Вай гьантрай АьФ-лул Обороналул министерствалул аьралий госпитальданул клиникалул каялувчитурал, медициналул къуллугърал майор Бембеевлул чулухасса Барчаллагьрал чагъар бувкIунни ЦIуссалакрал райондалийсса Гьамиящиял шяравасса Расул Якьубовлуйн.

«Хасъсса аьралий операция наниссаксса хIаллай, гьурттучитуран гуманитар кумаг буллалаву жун хъинну асар хьунни.
ХIакьину ина кунма чумартсса инсантурал дуллалисса давурттан багьа бакъассар. Зу кунмасса патриотътал махъ буссаксса, ххувшаву ласунсса вихшалагу цIакь хъанай дур. ЧIа тIий буру вин гьарица ишираву тIайлабацIу», – тIий, чивчуну бур Барчаллагьрал чагъарданий.
ЦIанасса ппурттуву хъуннасса хъар лахълай бур аьралийтуран кумаг буллай, махъ бацIлацIисса инсантал.