Украиннал аьрщарай хасъсса аьралий операция байбивхьуния шинмай цивппа рязину Ватандалул мурадру буруччин хIадурну бушиву ккаккан бунни жула жагьилтурал. Хасъсса аьралий операциялий хушрай гьуртту хьун лавгминнавасса ур Вихьуллал шяравасса Батирханнул арс Альберт Оьмаровгу.
Вай гьантрай Альбертлун дуллунни паччахIлугърал награда. Аьралий бигарду биттур буллай ккаккан дурсса чувшиврухлу Альберт лайкь хьуну ур Къучагъшиврул ордендалун.
Аьралий операция байбивхьусса цалчинсса гьантрай Альберт, хушрай контрактгу чирчуну, лавгун ур чIярусса шиннардий оьбалартту бухIлай бивкIсса Донбассуллал агьали неонацизмалия мурахас буллан. Ванал исват бунни, Ватан дуруччаврил цIаний кьамул бувсса хIукмулул хьхьичI цичIар къадацIайшиву.
Къизгъинсса талатавуртту нанисса, оьрмулун нигьачIаву дусса кIанттурдай талай, ванал ккаккан бунни цува хIакьсса патриот ушиву.
Виричувнал зумунусса, кьянкьасса ва сивсусса дур ванал аьралий къуццушинна. Ва ур буниялагусса аьраличу, Ватандалул лайкьсса патриот, аьралитуран кумаг бан, чIарав ацIан хIадурсса инсан. Альберт хIурмат-кьиматрай ур архIал къуллугъ буллалиминнал дянивгу.
Буниялагу, барчаллагьри укун къучагъсса арс тарбия увсса нитти-буттан.
ЧIа учинну Альбертлун ва цинявппагу жула аьралитуран, ххувшавугу ларсун, цIуллуну-сагъну махъунмай зана шаву.
Имара Саидова
