2024-ку шинал бартдиргьуну дур 1 млрд къурушрансса инвестициярдал 4 проект. Мунил хIакъираву пресс-конференциялий бувсунни Дагъусттаннал Ишбажаранчишиврул ва инвестициярдал агентствалул каялувчи ХIусайн ХIусайновлул.
Вай проектирдавух дур Ххунзахъиял райондалий «Эколенд» тIисса туризмалул ва рекреациялул комплекс баву, къуртал дурну дур пюрунтирттал ххаллу дайсса производствалул 1-мур ятIап.
Мукунна бартдиргьуну дур арматурастроениялул производствалул проект. Ванил мурад бур Аьрасатнал рынокрай импортозамещение даву. Бувну бур цIусса уссал фабрика. ХIусайн ХIусайновлул тIимунийну, Дагъусттан Республикалул ва ишбажаранчишиврул идарарттал дянив 5 кьутIи (соглашение) чирчуну дур республикалий приоритетсса инвестициярдал проектру бартдигьаврил хIакъираву. Вай инвестициярдал проектирдал аьмсса лагру хъанай дур 8,3 млрд къуруш, проектру бартдиргьуну махъ дузал бувантIий бур 879 зузи кIану.
2024-ку шинал чIиримур ва дянивмур ишбажаранчишиврул субъектирдал дучIан дурну дур налогирттал 3 млрд къуруш. Агентствалул каялувчинал бусаврийну, цIанасса ппурттуву республикалул чIиримур ва дянивмур ишбажаранчишиврул субъектирдал цасса реестрданий сияхIрайн лавсун бур 60 азарва субъект. Цалва цивппа давурттал дузал бувминнал аьдад дур 300 азара инсан.
ХIусайн ХIусайновлул тIимунийну, цIанасса ппурттуву Дагъусттаннал экономикалул личIи-личIисса бутIраву бартдигьин тIий бур инвестициярдал 60 проект. Миннувун дучIан дурну дур 482,7 млрд къуруш инвестициярдал, ми бартдигьаврийну дузал хьунтIий бур 25 азарва зузи кIану.
Уттинин ишла дурну дур 68,7 млрд къуруш ва дузал бувну бур 2,9 азарва зузи кIану.
ХIасан Аьдилов
