Оьруснал чичу А.П.Чеховлул увкуну бур: «Инсаннаву гьарзат ххуйсса дикIан аьркинссар: лажингу, яннагу, дакIгу, пикрирдугу», – куну.

Вана укунсса бур жула ХъункIултIутIигу. Хъунмур оьрму Къабардин-Балкьарнаву, чил миллатрал дянив, гьан бувсса, цIагу, бакIгу ххуйсса, цIаниха лавхьхьуну цIу-цIампиргу бусса, хIурулъэн кунмасса лаккудуш. Август зурул 14-нний ва бувсса кьини дур. Хъуннащиял шяравасса ХъункIултIутIил 52 шин хьуну дур цила ласнащал АьбдурахIманнущал Къабардин-Балкьарнал хъун шагьрулий Нальчикрай ялапар хъанай.

---

Чил миллатрал дянив вайннал хIурмат ляличIинува хъунмасса бур. Мукунсса хIурматгу вайннал лайкь бувну бур уздансса багьу-бизулийну, чумартсса тIуллайну. Бусласаврийн бувну, ХъункIултIутIи бутталгу, ниттилгу агьулданун мурадиран бувсса душ бивкIун бур. Оьрмулул 16 шинаву чил аьрщарайн бувкIун, гъурбатрая кIилчинмур ватан хьуну, яргсса, эбратрансса оьрму бувтун бур ванил. Ласналгу, ххаллилсса наслулулгу хъихъи бивтсса ХъункIултIутIин тачIавгу хъамакъаитай цила кумаг аьркинма, чил аякьалух мюхтажма. Ва бур ккашилнал лякьагу, мякьнал кьакьаригу кIулсса, чани ва гъилишиву нанисса инсан.
Заннал дурсса хъуннасса бахшишну ккалли бай ванил ччинал цала хьурдай учинсса, гьарица чулуха итххявхсса, бюхъу-бажар бусса, тIайлабавцIусса цила ххювагу душ.

– ТачIав арс акъассар куну пашман къавхьуссару, арсурваврал кIану бугьансса куявтал нясив бунни жун Аллагьу Тааьланал, – учай мудан цила душваврая ва миннал ласурваврая рязисса ХъункIултIутIил.
ЧаргасначIа Оьмаровхъал кулпат бусравну бур. Нальчикрай царагу байран, шадлугърал мажлис къалагайссар вайннайн къаоьвкусса, республикалул къуллугъчитурал вай лахъа-хъунну барча къабувсса.

Къабардин-Балкьарнал личIи-личIисса организациярттал чулуха дуллусса наградартту: ХIурматрал грамотартту, Барчаллагьрал чагъарду, медаллу чIярур ваничIа, циняв кIицI лаглан къахьунссар. ХъункIултIутIи цуппагу тийхсса коммунистътурал партиялул чялишсса вакилли. Ва бур чув бухьурчагу, цуппа бавцIусса кIану чIюлу байсса инсан. Вай гьантрайгу Къабардин-Балкьарнал коммунистътурал партиялул цалчинма секретарь Борис Паштовлул шадлугърал даражалий буллунни Оьмаровхъал кулпатран Барчаллагьрал чагъар.
Вайннал кулпатрая чивчуну бур «Проспект Северный Кавказ» тIисса журналданий, «Дагъусттаннал цIанихсса инсантал» тIисса луттирай.

ДакIнин бутан, тIабиаьрал баларду бувну, Дагъусттаннал халкьуннайх кьини дурксса чIумал арцуйну, дука-хIачIанмунийну, лаххи-ликкиялийну ххуйсса кумагру бувссия ХъункIултIутIил ва ванил душваврал, вайннал хIурмат-хатир думиннал.
СсалчIав буруккин бакъа, давраннай бухьурчагу гъурбатрай, ХъункIултIутIин тачIав хъамакъаритай цила Ватан, Буттал кIану.
– Ци неъмат бунугу чил кIанттурдай, Дагъусттан ттул дакIниву мудан лавхъсса чирахъри, – учай ХъункIултIутIил.

Бувсса кьинигу барча­ тIий, тачIав къалещаннав вил дакIнивусса чирахъ тIий буру вихь, чил кIанттурдай лакрал цIа бюхттул дуллалисса ХъункIултIутIий!
ЦIуллушиву дулуннав вингу, вил кулпатрангу. ДакIниймур бартлаганнав, ахир хайрданийн дукканнав.