аппаратру испытать бувсса совет летчикри. Ва даву хIисавравун ларсунгу ва кунасса цама билаятрал тарихраву къаивкIшивугу дакIнин бутанну.
ПатIимат Рамазанова
