Октябрьданул 21-нний Аьрасатнал Виричу Шамил МахIаммадовлун 28 шин хьунтIиссия. Дурагу 28. Ва барча уван батIинтIиссия аьдатрай хъунмасса кулпат. ДувантIиссия Шамиллун ххирасса дукрарду. Хъярчру, тяхъашинна, гъилисса асарду, ххаришиву, талихI. Уттирив батIинтIиссар дакIнин утан, дуаь дуван…
Шамил Набибуллагьлул ва Сабина МахIаммадовхъал мукьа арсрурваврал дянив кIилчинмари. Ва чIивиниява хасиятрал хъинсса, хъярч-махсара ххирасса оьрчI ивкIун ур. Мудан пиш тIийнасса.
Ва дуклакиссаТарумовскаллал школалул учительтуралгу, чIаххув-чIарахналгу, мачча-гъанналгу мудан, «зул Шома баргъ куна гъилисса оьрчI ур» чайсса бивкIун бур. Вайннал ичIувацири дакIнин бутлай бур, Шамиллул иян махъаллил къашайсса унугу, цаярва заэвманайн ка гьаз къадайсса диркIшиву. Хъунама уссу МахIаммад ванан гьармуниву эбратну ивкIшиву. МахIаммадлун марцIну ххювардай дуклан ччай бивкIун бур, Шамиллунгу – махъун къаагьан. МахIаммад лачIун буккаврил секциялийн занан ивкIун ур, Шамилгу – ванащал архIал. Яла махъату, мяйжанссар , кикбоксинграл журалийн увкIун ур, ванал спортрал соревнованиярттай ларсъсса наградарттал чIамурду дурцIуну дур ичIура.
УрчIилчинмур классраву дуклакисса чIумал, ванал пиша язи бугьансса хIукму бувну бур военкомнащалсса хьунабакьаврий. Ванан военкомнал хаварду ххуй бивзун бур. Нитти-буттал ванахь ттатта, Жамав Ражабовлул, Буттал кIанттул цIанийсса Хъунмасса дяъвилул гьурттучиная бувсъсса хавардалгу аьралийчунал пиша язи бугьансса пикри цIакь хьуну бур. Дуклан увххун ур Москавуллал лаваймур аьралий училищалувун. Ва училище яла «кулпатрал» училище хьунтIиссар. Саид тIима арсналгу вава училище къуртал бантIиссар, чIана чIивима арс Муслимгу цIана дуклай уссар. Училищалуву дуклакисса шиннардий, 2017 ва 2018 шинал, Шамил гьуртту хьуну ур ЯтIул Майданнивсса Ххувшаврил Парадирттайгу.
Гьай-гьай, училище къуртал бувну шавай учIайхту, нитти-буттан ванан щар дурцуну ччай бивкIун бур. «Жалин ххал буван аьркинни»,- тIий бивкIун бур Сабина оьвхъусса, гьайбат дусса арсная яру къабатIлай. Шамиллул бувсун бур цува командировкалий Украиннал дазуйн гьан уллай ушиву. Набибуллагьлул дакIнил ццихь куну бур, гацIана бувчIуну бур, арс чун гьан уллай уссарив. МВД-лул ветерангу ухьувкун, ванан кIулну бивкIун бур дазуйсса тагьар оьлухълай душиву. Шамагу арс аьралийтал бухьувкун ( мукьилчинма Муслим таний школалий дуклай ивкIун ур) , 2022 шинал февраль зурул 23-нний ниттил арсру барча буллалисса смс-карду гьан дурну дур. Жаваб къадуллуну дур так Шамиллул. Хьхьувай яла чIалну оьвкуну бур, дард мадара, ххуйну ура тIий. Ниттин хIисав хьуну бур телефондалувух арснащал гъалгъа буллалийни, бахханасса чIурду, машинарттал ххурхху, аьлагъужа. КIюрххил телевизор лахъайхту, ванин бувчIуну бур хьумур.
