Медициналул элмурдал доктор, РМАНПО-лул (Российская медицинская академия непрерывного профессионального образования) аьмсса ва хирургиялул стоматологиялул кафедралул профессор, Москавуллал стоматологиялул ва челюстно-лицевой хирургиялул Агьаммур научно-исследовательский институтрал хьхьичIунсса элмийсса зузала Жаруллагь Аьшуевлул цIа чIявучин кIулссар, хаснува медициналул сфералуву зузиминнан.
Вай гьантрай соцсетирдавух ппив хьусса видеолуллив хъиннува машгьур унни жула Жаруллагь Аьвдуллагьович. НТВ-лий цIуну итадаркьусса «У нас выигрывают» программалул бусравсса хъамаличу ва тиражрал комиссиялул член хIисаврай шикку гьуртту хьусса Жаруллагьлул, журналистнал суалданухьхьун жаваб дуллай, бувсуна медициналул вузрал студентнан тачIав Гиппократлул хъа хъамабитан къабучIишиву, «зарал мабара» тIисса калима хьхьичI ххуттайн ларсун дикIан аьркиншиву, мукунма маслихIат бувна элму ахттар дуллан, пишалул даража гьаз буллан, пишалул ххуллий низам ва жаваблувшинна дуну икIан. Ялагу, цIанихсса хIакиннал бувсуна балайлия айишайшиву къашайшалал къюву хъин дуллай. Хъирив сий дусса шоулул сахIналия бюхттулсса ва бюххансса чIуний Жаруллагьлул итабавкьуна ххаллилсса лакку балай. Махъ ва кIулминная бавуна, Жаруллагьлул италиянал мазрайгума учайссар балай тIий.
– На дакIний-мазрай бакъана агьунна ва передачалийн. Медициналул зузалал кьинигу духьувкун, оьвкуна ттуйн шикку гьуртту хьун. Дирирсса сант ишла дурну, ттунма ххирасса лакку балай учин ччан бивкIуна. На ура зунттаву хъуна хьусса оьрчI. Нава чув ухьурчагу, ттун ттула буттал улча, лакку билаят мудангу дакIний буссар, – тIий ур Жаруллагь.
Ванал махъ буллуна, отпускалий Дагъусттаннайн увкIсса чIумал, «Илчи» кказитрал редакциялийн хъамалу учIан.
Увну ур Жаруллагь Хъуннащиял шяраву. Буттан, Аьвдуллагьлун, арсная летчик хьуну ччай бивкIун бур. Мунан ччимур бан, Жаруллагьгу Волгоградрай Качинский авиациялул училищалувун уххан хIадур хъанай ивкIун ур. Амма иш цамур куццуй багьну бур. Ккарччал хIакинну зузисса хъунама уссин хIисав хьуну бур цукун усттарну, кIанийн дуртун дихьлай уссарив ва мюршсса деталлал суратру, ва маслихIат бувну бур медицина язи дугьан. Уссин бувчIлай бивкIун бур мюрш ивкIун дайсса давуртту чIярусса стоматологиялуву Жаруллагьлул магьирсса кару ххуйну дучIи лякъиншиву.
Укун, 1989-ку шинал, Жаруллагь увххун ур Дагъусттаннал медициналул институтравун, стоматологиялул факультетрайн. Му къуртал бувну махъ, 1999-ку шинал увххун ур Стоматологиялул элмулул ва ахттаршиннарал институтрал аспирантуралувун. Дуклай унува зий ивкIун ур Аьрасатнал халкьуннал дусшиврул университетрал (РУДН) ортопедий стоматологиялул кафедралий. 2003-ку шинал шиккува докторантуралувун увххун, 2008-ку шинал лайкьну дурурччуну дур элмурдал докторнал диссертация. Ва хьуну ур Дагъусттаннай имплантологиялул сфералувусса цалчинсса доктор. 2010-2013 шиннардий Жаруллагь ивкIун ур стажировкалий Американаву, Балтимордал хьхьичIунсса медициналул университетраву. 2011-ку шинал Американавасса даврил уртакьтуращал тIивтIуну бур Москавлив «Доктор Джордж» тIисса Стоматологиялул ва эстетический косметологиялул инновациялул центр.
Жаруллагь гьуртту хьуну ур Аьрасатнал ва дунияллул халкьуннал дянивсса личIи-личIисса конференциярттай.
Жаруллагь ур ДР-лул лайкь хьусса хIакин, жяматийсса ишккакку. Ванал лайкь дурну дур «Посол мира» тIисса бусравсса цIа.
Андриана Аьбдуллаева
