ХIакьину, нюжмаркьини, октябрьданул 4-нний, бухьхьияра Редукторный посёлокрай цIуну буллалисса Ися идавсил (с.аь.) цIанийсса РувхIаний центрданийн, МухIаммад Идавсил (с.аь.в.) мизитравун лакрал мажлис-мавлудрайн.
Ва мажлисрал программа авадансса дуссар, машгьурсса лакраясса видеофильмру, хIукуматрал ва жяматрал вакилтурал, имамтурал ихтилатру, вяъзарду, нашидру, викторинарду, оьрчIансса конкурсру, айфоннал ва чIивимур хIажлийнсса путевкарттал заллухъру хьунсса тIайлабацIу (шанна айфон ва шанна путевка), гьанттайнссаннул ссупра – вай гьарзат мавлудрал бутIрир.
Мавлуд дайдихьлахьиссар октябрьданул 4-нний ссят 17:00-нний
Умудрай буру, ва мажлис жулва авадансса тарих бусса миллатрал цашиву ккаккан дувансса, лакрал куннал куннахсса ччаву хъиннура цIакь дувансса хьунтIишиврийн.
Бачияра буниялттунгу ккаккан даннуча жулла цашиву, цачIушиву, дусшиву, буттал аьрщи, лакку маз ххирашиву, МухIаммад Идавсих (с.аь.в.) куртIсса ччаву дусса уммат бушиву, исламрал диндалул хIурмат бушиву. Ва ялагу, жулва ливтIуцириннал рухIирдан мюнпатсса хьуннав куну, кьулгьу-кьуран буккин, уттаваминнан цIуллушиву, дунияллий дакьаву чIа тIисса дуаьртту дуван.
ПатIимат Рамазанова
