Аьрая зана къавхьусса ттула ниттиуссу Исян ва цинявппагу вирттавран

Ларгнугу мяйцIалла шин
Хъун дяъви къуртал хьуну,
Дур уттигу цIалайнна
Жул дакIурдиву щаву.

ДакIру цукун къацIуви,
Щаву цукун хъин хьуви,
ХIакьинусса кьинигу
Вирттал литIлай бунува!

Цалнияр цал кьурчIисса
Баллай буна хаварду,
МакIра ккавккун къаччимур
БукIлай буна чIихьрагу.

… Дадай, дура инагу
Итталату къадукьлай,
Гьарцагу шинах кунна,
Къуману, хъювусулну.

Дура, муданна кунна,
Вивунна ина ларгун,
Аьрая занакъавхьу
Аьзиз уссийх зума тIий.

… Исяй, аьзизсса уссай,
Бавал ца акъа акъуй,
ТачIавгу къабюхъанссар
Ина акъассар учин.

Цимилгу Къяннал Къадал
Ттухьва бувсун бунугу,
Вил каниву пулемет
Оьттул бувцIуну лявхъсса…

…Ватандалул дазурду
Гитлердул лиян дурсса
Хавар баян зурул хьхьичI
Вия чагъар бувкIссия:

«Ссалам ххирасса бавайн,
Ссалам ттул ряхвагу ссийн,
Ссалам на цIуххайманайн,
Ссалам щарнил жяматрайн.

Бавай, зу цукун буру?
Нагу оьну акъара.
Тти чагъар мачичари —
Нава хьхьичI иянссара…»

Амма лавгуна барзру
Арснах, уссих ялугьлай…
ХьхьичIва-хьхьичIсса оь хавар
Уссай, жучIан бувкIуна:

«Барчаллагь зун арснахлу
Лайкьну тарбия увсса,
Ватандалухлу ванал
Къучагъну жан дуллунни».

Агь, бавал, аьзизсса арс,
Ттул ца акъа акъама,
Хьурдай цал ккаккан тIийнна
Вил бавагу ларгунни.

Нагу ялугьлай бивкIра
РяхцIаллий мукьра шинай
Ххувшаврил байран кьини,
Уссай, ина учIаннин.

Иттав макьгу кьаркьунни,
Яругу мурчIи хьунни,
Цуксса ялугьларчагу,
Инама къаувкIунна …

Дадай, ина дакъагу
АцIния ряхра шинни,
Утти нагу ирсирай
БикIара дакIнин бичлай
Аьпалувух бивхьуми.

Байран кьини дунугу,
Дадай, бюхъайссар вища,
Иттату макьгу лихьлай,
РухIгу пахъ дагьан дурну,
Паракьатну ялугьлан
Ссавнияту аьрщарайн.

Нясив къадурну аьрщи,
Гьаттавух къаивхьувкун,
БацIан бувссар кIалабарз,
Вил уссин цIа увкуну.

УрчIулчин майрал кьини
Ххувшаврил байрандалий
Исял кIалазурулу
Чан къахьунтIиссар тIутIив!…
Асият Аьлиева,
ш. Хъювхъи