Лакрал райондалий тIивтIунни «Мамраш – Ташкапур – Араканский мост» – гьануцIакул бакьин ­бувсса, ЦIахъардал къуманива ВицIхъиял дазуйн бияннинсса ххуллул бутIа.
Региондалун агьамшиву дусса ххуллул ацIния мукьра километралийхсса бутIа, биялну уттагу бувну, асфальтгу бувтIуну, бакьин бувну бур «Инфраструктура для жизни» миллатрал проектрал лагрулий.
Ххуллу тIитIлатIисса ­шадлугърай гьуртту хьунни ­Лакрал райондалул бакIчи Юсуп МахIаммадов, ДР-лул транспортрал министерствалул вакилтал, ххуллу бакьин буллай бивкIсса зузалт.
– ХIакьину жува гьуртту хъанай буру хъуннасса агьамшиву дусса иширай. Ва бур мяйра райондалул социал-экономика хьхьичIуннай шаврил тунну хъанахъисса ххуллу. Ва цIу буккан баврийну къулайшиннарду ххи хъанахъиссар агьалинал оьрмулун дакъасса, туризм хьхьичIуннай даврингу, – увкунни Юсуп МахIаммадовлул.
Бакьин бувсса ххуллул участокрай дурну дур мюхчаншиврунсса давуртту, марцI бувну бур щинаххуллурду.
Хасъсса къулагъас дурну дур ххуллул транспортрансса мюхчаншиврух. Бакьин бувсса щалва ххуллул бутIуй дацIан дурну дур дайшишрурду, ххуллул лишанну.

Зулайхат Тахакьаева