ЦIуссалакрал райондалул бакIчи МаматIи ХIамзатовлуйн 136-мур гвардиялул мотострелковый бригадалул чулуха барчаллагь тIисса чагъар бувкIун бур.
Аьралий буржру бартбигьлагьисса бригада барчаллагь баян буллай бур гуманитар кумаг буллалисса бакIчинайн.
«ДакIнийхтуну асар хьунни жухара дуллалисса аякьа.
ХIакьинусса кьини ина кунма чумартсса инсантурал дуллалисса давурттан багьа бакъассар. Зу кунмасса патриотътал жула аьралитурал махъ буссаксса, ххувшаву ласунсса вихшалагу ххишала хъанай дур», – тIий чивчуну бур аьралитурая бувкIсса чагъарданий.
Буниялагу, барчаллагьран лайкьссар къучагъну аьралий буржру бартбигьлагьисса жагьилтурал махъ бацIан хIадурсса уздансса инсантал.
Шиккува кIицI лаган, хасъсса аьралий операциялул гьурттучитуран ва миннал кулпатирттан цикссагу кIицI лагансса кумагру буллай бур ЦIуссалакрал райондалул. Шикку хIасул бувну бур «Возрождение Родины» тIисса, аьралий операциялул гьурттучитуран ва вайннал кулпатирттан кумаг баву мурадрайсса ихIсандалул фонд. Ва фондравун кумагран арцу дирчуминнаягу чивчуну буссия «Илчи» кказитрай. Вай гьантрай ихIсандалул фондравун 100 азарда къуруш дирчуну дур Аьрасатнал президентначIасса РАНХиГС-рал выпускник, ЦIуссалакрал райондалиясса Алхан Шовхаловлул.
Имара Саидова
