Дагъусттаннал халкьуннал Спартакиадалий Лакрал районгу
Сентябрьданул 21-нний МахIачкъалалив хьусса Дагъусттаннал халкьуннал Спартакиадалий Лакрал райондалиясса делегациягу гьуртту хьунни.
БурхIай- Къалалул ца чул левкьунни
Лахъи ларгсса гъараллу сававну, Гъази-Гъумучиял къалалул ца чул левкьунни. Сентябрьданул 24-нний шиккун, ци иш бурив, гихуннай ци дуван дурив ккаккан, бивунни «Дагнаследиялул» вакилтал. Вайннащал райондалул администрациялул бакIчи Юсуп МахIаммадовгу.
ЦIусса мизитравусса цалчинсса батIаву
Шахьуйннал шяраву хьунни Рабиуль-Авваль зуруцIун ва МухIаммад-идавс (с.аь.в.) увсса кьинилуцIун бавхIусса мажлис. Ва Шахьуйннал шяраву цIуну буллалисса мизитравусса цалчинсса батIаву хъанахъиссар.
Ваний гьуртту хьунни Шахьуйннал шяраваллил инсантал ва Гъази-Гъумучатусса, ГьунчIукьатIатусса ва Кьубатусса имамтал.
Мажлисрай ккалай бия Кьуран, тикрал буллай бия МухIаммад-Идавс (с.аь.в.) дакIнин утлатисса лахIзарду. Ахирданий Шахьуйннал шяраваллил мизитрал имам МухIаммад Сагидовлул мажлисрал гьурттучитурайн хъамалушиндарайн цачIанма оьвкунни.
Рабиуль-Авваль зурун хасну
ГьунчIукьатIрал мизитравугу хьунни вава журалул батIаву – Рабиуль-Авваль зурун хас дурсса мавлуд. Шиккугу гьуртту хьунни лагма щархъаясса хъамал.
Бакъа хьусса хIухчалт лявкъунни
Аьрасатнал МЧС-рал Ми-8 вертолет гьаз хьунни лакрал щархъал ялувсса ссавнийн, Буршиял шяраваллил чулухсса даралуву хавар-тIавар бакъа гьантри хьусса КIундиясса ва Хъунатусса хIухчалт ххал буван. Ва давривух гьуртту хьунни Аьрасатнал МЧС-рал Дагъусттаннал ххассалбувултрал кьюкьлул пишакартал. Вайннал хIухчалтрачIан чара бакъа аьркинсса дуки-хIачIиягу, гъилисса яннагу диян дунни.
Гъинттул ятту-гъаттара канаки буван зунттавун лавгун бивкIсса, тти махъунмай цалла шяраваллавун нанисса хIухчалт Лахъазанттул даралуву ливчIун бивкIун бур, кIа чулухун бувсса хъунмасса марххала сававну. ХIухчалтран кумагран кIа даралувун лавгунни Аьрасатнал МВД-рал Лакрал полициялул райотделданул зузалтгу.
ЦIинцI дичлансса кIанттурду щаллу бунни
КIундив щаллу бунни цIинцI дичлансса къуршив бишинсса майданну. Вай бувну бур чару ва тIама ишла дурну, шяраваллил, зунттал архитектуралул зумуну. Ва хъанахъиссар КIундиннал шяраву махъсса ппурттуву дуллалисса чIярусса давурттавасса ца.
Ваниннин шяраву тIивтIуссар футболданий буккайсса майдангу.
Бадрижамал Аьлиева