Февраль зурул 26-нний Шамил МахIаммадовлул взводрал, Харьковрал направлениялийсса талатавриву душманнал 4 БТР –дануцIухсса бувну бур, ца БТР хасну цала руртун дур. Ва къучагъшиврухлу хъунама лейтенант Шамиллун «За отвагу» медаль дуллуну дур, цувама щаву дирну, госпитальданийн агьну ур.
Барз ва бачIи бувну бур ванал госпитальданий хъин хъанай. Итаавкьуну хъирив кьинива, реабилитациярагу къадурну, щаллуну хъингу къавхьунува лавгун ур цIунилгу дяъвилул цIаравун.
– Ласнал оьрчIру хъинну кьянкьа-кьурчIину тарбия бувна, адаминал яла агьаммур адаври, къириятри тIун икIайва. Жул арсругу къирият хьхьичIунну тарбия хьуну бухьувкун, лавгссар СВО-лийн, кьини чувшиврий лахъан, – тIий бур Сабина. Къизгъинсса талатавриву Шамил яла къатрал магъуйн гранатомётгу гьаз бувну, душмантурайн цIу тIиртIуну ивкIун ур. Гьалмахтурайн душманнал ккулларду къащун, тайннал хьхьичIалу кьукьлай. Хъунама лейтенант, къирият дусса жагьил, цала жандалий хIайп къакуну, гьалмахтурайн къалханну увккун ур. Шагьидну жан дуллуну дур. Ва увччуну ур цува хъуна хьусса буттал шяраву Тарумовкалий. Къуркъасса къювулул кьарчI бикIан бувсса нитти-буттал чIарав бивкIун бур та кьурчIисса ппурттуву МахIаммад ва Муслим. Саид къаивкIун ур. Вагу СВО-лий уну. Та ппурттуву цувагу связьрайн къауклай нину-ппу дардирдал пIякь учавай бивкIун бур. ТалихIиндаран, ясир агьну ивкIсса, захIматсса щаву дирсса Саид ххассал уван хьуну ур. Уссил чувшиврий жан дуллуссагу ванан бавну бур жулламур аьрщарай. Саидгу лайкь хьуну ур Чувшиврул ордендалун.
Дунияллий сагъну акъасса арс увсса кьини цуксса захIматну къабикIанссар нитти-буттан. ТачIав укуннагу лагь къашайсса щаву цIунил цIулаглай, ягин хъанай… .
Гьарца нюжмаркьини вай бияйссар арснал гьаттайн. ДакIнийсса бувсун дачIра дувайссар дакIру. Бусанна Шамиллул ппу Дахадаевский райондалиясса Уркарах тIисса шяравасса ушиву. Шикку, Шамиллул цIанийсса культуралул парк бур. Нину Сабина лаккудушри, ванил нину Кубра ЦIущарнияссар. Ппу Сайпуттин – Ккацраннал шяравасса. Вай Гьамияхь мина дирхьуну бухьувкун, Сабинагу тасса-танингу ппу тиччасса ххай бивкIун бур. Сабина цуппа бувну бур Азирбижаннаву, тикку хъунма хьуну, лакку маз ххуйну гъалгъа банну къалавхьхьунува ливчIунна тIий бур. 30 шин ласнал хъаралу дурсса ванин, даргиял дянив бухьувкун, даргири маз ххуйну кIулну бур. Гьаннайсса, лакку мархри бусса Виричу Шамил МахIаммадовлул цIагу Аьрасатнал чувшиврул тарихраву цIакьну личIантIиссар. Ванан Виричунал цIанин лайкь хьуний 25 шиннагу къархьуну диркIун дур. Ниттингу, буттангу яхI буллан багьантIиссар. ЯхI къабувнугу пайда бакъассар. Вирттаврал нину-ппурхха.
ПатIимат Рамазанова
