Жунма цинявннанмагу кIулли цуксса захIматссарив шяраваллил кIанттай зузисса учительнал пиша, ва учительнал цIа зумух ларсувкун, янил хьхьичI дацIай ляличIисса сурат. «ДР-лул лайкь хьусса учитель» тIисса цIанин лайкь хьусса Асият МахIанмадхановна Дандамаевал щалвагу оьрму лавгун бур ГьунчIукьатIрал шяраву ялапар хъанай. Ттухьра дарс къадиширчангу, ванил хIакъираву чIявусса чичин бюхъанссар.
На мюрщи классирттаву дуклакисса чIумал Асият зун байбивхьуна школалул библиотекалул хъунмурну. Жугу, мюрщи оьрчIру, лагайссияв жунма буккинсса луттирду ласун, яла, туну, биянгу буван. Му чIумал дагьайва дакIнивун зарзала, суратругу ххал дурну, луттирду махъунмай булун бувкIсса жул иш ци бикIанссия…
Луттираву чивчумуния жухь цIухху-бусу бувайва, цилвагу гъира багьанну бусайва. ДакI дарцIуну бура, ттунма луттирду ккалансса гьавас гиччава най буна Асиятлул бувтшиврий.
Ва бур хIакьсса оьрмулул дус, аякьа дусса нину, ххаллилсса хъамитайпа.
Лас – Сократ Дандамаев зий икIайва шяраву личIи-личIийсса къуллугъирттай. Вайннал къатлувун бухху-буккугу чан къашайва. Багьайсса куццуй хъамал кьамулгу бувну, къушлин лайкьсса куццуй тIайлагу буккайва. ХIакьинусса кьинигу шяраву чIявуссаннан дакIний бикIантIиссар Асият школалийн бачиннин, кIюрххилва, яла чанну, ца шамийла варакъущал Узал зиллуйн щинав лагайсса.
Шяраваллил аьдат дур инт дайдишиннин къатта-къуш лази-лакьи бувайсса, кIяла аьрщарай хIулухIайсса. Га заманнай хъаннил зумув укунсса махъ багьну бикIайва «март байбишиннин Асиятлул хIулухIаннурду дурну къуртал дурссар» тIутIисса. Ччиманал эбрат ласунсса къатта-къушгу бачин бувну, ванил, дуккингу бувну, ччаннай бацIан бувунни шама арс ва ца душ.
Асиятлул 50-нния лирчусса шиннардий ГьунчIукьатIрал школалий дарсру дирхьуну дур. Ванил чичай назмурду, гьуртту шай гьарцагу школалий дуллалисса тадвирдавух, шяраваллил иширттавух. Школалий зузиссаксса мутталий дачин дурну бур ГьунчIукьатIрал шяравусса «Дараччи» клубрал филиалданул даву. ЦIанакулгу маслихIат бан, цIухху-бусу буван ваничIан бучIай школалий дарсру дихьлахьисса учительницахъул.
Ванил дарсру дирхьусса оьрчIру ва душру, цала дакIнил лавсъсса пишардал заллухъру хьуну, зий бур личIи-личIийсса давурттай. Шяравун бувкIукун, бучIай цалва ххирасса учительницачIангу.
Лаккуйн бувкIукун Асият МахIанмадхановна ккаккан гьан къахьурчан,ттунмагу нава шяравун бувкIшиврун ккалли бангума ччан къабикIай.
Калимагу камилсса, дакIгу аьчухсса, ххаллилсса Асият МахIанмадхановна юбилейращал барча буллай, чIа учин ччай бура цIакьсса цIуллушиву!
Винмагу, инавагу ххираминнал дяниву щалихханнинсса оьрму булуннав.
ДакIниву загьир хьусса вай ххаругу вин хас буллай бура:
ТIааьн дакъанугу
лагмасса каркар,
Ашкара къадара
хханххирал тагьар.
Авара къабувну
хьусса ахIвалат,
ДакI рахIат дуванну
бара маслихIат.
ЛяличIиссара дур
вил инсаният,
Таразирайн дагьсса,
хасъсса хасият.
Бусара миналул
лугъатрай махъгу,
Бишара усттарну
ххуттачIа ххагу.
Муаьллимнан лайкьсса
аякьа дурну,
Лякьлул оьрчI кунма,
тарбия бувну,
Ххаваххан къабивтун
оьрчIал хияллу,
Ккаккангу бувунни
дугъримур ххуллу.
ПатIимат Штанчаева
ш. Баку
