Октябрьданул 31-нний Каспийскалийсса «Москва» культуралул центрдануву байбивхьунни Дунияллул дянивсса Каспийрал II цифралул форум. Мунийн бувкIунни Аьрасатнал цифралул лябуккулул министр Макьсуд Шадаев ва Дагъусттаннал бакIчи Сергей Меликов.

Мероприятиялий гьуртту хъанай бур 600-ннаха ливчусса инсантал.
ДР-лул бакIчи Сергей Меликовлул, Каспийскаллал цифралул форумрал гьурттучитурахь аьла-ссалам буллай, увкунни: «На барчаллагь тIий ура форум сакин буллалисса чIумал жун бувсса кумаграхлу, аьла-ссалам буллай ура форумрал гьур­ттучитурахьгу, хъамаллурахьгу. Ттизаманнул технологияр­ттал анаварсса бущилий баххана буллай бур жула оьрму, мунийн бувну хъуннасса агьамшиву дур опыт бахханаххи буллалаврил, захIматсса масъалартту дузал буллансса цIусса журарду ва ххуллурду ххал буллалаврил. Му иширан хасну укунсса площадкартту хъинну аьркинссар».

Сергей Меликовлул тIи­мунийну, Дагъусттаннай 90 процентраяр ххишаласса къатравун дурцуну дур анаварсса бущилий зузисса интернет, мунил буслай бур махъсса шиннардий цифралул иширттаву таман­сса хьхьичIуннайшивуртту хьушиврия.
«Экономика данных. Цифровая трансформация государства» тIисса национал проектрал лагрулий пландалий бур Дагъусттаннал зунттал гьан-бучIан захIматсса кIанттурдай интернет дузал даву мурадрай сакин дуван спутникрал сеть.

Меликовлул бувсунни цуксса хъуннасса мяъна дуссарив му проектрал республикалун, ванил географиялул личIишивурттугу хIисаврайн ларсун.
Региондалул бакIчинал форумрал гьурттучитурахь тава­къю бунни хIала-гьурттуну зун, цIусса пикри- зикрирдал кумаграйну Дагъусттаннай цифралул технологияртту лядуккаврил иширттан кумаг шаву мурадрай.

ХIадур бувссар
ХI. Аьдиловлул